کرسی کی پرواہ نہیں تو عوام ۔۔۔۔۔۔؟ تحریر: حمید اللہ بھٹی

Hameed Ullah Bhatti

لکھت:حمیداللہ بھٹی

پارلیمنٹ ہائوس وچ اپنے چیمبر وچ اراکین اسمبلی نال گل بات کردے ہوئے عمران خان نے اقتدار توں بے نیازی دا اظہار کردے ہوئے کہیا کہ مینوں کرسی دی پرواہ نہیں ایہہ جاندی اے تے ٹُر جائے پر مافیا دا آخری حد تیکر پچھا کراں گا۔ سانوں اپنے وزیراعظم دی اقتدار توں بے رغبتی دا پہلے ای یقین سی پر اوہناں نے نویں سرے توں خیالات دا اظہار کر کے ساڈے یقین نوں تازہ کر دتا اے اوہ اک درویش صفت انسان نیں تے اوہناں نے کابینہ دا انتخاب کردے ہوئے وی درویشاں نوں ترجیح دتی اے ایہہ درویشی ای تاں نیں جیہڑے ہیلی کاپٹر دا فی کلو میٹر خرچہ پجاہ روپئے دسدے نیں جے تکنیکی ماہر ہوندے تے انج دی گل کر کے جگ ہنسائی دا کارن تے نہ بن دے پر ایس دا ایہہ وی مطلب نہیں کوئی کابینہ دے ائق فائق وزراء دی ذہائت اُتے شک کرن لگے۔وزارت عظمیٰ دے منصب وچ وڈے اختیارات ہوندے نیں تسیں جرمنی تے جاپان نوں گوانڈھی ملک کہہ سکدے او جے کوئی تردید کرے تے منن دی کیہ لوڑ اے؟ لوکاں دا کیہ اے کہن دیو ایہناں دی اپنی مجبوری۔
ہاں تے گل ہو رہی سی ساڈے پیارے وزیراعظم نے فرمایا کہ کرسی دی پروا نہیں جاندی اے تے جائے مافیا دا آخری حد تیکر پچھا کراں گا مینوں تے اینا کہنا اے کہ کرسی دی چاہے پرواہ نہیں کردے پر عوام دا احساس ضرور کر لین یقین کرو حالات دن بدن خراب ہوندے جا رہے نیں اک عام تے مزدور دار بندہ تے اک پاسے ہن تے چنگے بھلے سفید پوش وی ضروریات زندگی لئی پریشاان وکھائی دیندے نیں۔ تنخواہ دار وکھرے لاچار نیں، اوہ تے بھلا ہوئے کرونا دا لاک ڈائون توں کجھ اخراجات وچ کمی ہو گئی بچیاں دے تعلیمی اخراجات دا سلسلہ رُک گیا تے تنخواہ دار دفتراں وچ حاضر دین توں کجھ عرصے بچ گئے انج آن جان دا خرچہ نہیں کرنا پیا پر تصور کرو جے بچیاں دے تعلیمی اخراجات جاری رہندے تے سرکاری ملازماں نوں ٹرانسپورٹ بند دے باوجود دفتراں وچ جانا پیندا تے اخراجات وچ کنا وادھا ہو جاندا؟
اے ساڈے پیارے وزیراعظم، تہاڈے نال بس اینا عرض کرنا اے کہ تسیں کرسی دی بے شک پرواہ نہ کرو پر سسکدے بلکدے عوام دی پرواہ ضرور کرو جیہڑی ودھدی مہنگائی دی وجہ نال دو ویلے دی روٹی توں وی قاصر ہوندے جا رہے نیں۔ یاد رکھو تہاڈی تے تنخواہ وی لکھاں وچ اے۔ بجلی، سوئی گیس، پانی، ٹیلی فون تے آن جان اُتے وی کجھ خرچ نہیں کرنا پیندا بلکے ساریاں سہولتاں مفت حاصل نیں فیر وی تسیں اخراجات پورے نہ ہون دا شکوہ کردے او ذرا تصور کرو اک عام بندا جیہڑا کجھ ہزار روپئے تنخواہ لیندا اے تے کجھ ہزار وچوں بچیاں دی تعلیم دلوانی ہوندی اے، صحت دا خرچہ کرن توں علاوہ، پانی، بجلی، گیس دے بل وی دینے نیں تے جے گھر وی کرائے دا ہوئے تے اوہ کنج گزارا کرے گا؟ جے کدی فرصت ہوئے تے ضرور سوچو تہاڈے کول تے اختیار اے وسائل نیں کدی مجبور بندے دے دن رات دی رپورٹ لوئو ویلا بدلدا رہندا اے اج اقتدار اے تے مستقبل وچ اللہ دی ایس نعمت توں محروم وی ہو سکدے او ایس لئی ویلے توں فائدہ چکو تے مجبوراں دیاں دعاواں لوئو یاد رکھو جیہڑا خلق خدا دے مسئلے حل کردا اے اللہ اینوں کدی رسوا نہیں کردا۔
تسیں آٹے، چینی بحران دی تحقیقات کرائیے جس دے نتیجے وچ کجھ اک چہرے بے نقاب ہوئے پر فیر چراغاں وچ روشنی نہیں رہی۔ عوام دا سوال اے کہ تسیں نوٹس لیا فیر اچانک چینی 55توں 85دی کنج ہو گئی؟ تسیں آٹے ول دھیان دتا اوہ وی عوام دی پہنچ توں دور ہوندا جا رہیا اے مہربانی کرو کرسی دی پروا نہ سہی عوام دی کجھ پرواہ کر لوئو لوک تہانوں دعاواں دین گے۔
تسیں آندے ای اہم سرکاری عمارتاں نوں تعلیمی اداریاں وچ بدلن دا عزم ظاہر کیتا پر ہجے تیکر وعدہ ادھورا اے پر عوام سمجھدی اے کہ ممکن اے کرسی وانگوں تہانوں اپنے عزم تے ارادیاں دی وی پرواہ نہ ہوئے پر مہربانی کرو عوام ناں دی مخلوق نوں نظر انداز نہ کرو ایہہ انج دی مخلوق اے جنہوں 72ورھے توں وعدیاں اُتے ای گزارہ کرنا پئے رہیا اے تسیں ریاست مدینہ دے دعویدار او کیہ تہاڈے دور وچ وی کوئی تبدیلی نہیں آئے گی؟ جے کوئی تبدیلی نہیں آئی تے عام لوک حکمران دے کرسی دی پرواہ نہ ہون دے دعوے اُتے کنج اعتبار کرن گے۔ تسیں ڈالر کنٹرول کرن دی ہدایت کیتی پر اج ایہہ صورتحال اے کہ ڈالر دی پاکستانی روپیاں وچ قیمت 168 ہو گئی اے پچھنا ایہہ اے کہ تسیں جس پاسے اکھ چکی تباہی دا کنج آغاز ہو جاندا اے؟ تہانوں پتہ اے ڈالر دی اُچی اڑان نال ملک اُتے کنے سو ارب قرضے دا وادھا ہو گیا اے؟ تسیں تے چلے جائو گے پر ادائیگی عام تے غریب لوکاں نوں خون پسینے نال کرنی پئے گی عوام نال اینی بے اعتناہی تے زندہ درگور کرن دی پالیسی چنگی گل نہیں۔
پیارے وزیراعظم، تسیں غریباں دا ناں لیندے ہوئے پٹرول وغیرہ دیاں قیمتاں گھٹ کرن دا مژدہ سنایا تے ہر چہرے اُتے خوشی سی تے لوکاں نوں یقین ہو گیا کہ کجھ وی ہوئے ساڈا وزیراعظم عام بندے دے دکھاں دا مداوہ کرے گا پر ہویا کیہ نرخ گھٹ کیہ ہوئے ملک وچ پٹرول وی نایاب ہو گیا لوک مارے مارے سڑکاں اُتے بوتلاں چکے خوار ہوندے رہے پر حکومت نرخ گھٹ کرن تیکر ای محدود رہی تے لوک 72 دی بجائے 150 روپئے وچ اک لیٹر پٹرول حاصل کردے رہے تن ہفتیاں بعد ریاست مدینہ دے علمبرداراں نے توجہ دتی تے اچانک 25روپئے فی لیٹر دا وادھا کر دتا فیر وی لوکاں نے سکھ دا ساہ لیا کہ چلو مہنگائی وچ وادھا تے ہو گیا پر ضرورت دے مطابق پٹرول تے ملن لگیا اے۔
کہن والے تے ایتھوں تیکر کہندے نیں کہ حکومت دے اک فیصلے نال چار ارب روپئے پٹرول کمپنیاں نے عوام دیاں جیباں توں نکلوا لیے کتھے ساڈے ملک وچ گرانی دے خلاف لوک مظاہرہ کردے نعرے لاندے سی تہاڈے دور وچ پٹرول دی قیمت وچ وادھے دے باوجود عوام نے ایس بنا اُتے سکھ دا ساہ لیا اے کہ دستیابی دا سلسلا تے شروع ہویا۔ انج دی واردات اج تیکر کسے حکمران دے دور وچ نہیں پائی گئی جویں دی ریاستِ مدینہ دے دور عوام نال کیتی گئی اے فیر وی اینا کہنا اے کہ کرسی دی بے شک پرواہ نہ کرو پر اپنے فیصلیاں دا جائزہ ضرور لوئو، تے کابینہ وچ بیٹھے مافیاز دے ہمدرداں دا محاسبہ کرو تاکے کسے نوں عوامی مفادات نال کھلواڑ دی جرات نہ ہوئے تسیں ٹھیک ای فرمایا ہوئے گا کہ تہانوں کرسی دی پرواہ نہیں پر تہاڈے کولوں پچھن دی اینی جسارت اے کہ کرسی دے نال کیہ تہانو ں عوام دی وی پرواہ اے یا …؟

اپنا تبصرہ گھلو