سعودی وزیر حج دا نور الحق نال رابطہ، حج بارے فیصلے توں آگاہ کیتا

ریاض: سعودی وزیر حج ڈاکٹر بن بنتن نے وفاقی وزیر مذہبی امور پیر نور الحق قادری نال ٹیلی فونک رابطہ کرکے حج بارے فیصلے توں باضابطہ آگاہ کیتا۔ ترجمان مذہبی امور دے مطابق کورونا وباء دی وجہ توں سعودی حکومت نے غیر ملکی حجاج دی میزبانی توں معذرت کر لئی اے، ایس ورھے صرف سعودی شہری تے اقامہ ہولڈر ای حج ادا کرن گے۔ ترجمان مذہبی امور عمران صدیقی دا کہنا اے ایس حوالے نال وزارت مذہبی امور عازمین حج دی رقوم دی واپسی بارے طریقہ کار وضع کرے گی۔ اوہناں نے دسیا کہ سعودی عرب وچ پاکستانی سفیر، سفارتی عملہ تے پاکستان حج ڈائریکٹوریٹ ایس ورھے حج وچ پاکستان دی نمائندی کرن گے۔ دوجے پاسے سعودی وزارت نے اپنے بیان وچ آکھیا اے عالمی سطح تے وباء دے متاثرین دی تعداد وچ وادھے دے پیش نظر ایہ فیصلہ کیتا گیا اے کہ ایس واری سعودی عرب وچ پہلاں توں مقیم وکھو وکھ قوماں نال تعلق رکھن والے لوک ای حج دا فریضہ ادا کرن۔ ایہناں دے علاوہ محدود تعداد وچ سعودی شہری وی فریضہ حج ادا کر سکن گے۔