کراچی وچ دہشت گردی دا پائیدار حل

لکھت:قیوم نظامی

پاکستان دنیا دے ایہناں بدقسمت ملکاں وچ شامل اے جنہاں وچ دہشت گردی دی کاروائیاںنال ہزاراں دی تعداد وچ شہری شہید ہوئے تے ارباں ڈالر دا نقصان برداشت کرنا پیا۔بھارت دی ایہہ کھلی تے اعلانیہ پالیسی اے کہ اوہ پاکستان دے اندر علیحدگی پسنداں نوں استعمال کر کے دہشت گردی دی کاروائیاں کرے گا تاں جے پاکستان عدم استحکام دا شکار رہوے۔ بھارت دی ایس پالیسی دا کھلا ثبوت کلبھوشن یادیو اے جس نوں پاکستان دی خفیہ ایجنسیاں نے گرفتار کیتا تے ایس نے اعتراف کیتا کہ اوہ بھارتی فوج دا ریٹائرڈ افسر اے تے بھارت دی خفیہ ایجنسی را، نے اینوں پاکستان دے اندر دہشت گردی دی کاروائیاں نوں منظم بنان لئی ذمے داری دتی سی۔ بھارت دی خفیہ ایجنسی را، دے پاکستان وچ ٹارگٹ خیبر پختونخوا ، بلوچستان تے کراچی نیں۔ بھارت کراچی وچ دہشت گردی دی کاروائیاں لئی الطاف حسین تے ایم کیو ایم نوں استعمال کردا رہیا اے جس دے پکے ثبوت ساہمنے آ چکے نیں۔ کراچی چوں کے پاکستان دی معاشی شہ رگ اے ایس لئی بھارت دی ایہہ ترجیح ہوندی اے کہ اوہ کراچی وچ امن و امان دی صورت حال نوں تشویشناک بنائے رکھے تاکے کراچی دے سرمایہ دار تاجر تے صنعتکار اوتھوں سرمایہ کاری توں گریز کرن تے پاکستان معاشی طور اُتے اپنے قدماں اُتے کھڑا نہ ہو سکے۔ پاک فوج نے دہشت گردی دے خلاف لمبی جنگ لڑی اے۔ عالمی طاقتاں نے پاک فوج دی بے مثال کوششاں نوں سراہیا اے۔ دہشت گردی دے خلاف لمبی جنگ دے دوران پاکستان دے عوام پاک فوج دے نال سیسہ پلائی ہوئی کندھ وانگوں کھلوتے رہے نیں ۔ پاک فوج خفیہ ایجنسیاں تے پلس نے اشتراک نال پیشہ ورانہ فرائض ادا کر کے پاکستان وچ دہشت گردی نوں کافی حد تیکر کنٹرول کر لیا اے۔ کراچی وچ امن قائم ہو چکیا اے تے کاروباری سرگرمیاں تسلسل نال جاری نیں۔ نومبر 2018وچ کراچی وچ چنین دے قونصل خانے اُتے دہشت گردی دی کاروائی نوں سکیورٹی فورسز نے ناکام بنا دتا سی۔ ڈیڑھ ورھے لنگھ جان توں بعد کراچی وچ دہشت گردی دی دوجی کاروائی ہوئی اے جس وچ کراچی دے اسٹاک ایکسچینج نوں نشانہ بنایا گیا تاکے سرمایہ کاراں دے اعتماد نوں متزلزل کیتا جا سکے۔
سکیورٹی گارڈ پلس تے رینجرز نے دہشت گردی دی ایس کاروائی نوں ناکام بنا دتا تے اٹھ منٹ دے اندر سٹاک ایکسچینج اُتے حملا کرن والے 4 دہشت گرد موقعے اُتے ای مارے گئے جنہاں دے کول کافی مقدار وچ خوراک سی جس توں اندازہ ہوندا اے کہ اوہ سٹاک ایکسچینج دے ملازماں نوں یرغمال بنانا چاہندے سن۔ پاکستان دی خفیہ ایجنسیاں نے پہلے ای ایس حملے دی خبر دے رکھی سی۔ دہشت گردی دی کاروائیاں نوں کنٹرول کرن دا کامیاب تے موثر طریقہ ایہو اے کہ دہشت گردی دی کاروائی توں پہلے علم ہو جائے تاکے سکیورٹی ادارے الرٹ ہون۔ بلوچ لبریشن آرمی نے ایس حملے دی ذمے داری قبول کیتی اےتے ایس دے ثبوت وچ سوشل میڈیا اُتے دہشت گرداں دی کجھ ویڈیو جاری کیتیاں نیں جنہاں وچ اوہ دہشت گردی دی تربیت حاصل کردے ہوئے وکھائی دے رہے نیں۔ بلوچ لبریشن آرمی لمبے ورہے توں بلوچستان دی آزادی لئی دہشت گردی دی کاروائیاں وچ مصروف اے جس نوں بھارت دی کھلی امداد تے تعاون حاصل اے۔ پاکستان دی قومی سیاسی جماعتاں نے بلوچستان دی پسماندگی نوں دور کرن تے نوجواناں وچ پائی جان والی محرومی نوں ختم کرن لئی پکے اقدامات نہیں چکے جے وفاق وچ حکومت بنان والی جماعت لئی ہر صوبے توں گھٹو گھٹ 5 فیصد ووٹ لینا لازم قرار دے دتا جائے تے پورے پاکستان وچ برابری دی ترقی ہو سکدی اے تے پاکستان مضبوط تے مستحکم ملک بن سکدا اے۔ اٹھارویں ترمیم دے بعد صوبے کافی حد تیکر خود مختار ہو چکے نیں پر ایس خود مختاری دے اثرات ہجے وی بلوچستان دی سرزمین اُتے وکھائی نہیں آ رہے۔ جے بلوچستان وچ پنجاب وانگوں ڈویلپمنٹ کیتی جاندی تے بلوچ نوجواناں نوں پاکستان دے خلاف ورغلا نہ آسان کم نہ ہوندا۔ بلوچستان دے لیڈر وی ایس سلسلے وچ بھیڑی طرح ناکام ثابت ہوئے نیں۔ اوہناں نے بلوچستان دی تعمیر و ترقی وچ اوہ کردار ادا نہیں کیتا جیہڑا ایہناں دا آئینی فرض سی۔ جے بلوچستان دے ترقیاتی فنڈز بلوچستان وچ لائے جاندے تے اج بلوچستان بوہت مختلف ہوندا۔ بلوچستان دے قومی وسائل نوں جس بے دردی دے نال لٹیا گیا، ایس دا ناقابل تردید ثبوت ایس ویلے ساہمنے آیا جدوں بلوچستان دے صوبائی سیکرٹری خزانہ دے گھر توں ارباں روپئے برآمد ہوئے۔
وزیراعظم پاکستان عمران خان نے پارلیمنٹ وچ خطاب کردے ہوئے کراچی وچ دہشت گردی دے واقعے دی ذمے داری بھارت اُتے پائی اے۔ سلامتی کونسل نے وی کراچی دہشت گردی دی مذمت کیتی اے جیہڑی پاکستان دی خارجہ پالیسی دی کامیاب دا ثبوت اے۔ بھارت نے سلامتی کونسل دے مذمتی بیان نوں رکوان دی بوہت کوشش کیتی پر ایس نوں کامیابی حاصل نہیں ہو سکی۔ کراچی سٹاک ایکسچینج دے اک ہزار ملازماں نے وی بڑی بہادری دا ثبوت دتا تے دہشت گردی دے واقعے توں بعد اوہ اپنے کم اُتے واپس آ گئے۔ دہشت گردی دے واقعیاں اُتے مستقل طور اُتے قابو پان لئی تے ملک وچ امن و امان دے قیام دی خاطر سانوں ہر صورت وچ پلس دے اندر اصلاحات نوں ترجیح دینی پئے گی۔ سیاسی مداخلت نوں مکمل طور اُتے بند کرنا پئے گا۔ پلس دیاں بھرتیاں میرٹ تے صرف میرٹ اُتے کرنیاں پین گیاں تے جدوں پلس عوام دی خادم بن جائے گی تے عوام تے پلس دے وچکار بے اعتمادی وی ختم ہو جائے گی، ایس بے اعتمادی دے ختم ہو جان توں بعد پاکستان دے شہری پلس دے دست راست تے معاون بن سکن گے تے بلاخوف و خطر پلس نوں امن و امان دے سلسلے وچ اطلاعات فراہم کردے رہن گے ۔ امن و امان دے قیام دے سلسلے وچ مقامی حکومتاں ہمیشہ کارگر ہویا کردیاں نیں تے بہتر نظم و نسق چلا سکدیاں نیں۔ لازم اے کہ پاکستان دے ہر شہر وچ بلدیاتی انتخابات کرائے جان تے عوام دے منتخب نمائندے شہراں دا نظم و نسق سنبھالن تے اپنے شہر دے معاملے آپے چلان۔ آئین دا تقاضا وی ایہو اے کہ خود مختار شہری تے ضلعی حکومتاں قائم کیتیاں جان تے ایہناں نوں سیاسی مالی تے انتظامی اختیارات منتقل کیتے جان۔ شہراں دے نظم و نسق نوں بہتر بنان تے امن و امان قائم کرن لئی ایس توں علاوہ ہور کوئی پائیدار حل نہیں۔ خود مختار پلس تے خود مختار مقامی حکومتاں ای پاکستان وچ امن و امان نوں یقینی بنا سکدیاں نیں۔

اپنا تبصرہ گھلو