علی احمد گجراتی

empty profile

لکھت:علی احمد گجراتی

2جولائی برسی، شہید پنجابی ڈاکٹر طاہر تنہا (جنرل سیکرٹری دل دریا پاکستان) ایس موقع تے انہاں دیاں پنجابی زبان و ادب لئی خدمات نوں خراج پیش کیتا جاندا اے۔آپ پیشے دے حوالے نال ہومیو پیتھک ڈاکٹر سن۔ ماں بولی نال پیار گُڑھتی وچ رچیا ہویا سی۔ محدود وسائل وچ رہ کے ڈاکٹر طاہر تنہا ہوراں پنجابی لئی دن رات کم کیتا۔ لوکائی وچ پنجابی زبان بارے جانکاری تے جاگرتی لئی انہاں دیاں کوششاں وسلاہن جوگ نیں۔ حافظ آباد وچ انہاں نے نویں سرے توں پنجابی تحریک دا مُڈھ رہیا۔ پنجابی مشاعرے، پنجابی لئی ریلیاں، جلسے تے پنجابی زبان وچ بالاں دے مقابلیاں دی ریت پائی۔
ڈاکٹ طاہر تنہا ہوراں دی پنجابی سیوانوں مُکھ رکھدیاں ہویاں پنجابی سیوک کاشف حسین سندھو(ملتان) ہوراں نیں انہاں نوں شہید پنجابی دا خطاب عطا کیتا۔
دل دریا پاکستان تنظیم دے بانی ممبر سن۔ تنظیم وی رجسٹریشن توں لے کے تنظیم دے کھلار تے وقار لئی بہت محبت کیتی۔ حیاتی وچ اوکڑاں تے مشکلاں نال کھڑبا کھڑبی رہی۔ چوکھی وار غربت دے پتھر صبر دی ہانڈی وچ گال کے گزارا کرنا پیا۔ پہلا ویاہ ہویا تے کجھ سال بعد علیحدگی ہو گئی۔ دوجا ویاہ ہویا تے رب سوہنے دو پھُل مرتضیٰ حیدر تے فضہ بتول دی شکل وچ عطا کیتے۔ اپنے بالاں نال روٹین توں چوکھا پیار کردے سن۔ تے اوہناں لئی چنتا وچ رہندے سن۔ اپنی نویکلی سوچ وچار پاروں معاشرے نال گھٹ ای بنی۔ ایسے طراں گھر والیاں نال وی سوچاں دے اختلاف پاروں رنجگی چلدی رہی۔ حیاتی دی دُھپ چھاں چوں اخیرلے چار ورہے لگاتار دُھپ تے ای گزرے۔ کجھ چر پہلاں ہیپاٹائٹس دا شکار ہو گئے۔ علاج کرایا گیا جس وچ ویر جی علی ناصر ہوراں بڑا ساتھ دتا۔ ایس دے بعد یکدم کوئی بیماری پسلیاں وچ پیدا ہوئی تے اک رسولی جہی بن گئی۔ مرض دی تشخیص دے مرحلے وچ غربت پیر ڈاھ کے لمی پئی گئی۔ اپنی انکھ پاروں کھل کے کسے اگے اس معذوری تے مجبوری دا اظہار وی نہ کر سکے۔ وجود سُک کے تیلا گیا سی۔ منجی تے پیا جسنا وسدا نہیں سی۔ ویکھ کے ای بندہ رو پیندا سی۔ کوئی دوا کوئی علاج کارگر نہیں سی ہو رہیا۔ سیف اللہ باجوہ ہوراں اپنے ایس ویر دی اسراں خدمت کیتی تے دن رات ایہناں دے کول رہے کہ اوپرے لوک سگا بھرا سمجھدے سن۔ ادب قبیلے دے متر خیر خبر لئی آئوندے سن اک دن ویر جی ریاست علی راحت آئے تے جان لگے کجھ پیسے دے گئے۔سیف اللہ باجوہ ہوریں کول بیٹھے سن۔ ریاست دے جان توں بعد ڈاکٹر صاحب روپئے تے باجوہ صاحب نوں آکھن لگے بھاء جی ایس بیماری نے میری لاء کرا چھڈی اے (بھیت کھول دتا اے) اخیر سیف اللہ باجوہ تے شاہ دل شمس ہوراں رل مل کے لہور دے کسے وڈے ہسپتال وچ رسائی حاصل کیتی۔ ڈاکٹر نال گل بات ہوئی۔ ڈاکٹراں چالی لکھ روپیہ منگیا علاج دا۔ دو تن دن وچ ای بھائی علی ناصر تے ہور دوجے متراں دی نس بھج نال پیسیاں دے حصول دا راہ بنیا تے اودھر ایس درویش نے دو جولائی 2019 دی سویر نوں اگلے جہان دی راہ لے گئی۔ انہاں دے جنازے وچ ادب قبیلے دے جنے لوکاں نے رلت کیتی۔ بہت گھٹ ادبی شخصیات دے جنازے وچ شاعراں ادیباں ولوں اسراں بھرویں رلت کیتی گئی ہوویگی۔ ایہ گل انہاں دی ادبی سیوا، بھلے مانسی تے ہر دل عزیزی دا منہ بولدا ثبوت اے۔ معاشرتی ناہمواری بیماری بھُکھ غربت تے اپنیاں دی بے رُخی نال لڑدا ہویا ایہ منکھ جاندا جاندا معاشرے دے منہ تے اک ڈونگھی جھریٹ مار گیا۔ مرتضیٰ حیدر نے فضہ بتول نوں یتیمی دے ویڑھے کلیاں چھڈ کے ٹر جان والا اپنے ایہناں بالا دا کدے وساہ نہیں سی کھاندا۔ متوازن سوچ، انکھ دی پالنا، صلح جو، جی دار، یاراں دا یار، مجمان، دھرتی ماں تے ماں بولی دی سیوا تے راکھی۔ خوش اخلاق، من موہنا انداز تے بیان، ہر دوجے جی نوں عزت تے وڈیائی دینا انہاں دی ذات دے اُگڑویں پکھ سن۔ آپ اپنے چنگے اخلاق تے پنجابی سیوا پاروں چراں تیکر دلاں دعاواں تے محفلاں وچ زندہ رہن گے۔

اپنا تبصرہ گھلو