کورونا وائرس دے بعد جعلی لائسنس، پی آئی اے بحران دا شکار، 45ارب روپے دا نقصان

اسلام آباد: کورونا وائرس دے بعد جعلی لائسنس دا معاملہ، قومی ایئر لائن نوں وڈے نقصان دا ساہمنا، حج آپریشن دی بندش، عمرہ سیزن متاثر ہون تے پی آئی اے فلائٹاں تے یورپی یونین دی پابندی نال قومی ایئر لائن دا مالی خسارے وچ 45ارب روپے ہور ودھ گیا۔ ذرائع دے مطابق حج آپریشن دی بندش، عمرہ سیزن متاثر ہون تے پی آئی اے فلائٹاں تے یورپی یونین دی پابندی نال قومی ایئر لائن دا مالی خسارہ کئی گنا ودھ چکیا اے۔ سعودی عرب توں پروازاں معطل ہون تے 12ارب روپے جد کہ یورپی ایئر سیفٹی ایجنسی دی پابندی توں 33ارب روپے دے نقصان دا خدشہ اے۔ یورپ تے مغربی ملکاں لئی ہفتہ وار 32پروازاں معطل کیتی گئیاں جد کہ قومی ایئر لائن صرف برطانیہ لئی ہفتہ وار 23پروازاں چلا رہی سی۔ ایہناں پروازاں دی معطلی نال مسافراں دی دوجی ایئر لائناں تے منتقل ہون دا خدشہ اے۔ دوجے پاسے پاکستان نے اگلے ہفتے یورپی یونین سیفٹی ایجنسی وچ اپیل دائر کرن دا وی فیصلہ کر لیا۔ چیف ایگزیکٹو پی آئی اے نے ایس سلسلے وچ دفتر خارجہ توں وی مدد منگ لئی اے۔ ذرائع دے مطابق بیرون ملک سفارتخانیاں دے نال بااثر تارکین وطن نوں وی قومی ایئر لائن دے آپریشن دی بحالی لئی متحرک کیتا جائے گا۔