سٹاک ایکسچینج حملہ چینی قونصلیٹ حملے نال رلدا ملدا اے: ڈی جی رینجرز سندھ

کراچی: ڈی جی رینجرز سندھ میجر جنرل عمر بخاری دا کہنا اے پاکستان سٹاک ایکسچینج تے چینی قونصل خانے تے حملے نال رلدا ملدا اے۔ کراچی پلس چیف دے نال پریس کانفرنس دے دوران ڈی جی رینجرز سندھ میجر جنرل عمر بخاری آکھیا 10وج کے 2منٹ تے چار ات گرد گڈی وچ آئے تے پاکستان سٹاک ایکسچینج دی عمارت داخل ہون دی کوشش کیتی، رینجرز تے پلس اہلکاراں نے ات گرداں دا مقابلہ کیتا، 10وج کے 10منٹ تے کاروائی پوری ہو گئی، 8منٹ وچ چار ات گرد مار دتے گئے، دہشت گرداں نوں پاکستان سٹاک ایکسچینج دے داخلی راستے تے ای روک لیا گیا سی، ات گرد پاکستان سٹاک ایکسچینج دی عمارت وچ داخل نہ ہو سکے، دو دہشت گرد پہلی چیک پوسٹ تے مارے گئے سن۔ ڈی جی رینجرز سندھ آکھیا پاکستان سٹاک ایکسچینج وچ اک ہزار توں ودھ بندیاں دا عملہ ہوندا اے، دہشت گرد قتل و غارت تے یرغمال بنان دے منصوبے دے تحت آئے سن، اوہ عمارت وچ موجود شہریاں نوں یرغمال بنانا چاہندے سن، اوہ جدید اسلحے نال لیس سن، اوہناں دے کول کھان پین دی شیواں وی سن، دہشت گرداں نے سدھی گولیاں چلائیاں، ایس حملے دی مماثلت چینی قونصلیٹ تے حملے نال ملدی اے۔