لیپ ٹاپ دے ساہمنے بیٹھ کے فوٹو سیشن کرن والیاں نے شعبہ صحت دا بیڑا غرق کیتا: عثمان بزدار

لہور: وزیراعلیٰ پنجاب آکھیا اے لیپ ٹاپ دے ساہمنے بیٹھ کے فوٹو سیشن کرن والیاں نے اپنے دور وچ شعبہ صحت دا بیڑا غرق کیتا، اپوزیشن والے عملی اقدامات کردے تے اوہناں نوں علاج لئی باہر نہ جانا پیندا۔ وزیراعلیٰ پنجاب عثمان بزدار نے اپنے بیان وچ آکھیا سستی شہرت دے شوقین شوبازیاں وچ مصروف رہے تے عوام معیاری علاج لئی ترسدے رہے، پچھلے دور وچ ہسپتالاں تے توجہ دتی گئی نہ دیہی و بنیادی مراکز صحت اُتے۔ عثمان بزدار دا ہور کہنا سی کہ پروپیگنڈا دی سیاست اپوزیشن دا وطیرہ اے، منفی سیاست نوں پروان چڑھان والی اپوزیشن دی رہی سہی ساکھ وی ختم ہو چکی اے، اپوزیشن رہنماواں نوں پوائنٹ سکورنگ چھڈ کے ہوش دے ناخن لینے چاہیدے نیں، ساڈی سرکار نے پہلے دن توں ای ہیلتھ کیئر سسٹم تے فوکس کیتا اے، اجیہا ہیلتھ سسٹم لیایا جا رہیا اے جتھے عام بندے نوں وی معیاری علاج معالجہ ملے گا۔

اپنا تبصرہ گھلو