پاک فوج دے اضافی دستیاں دی تعیناتی وچ کوئی حقیقت نہیں: شاہ محمود قریشی

اسلا م آباد: شاہ محمود قریشی آکھیا اے پاک فوج دے اضافی دستیاں دی تعیناتی وچ کوئی حقیقت نہیں، بھارت دی ہر حرکت دا نوٹس لینے آں تے جواب وی دینے آں، مودی سرکار اپنا بیانیہ شفٹ کرن لئی ایس طرح دا پروپیگنڈا کردی اے۔ وفاقی وزیر خارجہ شاہ محمود قریشی دا کہنا سی بھارت نے مقبوضہ کشمیر وچ ظلم و بربریت دی انتہا کر دتی، 3سالہ بچے دے ساہمنے اوہدے نانا نوں گولیاں نال بھون دتا، ایس توں وڈی بربریت دا عملی مظاہرہ نہیں کیتا جا سکدا، اج یورپی یونین توں مقبوضہ کشمیر تے تشویش تے غم و غصے دا اظہار کیتا، یورپی یونین نوں ساری صورتحال دا نوٹس لینا چاہیدا اے۔ شاہ محمود قریشی دا کہنا سی پاکستان نے ہر فورم تے کشمیر وچ ہون والے ظلم و بربریت نوں چکیا، بھارت مقبوضہ کشمیر وچ ماورائے عدالت قتل کر رہیا اے، پاکستان سوپور واقعہ نوں وی ہر فورم تے چکے گا، بھارت نے کشمیر وچ انٹرنیٹ بند کیتا ہویا اے، عالمی میڈیا نوں کشمیر وچ جان دی اجازت نہیں، بھارت کشمیر وچ ہون والے مظالم نوں لُکان دی کوشش کر رہیا اے، انسانی حقوق دیاں تنظیماں آخر کدوں تک چپ رہن گیاں؟