شیخوپورہ دے لاگے کوسٹر ٹرین دی زد وچ آ گئی، 19سکھ یاتری ہلاک، کئی زخمی

شیخوپورہ: شیخوپورہ دے لاگے فاروق آباد جاتری روڈ پھاٹک تے سکھ یاتریاں دی کوسٹر ٹرین دی زد وچ آ گئی، حادثے وچ 19بندے ہلاک جد کہ کئی زخمی ہو گئے۔ ترجمان ریلوے دے مطابق شاہ حسین ایکسپریس کراچی توں لہور آ رہی سی، حادثہ فاروق آباد تے بحالی ریلوے سٹیشن وچکار پیش آیا، ریلوے دی امدادی ٹیماں موقع تے اپڑ گئیاں۔ ریسکیو حکام دے مطابق سکھ یاتری پشاور توں سچا سودا جا رہے سن۔ شیخ رشید نے ٹرین حادثے دا نوٹس لیندیاں ابتدائی تحقیقاتی رپورٹ طلب کر لئی۔ وفاقی وزیر ریلوے نے ڈویژنل انجینئر نوں معطل کر دتا۔ شیخ رشید نے ذمہ داراں دے خلاف کاروائی دی ہدایت کر دتی۔ وزیراعظم نے شیخوپورہ وچ ٹرین حادثے تے افسوس تے قیمتی جاناں دے ضیاع تے گہرے دکھ دا اظہار کیتا۔ عمران خان نے زخمیاں نوں بہترین طبی امداد فراہم کرن دی ہدایت کر دتی۔