کھڈاریاں دا انتخاب مستقبل نوں پیش نظر رکھ کے کیتا گیا اے: مصباح الحق

لہور: قومی کرکٹ ٹیم دے ہیڈ کوچ مصباح الحق دا کہنا اے کھڈاریاں دا انتخاب مستقبل نوں پیش نظر رکھ کے کیتا گیا اے۔ قومی ٹیم دے چیف سلیکٹر تے ہیڈ کوچ مصباح الحق دا کہنا سی دورہ انگلینڈ لئی طویل تے محدود، دوواں طرز دی کرکٹ دے نمایاں کھڈاریاں تے مشتمل اک وسیع سکواڈ دا انتخاب کیتا گیا اے جہدی وجہ کورونا وائرس نال نبڑن لئی تیار کیتے ایس او پیز دے مطابق سارے کھڈاریاں دی اکٹھیاں انگلینڈ روانگی تے فیر واپسی ا ے۔ مصباح الحق آکھیا سلیکٹرز نے اک اجہے سکواڈ دا انتخاب کیتا اے جہدے توں انگلینڈ وچ طویل تے محدود دوواں طرز دی کرکٹ وچ بہتر کارکردگی دی توقع اے۔ اوہناں آکھیا کافی عرصے توں کھڈاریاں دی میدان توں دوری اک چیلنج اے پر پُرامید آں کہ انگلینڈ وچ اک مہینے دے دوران بھرپور ٹریننگ پاروں مثبت نتائج ساہمنے آن گے۔مصباح الحق نے واضح کیتا سکواڈ دے انتخاب دے دوران سلیکٹرز دی ترجیح طویل طرز دی کرکٹ رہی کیوں جے پاکستان نوں اگلے دو مہینے ٹیسٹ کرکٹ کھیڈی اے۔ اوہناں آکھیا سیریز وچ شامل تن ٹی ٹونٹی میچز تے آئی سی سی ورلڈ ٹیسٹ چیمپئن شپ دے میچاں دے بعد ہون گے۔