بلاول تے شہباز شریف دا بجٹ نوں مکمل طور تے رد کرن تے اتفاق

لہور: پیپلزپارٹی دے چیئرمین بلاول بھٹو زرداری دا مسلم لیگ (ن) دے صدر تے قائد حزب اختلاف شہباز شریف دا ٹیلی فونک رابطہ ہویا جہدے وچ بجٹ نوں مکمل طور تے رد کرن تے اگلے ہفتے آل پارٹیز کانفرنس بلان تے اتفاق کیتا گیا۔ بلاول زرداری نے شہباز شریف نوں ٹیلی فون کرکے اوہناں دی مزاج پرسی کیتی تے اوہناں دی صحت بارے پچھیا۔ بلاول بھٹو زرداری نے شہباز شریف دی جلد صحت یابی دی دعا وی کیتی۔ دوواں رہنماواں نے ملک دی مجموعی صورتحال تے وی تبادلہ خیال کیتا، تحریک انصاف ولوں پیش کیتے گئے قومی بجٹ نوں مکمل طور تے رد کرن تے اتفاق کیتا جد کہ اگلے ہفتے آل پارٹیز کانفرنس بلان تے وی مشاورت کیتی۔ شہباز شریف نے مزاج پرسی تے نیک تمناواں تے بلاول دا شکریہ ادا کیتا۔ قائد حزب اختلاف نے آصف زرداری لئی نیک تمناواں دا اظہار کیتا تے بلاول توں اوہناں دے پیو دی صحت دے حوالے نال وی پچھیا۔