آرمی چیف دی اعلیٰ ایرانی عسکری قیادت نال ملاقاتاں، اہم امور تے گل بات

راولپنڈی: آرمی چیف جنرل قمر جاوید باجوہ نے دورہ ایران دے دوران اوہناں دی اعلیٰ عسکری قیادت نال ملاقاتاں کیتیاں جہناں وچ علاقائی سکیورٹی تے دوطرفہ دفاعی تعاون تے گل بات کیتی گئی۔ آئی ایس پی آر دے مطابق آرمی چیف جنرل قمر جاوید باجوہ نے ایرانی سپریم نیشنل سکیورٹی ایڈمرل علی شمخانی تے فوج دے سربراہ میجر جنرل عبدالرحیم موسوی نال ملاقاتاں کیتیاں۔

ایہناں ملاقاتاں وچ علاقائی سکیورٹی صورتحال تے دوطرفہ دفاعی تعاون تے تبادلہ خیال کیتا گیا۔ خیال رہوے کہ پاک فوج دے سپہ سالار جنرل قمر جاوید باجوہ پچھلے دیہاڑ سرکاری دورے تے تہران اپڑے سن، جتھے اوہناں نے ایرانی مسلح فوجاں دے چیف آف سٹاف جنرل محمد حسین نال ملاقات کیتی۔آرمی چیف تے ایرانی مسلح فوجاں دے چیف آف سٹاف وچکار ملاقات دے دوران خطے دی موجودہ صورتحال تے امن و استحکام تے وی گل بات کیتی گئی جد کہ پاک ایران سرحد تے سکیورٹی امور وی زیر غور آئے۔ ایس توں پہلاں پاک فوج دے سپہ سالار جنرل قمر جاوید باجوہ نال ترک مسلح فوجاں دے چیف آف جنرل سٹاف دی ملاقات ہوئی۔

دوواں رہنماواں وچکار ملاقات دے دوران باہمی دفاعی تعاون نوں فروغ دین بارے گل بات کیتی گئی۔ ملاقات دے دوران خطے دی سکیورٹی صورتحال تے وی تبادلہ خیال کیتا گیا۔ ترک مسلح فوجاں دے چیف آف جنرل سٹاف جنرل یاسر گولر نے خطے وچ امن و امان لئی پاک فوج دی کوششاں نوں سراہیا۔
اپنی شہرت تے ناں استعمال کرکے دین دی خدمت کرنا چاہنا آں: حمزہ علی عباسی