مائنس عمران خان دا مطالبہ غیر جمہوری نہیں: خواجہ آصف

اسلام آباد: مسلم لیگ (ن) دے رہنما خواجہ آصف دا کہنا اے مائنس عمران خان دا مطالبہ غیر جمہوری نہیں۔ غیر ملکی ویب سائٹ نوں دتے گئے انٹرویو وچ خواجہ آصف دا کہنا سی اسیں سمجھنے آں کہ وزیراعظم عمران خان دی ساکھ سو فیصد ختم ہو چکی اے۔ وزیراعظم آپ اک وی وعدے دی تکمیل نہ کر سکے جہڑے اقتدار وچ آکے اوہناں نے دہرائے۔ عمران خان دی موجودگی وچ پارلیمنٹ ’عضو معطل‘ بن گئی اے۔ سرکار دی تبدیلی دا طریقہ کار حالات آپ بنا دیندے نیں۔ انسان جدوجہد ضرور کردا پر جہڑے وی طریقے ہونے چاہیدے نیں اوہ آئینی ہون۔ اسیں کدی وی غیر آئینی طریقے دی حمایت نہیں کراں گے۔ اسیں چاہنے آں کہ ایتھے جمہوری معاشرہ فروغ پائے۔ جمہوری طریقے نال ساڈی سرکار جاندی اے تے چلی جائے، جمہوری طریقے نال اسیں حکومت وچ آ جانے آں بسم اللہ، ایہ چیزاں جمہوری معاشرے لئی بنیادی گل اے کہ سرکار دے آن جان دا فیصلہ آئین کرے نہ کہ غیر جمہوری یا ماورائے قنون دے طریقے نال ایہدا تعین ہووے۔رہنما (ن) لیگ دا کہنا سی مائنس عمران خان دا مطالبہ غیر جمہوری مطالبہ نہیں۔ اسیں کسے بیرونی قوت نال عمران خان نوں ہٹان دا مطالبہ نہیں کر رہے سگوں تحریک انصاف توں کہہ رہے آں کہ جمہوریت دی بالادستی تے حالات وچ بہتری لئی عمران خان دی تھاں کسے ہور نوں اپنا لیڈر چن لوے۔میں سمجھنا آں جے جمہوریت دا تسلسل چاہیدا اے یا موجودہ حالات توں ریکوری چاہیدی اے تے مائنس ون مائنس ہونا چاہیدا اے۔