کہنوں الزام دتا جائے ، کہدے توں امید لائی جائے

تحریر:شاہد ندیم احمد

وزیر اعظم اپنی معاشی ٹیم نوں پچھلے تن مہینے دے دوران پٹرولیم مصنوعات دیاں قیمتاں وچ غیر معمولی کمی دا پورا فائدہ عوام تیکر اپڑان دی ہدایت کردے رہے نیں۔ ایس اُتے عمل درآمد تے کدھرے نظر نہیں آیا، البتہ یکایک پٹرولیم مصنوعات دیاں قیمتاں وچوں 27 توں 66 فیصد تیکر فوری وادھا کر کے لاک ڈائون دے ہتھوں مہنگائی تے بیروزگاری دے عذاب نال دو چار کروڑاں پاکستانیاں دے سر اُتے پٹرول بم دے ماریا اے۔ ایس معاملے وچ عجلت دا ایہہ عالم رہیا اے کہ معمولی دے طریق کار دے برعکس نویں قیمتاں دے تعین لئی نہ اوگرا دی سفارشاں ضروری سمجھیاں نہ نویں نرخاں دے نفاذ لئی نویں مہینیاں دے شروع ہون دا انتظار کیتا گیا بلکے خزانہ ڈویژن نے آپ ای نویاں قیمتاں دا تعین کر کے منظوری دیندے ہوئے باقاعدہ نوٹیفکیشن وی جاری کر دتا اے۔ پٹرولیم مصنوعات دے نرخ جلد بازی وچ وادھان دی مین وجہ پٹرول مافیا دا بھار ای ہو سکدا اے کیوں جے پٹرول دے نرخ ودھان دا معقول جواز موجود سی تے ایہہ قدم عوام نوں اعتماد وچ لے کے تے مقررہ طریقہ کار دی پابندی کردے ہوئے چکیا جانا چاہیدا سی جد کہ ایس ویلے جس طرح ایہہ کم کیتا گیا ایس نال سرکاری مشینری وچموجود کجھ عناصر دی مافیا دے نال ملی بھگت نہ سہی تے گھٹو گھٹ حکومت دے اندر بوکھلاہٹ، بدانتظامی تے افراتفری ضرور ثابت ہوندی اے۔
عوام حیران تے پریشان نیں کہ یکم جون توں 26جون تیکر وزیراعظم عمران خان تے حکومت دے ترجماناں نے بار بار قیمتاں وچ کمی دا کریڈٹ لیندے رہے تے قلت وگرانی دے ذمے وار مافیا نوں سخت سزا دین دی نوید سنائی جاندی رہی اے پر اک وار فیر مافیا جت گیا تے کوئی مانے نہ مانے حکومت نے رضاکارانہ طور اُتے پٹرولیم مافیا دے اگے گوڈھے ٹیک دتے نیں انج لگدا اے کہ جویں ملک مختلف مافیاز دیاں فرمائشاں تے ہدایات دے مطابق چلایا جا رہیا اے۔ ایس مافیا نے اپنے مفادات دے تحفظ لئی ہر طرح دی حقیقی تے مجازی اداریاں دے سنے سب نوں ای خرید رکھیا اے تے ہر طرح توں آزاد نیں کہ جس طرح چاہیے ایس ملک نوں نوچیے، کھسیٹیے ، کھائیے کوئی روک ٹوک نہیں۔ عوام دے مفادات دے تحفظ لئی تشکیل دتے گئے سارے ای ادارے عوام دے مفادات دا تحفظ کرن دے بجائے ایہناں طفیلیاں دا تحفظ کردے وکھائی دیندے نیں تے جے کدھرے کوئی شہری احتجاج کرن دی ہمت کر لوے تے اینوں موقعے اُتے ای سزا دے کے اپنے مالکاں نال حق وفاداری ادا کیتا جاندا اے۔حکومت جنا مرضی انکار کرے پر پٹرولیم دیاں قیمتاں وچ ملک دی تریخ دا ریکارڈ وادھا پٹرول مافیا دی ہدایت اُتے عمل دی شرمناک مثال اے۔ پٹرولیم دی عالمی قیمتاں کرونا دی وبا دے نال ای کریشن ہو گئیاں سن تاں پاکستان وچ ایس دے اثرات آن وچ ڈیڑھ مہینے توں ودھ دا عرصہ لگیا۔ ایس پورے عرصے وچ ملک وچ پٹرولیم دی مارکیٹنگ کرن والی کمپنیاں نے بلاخوف و خطر، تے بلا روک ٹوک زبردست منافع خوری کیتی جد کہ ملک وچ پٹرول دیاں کمپنیاں تے قیمتاں نوں ریگولیٹ کرن والا سرکاری ادارہ اوگرا کدھرے خواب غفلت دا شکار رہیا۔ یکم جون نوں جدوں تیل دیاں قیمتاں گھٹ کیتیاں گئیاں تے ملک وچ تیل فراہم کرن والی ساری ای کمپنیان سوائے سرکاری کمپنی پاکستان اسٹیٹ آئل دے چراغپا ہو گئیاں تے اوہناں نے پورے ملک وچ پٹرول دی سپلائی معطل کر دتی، کوئی ہور ملک ہوندا تے ایہناں تیل کمپنیاں دے مالکاں تے انتظامیہ نوں جیل دیاں سلاخاں دے پچھے بند کر دیندا پر پاکستان وچ سرکار کدی بڑھکاں ماردی رہی تے کدی ایہناں نال تیل دی بحالی دی درخواست کردی نظر آئی جد کہ سرکاری تحقیقاتی رپورٹ دے مطابق پٹرولیم ڈویژن پورے کھیڈ وچ تیل کمپنیاں دی پشت پناہی کر رہیا سی ایس آگاہی دے باوجود سرکاری ایہناں سرکاری کارندیاں دی گوشمالی وی نہیں کر سکیا۔ ملک وچ 25 دن تیکر تیل دی فراہمی معطل رکھن والیاں کمپنیاں دے نال ایسے پٹرولیم ڈویژن ن ے مذاکرات کیتے تے ایہناں دی فرمائش اُتے ملک دی تریخ وچ پٹرولیم دیاں قیمتاں وچ ریکارڈ وادھا کردے ہوئے عوام نوں اک وار فیر پیغام دتا کہ ملک ہن ایہناں دی شفارشاں اُتے چلے گا۔
تحریک انصاف حکومت دو ورہے توں مسلسل عوام دی خوشحالی تے مافیاز نوں کیف کردار تیکر اپڑان دے دعوے کردی رہی اے پر حقائق ایس دے الٹ نیں۔ حکومت نے نہ عوام نوں ریلیف اپڑان وچ کامیاب ہوئی تے نہ ای کرپٹ مافیا نوں نکیل پا سکی، بلکے عوام اُتے پٹرول بم ڈیگ کے حکومت نے اپنا بھرم کھویا تے مخالفین تے ناقدین دے ایس الزام اُتے مہر تصدیق ثبت کیتی کہ عمران خان دی حکومت نوں مختلف مافیا نے جکڑ لیا اے جس دا مقابلہ کمزور، ز مینی حقائق توں بے خبر و لاتعلق تے ناتجربہ کار ٹیم دے وس دی گل نہیں۔
عمران خان نے اپنے دوالے موجود مافیاز دے آلہ کاراں، نااہل تے ناتجربہ کار وزیراں توں جواب طلب کیتا نہ کسے نوں کن پھڑ کے کڈیا جیہڑا ایہناں لئی پریشانی، بلکے شرمندگی دا کارن بن رہیا اے۔ لوک پچھدے نیں کہ جنہاں ذخیرہ اندوزاں، سمگلراں تے گراں فروشاں نال نمبڑن دا وعدہ کیتا گیا سی ایہناں دا تے ہجے تیکر وال وی نہیں پُٹیا، چینی، کنک، آٹے، دوائیاں تے دیگر ضروری شیواں دیاں قیمتاں وچ کمی ہوئی نہ تن ہفتے تیکر پٹرولیم دی قلت اُتے قابو پایا جا سکیا البتہ جویں ای ایس مافیا نے چاہیا بین الاقوامی منڈی دا بہانہ بنا کے پٹرول دی قیمت وچ وادھا کروالیا ایس توں واضح ہوندا اے کہ حکومت قلت پیدا کرن والے مارکیٹنگ تے ریفائزی مافیا دے اگے سر دے دے بل جھک گئی اے۔ عوام کنہوں قصور وار آکھے کس توں امید رکھے، ایہہ اپنی بُکل وچ لُکے چوراں توں چشم پوشی دا نتیجہ اے یا اہم قومی معاملیاں اُتے مناسب مشوریاں دا فقدان، خمیازہ بہرحال کلے عمران خان نوں ای بھگتنا پئے گا جس دی 22 سالہ ریاضت، عوام دوستی تے تبدیلی دے عزم دی پونجی نالائق ، نا تجربہ تے بڑبولے مشیراں دے ہتھاں بھیڑی طرح لُٹ رہی اے تے ایس عظیم خسارے دا کسے نوں احساس وی نہیں۔