ایک سچا تے کھرا تخلیق کار۔۔۔۔خواجہ آفتاب عالم بٹ

sadam sagar

لکھت:صدام ساگر

گوجرانوالہ دے شعراء دی جے گل کیتی جائے تے دور حاضر وچ خواجہ آفتاب عالم دا ناں کسے تعارف دا محتاج نہیں۔ اوہ ادبی تے صحافتی حلقیاں وچ اپنی چنگی پہچان رکھدے نیں۔ شعبہ وکالت نال جڑے نیں، جد کہ کمپیئرنگ دے میدان وچ ایہناں دا نعم البدل کوئی نہیں، جوشیلا انداز بیاں اے، جاندار جملے بولدے نیں، سامعین نوں اسٹیج ول توجہ دلوان دا فن بخوبی جان دے نیں۔ اوہ کئی ورھیاں توں سیاسی، مذہبی تے ادبی پروگراماں دی کمپیئرنگ دے فرائض انجام دے رہے نیں۔ایہناں دے بارے وچ کہیا جاندا اے کہ اوہ کسے وی پروگرام وچ تیاری دے بغیر وی اسٹیج نوں ایس دے معیار دے مطابق سنبھال سکدے نیں۔ بحثیت قانون دان ایہناں دا واسطہ روانہ بے کس، مجبور، لاچار تے ہر طبقہ دے لوکاں نال پیندا اے۔ میل ملاپ نال اوہ دوجیاں دے دُکھ درد نوں محسوس کردے نیں ایہناں نال ہمدردی دا اظہار وی کردے نیں کیوں جے اوہ جان دے نیں ایس بے حسی دا دور وچ لوکاں دے اندر احساس ناں دی کوئی شے نہیں رہی ایس لئی اوہ شعر دی صورت وچ آکھدے نیں کہ :
احساس بھی ہے سو چکا، انسانیت بھی مر چکی
ہر چوک میں زر کی پرستش ہو رہی ہے آج کل
خواجہ صاحب دی شاعری وچ مزاحمتی رنگ نمایاں اے کیوں جے اوہ جیہڑا کجھ ویکھدے تے محسوس کردے نیں اینوں اپنے تجربیاں تے مشاہدات دے سارے تر اثرات دے نال اپنی شاعری وچ محفوظ کر لیندے نیں۔ اوہناں نے شعردی مختلف اضافِ سخن اُتے طبع ازمائی کیتی اے جنہاں وچ حمد و نعت ، غزل، نظم، ماہیا تے قطعات شامل نیں۔ موصوف نے موضوع دی مناسبت توں کدھرے سادہ تے کدھرے مترنم بحریں استعمال کیتیاں نیں۔ ایس لئی ایہناں دی شاعری وچ سلامت تے روانی دونویں اکو ویلے وکھائی دیندیاں نیں۔ ایہناں دے کول لفظاں دی بھیڑ لگی رہندی اے جیہڑی ایہناں نوں گم نہیں ہون دیندی شاید ایہو وجہ اے کہ خواجہ صاحب اپنے آلے دوالے دے حالات تے واقعات اُتے گہری اکھ رکھدے نیں۔
آنکھیں سب کچھ کہہ دیتی ہیں
راز کہاں تک چھپ سکتے ہیں
خواجہ آفتاب عالم دے کلام دی نمایاں خصوصیات ایہناں دی سوچ دی شفافیت تے متوازن انداز، حق بینی، حقائق نگاری، توکل علی اللہ، جذبات دی سادگی، احساس تنہائی، حالات دی نامساعدت تے دوستاں دی بے روی توں مایوس نہ ہونا، نیز رجائیت پسندانہ اندازِ فکر شامل اے۔ اوہ محبت تے حسن دے جلویاں دی کرشمہ سازی نوں اپنے شعراں وچ ڈھال کے خوبصورت انداز وچ حسن محبت دے تذکرے نوں پیش کردے نیں۔
کرشمہ سازیاں ہیں یہ ترے جلوئوں کی اے ہمدم
کہ دیکھوں جس طرح آئے نظر تو ہی تو جاناں
بہت مشکل ہوا دنیا میں جینا اب ترا عالم
تمہاری بے رُخی نے کر دیا بے آبرو جاناں
خواجہ صاحب جدوں زندگی اُتے ناقدانہ ویکھدے نیں تے عالم وجود دا ذرہ ذرہ ایہناں نوں اپنے خالق دی قدرت تخلیق دی طرفوں متوجہ کر دیندا اے۔ خواجہ صاحب انسانی سوچ نوں اک زاویہ دیندے نیں اوہ لفظاں دے ذریعے مخلوق نوں اپنے خالق نوں پہچانن تے ایس دی قدرت دے اعتراف دا زاویہ اپنے ماہیاں دی صورت وچ کجھ انج بیان کردے نیں کہ :
سورج چاند ستارے
ایک خدا کے ہیں
جنّ و انساں سارے
٭
ہر پل ہیں وہ روتے
من کے قیدی تو
آزاد نہیں ہوتے
ایہناں دے ماہیاں دے حوالے نال اردو پنجابی زبان تے ادب دے معروف شاعر، استاد علامہ امین خیال لکھدے نیں کہ خواجہ آفتاب عالم دے ایہناں ماہیاں وچ رومان پروری برائے نام اے۔ پر موجودہ مسلیاں نوں ایہہ بڑی فنی چابکدستی نال ساہمنے لیائے نیں جس نال گل کھل کے اگے آ جاندی اے کہ ساڈی نوجوان نسل جیہڑی کجھ ویکھدی اے اینوں سچائی نال من و عن بغیر کسے لگی لپٹی دے بیان کر دیندی اے کسے منافقت نال کم نہیں لیندی تے فیر ماہیے وچ سچ دا اظہار بے باکانہ طور اُتے خودبخود ہو جاندا اے کیوں جے ایہہ ساڈی مٹی نال جڑی ہوئی صنف اے تے ایہہ اک بڑی خوش آئند گل اے جیہڑی سانوں کسے صورت قومی سطح اُتے مایوس نہیں ہون دیندی۔
’’تسکین نہیں ملتی‘‘ توں علاوہ ایہناں دیاں دیگر تصانیف وچ ’’ویلے دی ونڈ‘‘ (پنجابی شاعری)،’’قطعاتِ آفتاب‘‘ (اُردوشاعری)،’’اُلفت کے تم بیج اُگائو‘‘ (کتابچہ ) جیہڑے شعراں اُتے مشتمل نیں جس وچ گورونانک نوں خراج عقیدت پیش کیتا گیا اے۔ ایس کتابچے دی تقریب پذیرائی لہور میوزیم وچ وی ہوئی۔ ایہناں دیاں غزلاں دا مجموعہ ’’بچھڑ جانے کا موسم‘‘ اشاعت دے آخری مرحلے وچ اے۔ جد کہ ایہناں دی نثری کتاباں وچ ’’قومی سوچ کے حامل‘‘ تے ’’ہر دلعزیز قومی رہنما‘‘ شامل نیں ۔ جیہڑیاں ملک گیر سیاسی حلقیاں وچ داد تے تحسین حاصل کر چکیاں نیں۔ ایہناں دی حال ای وچ منظر عام اُتے آن والی تصنیف ’’ایک بہادر شخص‘‘ جس وچ پاکستان دے سابق وزیراعظم میاں محمد نواز شریف دی شخصیت دا احاطہ ماضی حال تے مستقبل دے آئینے وچ پیش کیتا گیا اے۔ جیہڑا ایہناں دی اپنے محبوب نال دلی عقیدت اے کیوں جے جدوں محبت عقیدت وچ بدل جاندی اے تے عقیدت توں اگے کجھ نہیں رہندا۔ ایہناں دی محبت تے عقیدت دا اندازہ ایہناں دے شعراں توں انج وی لایا جا سکدا اے کہ :
تیرے حسن کے جلوئوں کا ہے دور میاں
اس لیے میں جاتا ہوں لاہور میاں
زخموں سے اب میرے پائوں چھلنی ہیں
چہرے کا دیدار کرا فی الفور میاں
خواجہ آفتاب عالم اپنے ناں وانگوں روشن نیں جیہڑے ہر اک میدان وچ خیمہ فرسائی حاصل کیتے ہوئے نیں۔ اوہناں نے شعر و سخن وچ استاد لشعراجان کاشمیری دی صحت اختیار کیتی جد کہ وسیم عالم ایہناں دے بچپن دے دوست نیں ایس لئی ایہہ دونویں دوست یک جان دو قالب یعنی اک جسم و جان وکھائی دیندے نیں۔ شروع شروع وچ خواجہ صاحب مرحوم نظیر احمد بینظیر دے کول گئے کہ شعر و سخن دے حوالے نال میری کجھ رہنمائی فرمائو اوہ ایہناں نوں محترم علامہ امین خیال صاحب دے کول لے آئے اوہناں نے تھوڑی بوہت رہنمائی تے کیتی پر خواجہ صاحب دی ا ردو وچ زیادہ دلچسپی ویکھ کے محترم جان کاشمیری صاحب دے کول لے گئے۔ شعبہ وکالت وچ ایہناں نوں پاکستان دے سینئر قانون دان میاں محمد صدیق کامیانہ، اسلم خان بٹر تے کرنل اسحاق توں سکھن دا موقع میسر آیا جد کہ شعبہ صحافت وچ گوجرانوالہ دے سینئر صحافی اکرم ملک تے محمد آصف صدیقی دی سرپرستی حاصل رہی۔
خواجہ آفتاب عالم دی فن و شخصیت دے حوالے نال گلاں تے ہور وی بوہت ساریاں کہیاں جا سکدیاں نیں۔ ایہناں نال میرے مراسم بوہت گہرے نیں پر ایہناں دے ابتدائی دناں دے ہمراز وسیم عالم دی آراء نوں پیش کرنا ضروری خیال کرنا واں کیوں جے اک عالم اُتے دوجا عالم ای فتویٰ دے سکدا اے پر ایہہ وسیم عالم دی رائے فتویٰ نہیں بلکے ایہناں دی محبت تے خلوص دل دا اظہار اے اوہ دسدے نیں کہ خواجہ صاحب نال میرا تعلق کافی پرانا اے ہن تے ایہہ ناں میرے مخلص دوستاں دی لسٹ وچ بوہت نمایاں اے میں آفتاب عالم دے وکالت توں پہلے دے دن وی ویکھے نیں تے بعد دے وی، ایس سارے عرصے وچ ایس دے متھے اُتے بل نہیں ویکھیا، ہسندا مسکراندا کھلا کھلا چہرہ، دوست آئے، دشمن آئے، اپنا ہوئے یا پرایا سب نوں پرخلوص لہجے نال خوش آمدید کہندے نیں تے موقعے دی مناسبت نال خاطر تواضع وی کردے نیں۔ اوہ اپنی شاعری وچ اک سچے تے کھرے انسان وکھائی دیندے نیں ایہناں دے کسے وی قسم دے اظہار وچ لچک نہیں۔ جتھے جیہڑی گل کہندی ہوندی اے اوتھے اوہ بلاخوف، و خطر آکھ دیندے نیں تے ایہو ایہناں دی شاعری تے ایہناں دی شخصیت دا خاصہ اے۔

اپنا تبصرہ گھلو