عمران حکومت دیاں پالیسیاں جگ ہنسائی دا باعث نیں:

انٹرویو: علی عمران چٹھہ

کنول لیاقت ایڈوکیٹ ممبر پنجاب اسمبلی جنرل سیکرٹری ویمن ونگ پاکستان مسلم لیگ (ن) لاہور کارکناں تے قیادت وچ بہت مقبول نے پنجاب اسمبلی وچ اونہاں دا شمار قنون سازی وچ سب تو زیادہ دلچسی لین والے معزز ممبران وچ ہوندا اے۔ قنون سازی دے نال نال او حزب اختلاف ولوں بزدار سرکار دی پالیسیاںاُ تے تنقید دا کوئی موقع نہیں جان دیندیاں ۔اسمبلی دے اندر تے باہر کنول لیاقت پی ٹی آئی سرکار اُتے تابڑ توڑ حملے کرن وچ مشہور نے قیادت دی عدالتاں وچ پیشی دا معاملہ ہوے یا ادویات ،آٹا چینی اشیاء خوردونوش دے مل (قیمت) دے اضافے دے ایشو اُتے عوامی احتجاج او ہمیشہ قیادت دی ہدایت اُتے کارکناں دے نال صف اول وچ ہوندیاں نے۔ اونہاں روزوار بھلیکھا نال قومی سیاست حکومت دی کارکردگی تے بجٹ بارے خصوصی گل بات کیتی ۔رکن پنجاب اسمبلی کنول لیاقت نے کہیا کہ عمران خان حکومت عوام دا اعتماد کھو چکی اے عوام دے حقوق دی بجاے اپنی اے ٹی ایم مافیاز دے کاروبار دا خیال رکھ دے نے اوناں دی خاطر عوام دی جیباںاُ تے ڈاکے مار دے نے ۔اے حکومت خاصاں دے مفادات دا تحفظ تے کرہی رہی ہے لیکن عوام نوں مہنگائی ،لاقانونیت، بے روزگاری تے لوڈشیڈنگ دے تحفے دے رہی ہے عوامی مسائل دا ایہدے کول کوئی حل نہیں اے کٹھ پتلی سرکار ہے ملک وچ اس وقت آئی ایم ایف اور ورلڈ بنک توں درآمد شدہ مشیراں دی حکومت ہے جہیڑے عوام دی بجاے صرف اپنے بیرونی آقاواں دا دھیان کر رہے نے آٹا چینی ادویات اشیاء خوردونوش دی عدم دستیابی تے سکینڈل بارےگل بات کردیاں مسلم لیگ (ن )لاہور شعبہ خواتین دی سیکرٹری جنرل ہوراں دا کہنا سی کہ ساری دنیا جان دی اے کہ وزیراعظم عمران خان نے اپنے دوستاں نوں نوازیا قنون دی سربلندی دے دعوی کرن والیاں نے جہانگیر ترین ، علیم خان، فیصل واوڈا تے وفاقی وزیر خسرو بختیار نوں کیوں نہیں گرفتار کیتا۔ اے رپورٹ حزب اختلاف دے دبائو اُتے بنائی گئی تے میڈیا وچ لیک ہوئی بعد وچوں پی ٹی آئی دے وزیر نے مجبوراََ پبلک کیتی ۔ دنیا جاندی اے کہ نیب نیازی گٹھ جوڑ حزب اختلاف دے خلاف ہے آج تک ایہہ ساڈے قائدین اُتے ایک روپے دی کرپشن ثابت نہیں کرسکے جد کہ اپنے لاڈلے نیب زدہ وزیراں نوں کھل کے کھیڈن دا موقع دیتاہے چیئرمین نیب نوں اپنی نظر چیک کروانی چاہی دی ہے تاکہ اونہاں نوں نیازی حکومت دے کیس وی نظر آون اونہاں آکھیا کہ پی ٹی آئی دی اپنیاں لڑایاں ختم ہون تے او عوام دا کجھ سوچن۔ ہر پی ٹی آئی دا لیڈر وزیراعظم نوں عوام دے مسائل تو گمراہ کر رہیا ہے اے تے سب اچھا دی رپورٹ دے کے ملک و قوم نال دشمنی کر رہیا ہے۔ اوہناں مزید آکھیا ملک قرضیاں دے بھنور وچ ڈُب رہیا ہے ،شرح نمو منفی ہوچکی عوام مہنگائی دے ہتھوں خوار ہو رہے نیں دوجے پاسے حکومت سٹیل ملز پی آئی اے نوں بند کرن اُتے تلی ہے ۔حکومت دیاں پالیسیاں ملک دی جگ ہنسائی داباعث

بن رہیاں نے۔
پنجاب حکومت دی کارکردگی بارے اظہار خیال کردیاں مسلم لیگ دی رکن پنجاب اسمبلی کنول لیاقت ایڈوکیٹ ہوراں آکھیا کہ ملک دا سب توں وڈا صوبہ سردار عثمان بزدار دے حوالے کرکے اس کولوں ن لیگ دی حمایت کرن دا انتقام لیا جارہیا ہے۔ پی ٹی آئی دی سرکار نکمی تے نکھٹو اے ایہناں نوں کیہ پتہ عوام راج کینوں کہندے نیں۔پنجاب دے بجٹ اُتے گل بات کردیاں اوناں آکھیا کہ اے اعداوشمار دا گورکھ دھندا اے بزدار سرکار عوام نوں ریلف دیون وچ مرکز دئ طرح ناکام اے صوبائی دارلحکومت تے وسطی پنجاب بالکل نظر انداز خر دیتے گے نے اوتھے ایک روپیہ دا کم نہیں ہورہیا،سرکاری اسپتال نوں عملے مشینری تے ادویات دی قلت دا سامنا ہے کورونا تے حکومتی کارکردگی نے اس دی قابلیت دا پول کھول دیتا ہے تعلیم دے فروغ دے دعوے دار پی ٹی آئی سرکار نے اساتذہ تے طالبعلماں دا مستقبل تاریک کردیتا اے شہبازشریف دے دور وچ رکھے گئے تعلیمی وظائف لیپ ٹاپ سکیم صرف ساڈا منصوبے ہون دی وجہ تو مکا دیتی گئ اے آج بجٹ وچ یونیورسٹیاں تے کالجاں دی اپ گریڈیشن واسطے پیسے نہئں جنوبی پنجاب دے ناں تے پسندیدہ افراد نوں ترقیاتی فنڈز دے کے نوازایا جارہیا ہے جنوبی پنجاب سیکرٹریٹ دے ناں تے عوام دے مسائل حل کرن تے سرکاری خزانے تے ڈاکے دا پروگرام اے جنوبی پنجاب دی ترقی وچ رکاوٹ اوتھوں دی پی ٹی آئی دی قیادت اے جنہوں جنوبی محاذ دا لبادہ اوڑایا گیا اے ورہیاں توں اے لوگ اقتدار وچ نے لیکن ایناں کچھ نہیں کیتا مسلم لیگ ن دے صدر میاں محمد شہبازشریف نے بطور وزیر اعلی پنجاب اس علاقے وچ کھرباں روپیہ دے عظیم منصوبے مکمل کروائے تے اوتھوں دے لوکاں دا معیار زندگی بلند کیتا۔ ن لیگ دے دور وچ تعلیم صحت تے انفراسٹرکچر دے لاتعداد منصوبے مکمل ہوئے غرباء دے بچیاں واسطے دانش سکول پراجیکٹ پنڈاں وچ سکولاں تے کالجاں دی اپ گریڈیشن نوجوان تے تاجراں نوں قرضے دی فراہمی تے معیشت وچ مثبت اضافے واسطے صنعتی پیداوار وچ اضافہ کیتا گیا اسیں مہنگائی لوڈشیڈنگ دہشت گردی دا خاتمہ کیتا تے بیرون ممالک رہن والے پاکستانی بھیناں بھرواں نوں ائیر پورٹ تے گرین چینل بنا کے عزت و احترام دتا تمام سفارتخانیاں تے ریڈایبل کمپیوٹر پاسپورٹ دا آسان اجرا کیتا جد کہ عمران خان سرکار نے صرف عوام تے دیار غیر وچ رہن والے پاکستانیاں نوں لارا دیکے شوکت خانم دے ناں اُتے رقماں وصولیاں۔ اس ملک و قوم دی حالت بدلن واسطے میاں نواز شریف تے میاں شہباز شریف نے دن رات انتھک محنت کیتی اور محلاتی سازشاں دے باوجود کامیابی حاصل کرکے ن لیگی کارکناں سا سر فخر نال اچا کیتااے۔ حکومت ساڈے قائدین دے شروع کیتے ہوئے منصوبیاں تے اپنے ناواں دیاں تختیاں لاکے عوام نوں گمراہ کر رہے نے لیکن پاکستانی باشعور عوام ہُن جھوٹی تبدیلی سرکار دے کسے وی لارے وچ نہیں آون گے اونہاں دا فیصلہ ہے کہ ایہناں کولوں جان چھڑا کے ملک بچایا جائے۔ اس حکومت نے لوکائی دی زندگی جہنم بنا دیتی اے غربت افلاس تے بھُک توں علاوہ تبدیلی سرکار عوام نوں کجھ نہیں دے سکی تے نا ہی
دے سکدی اے ایہناں دا مشن اپنی کوتاہیاں دا ذمہ دار حزب اختلاف دی قیادت نوں قرار دےکے قومی خزانے تے عیش و عشرت کرنا اے ایہناں کول لوکائی دی سیوا دا کوئی منصوبہ نہیں ۔نیازی نیب گٹھ جوڑ نے احتساب دے ناںاُ تے شریف فیملی نوں ہی زیادہ انتقام دا نشانہ بنایا میاں نواز شریف ،شہبازشریف، حمزہ شہباز تے مریم نواز نے عدالتاں وچ جھوٹے مقدمیاں دا سامنا جواں مردی نال کیتا جیلاں کٹیاں لیکن عوامی مفادات تے سودے بازی نہیں کیتی حمزہ شہباز شریف اج وی مرد آہن ثابت ہورہے نے اوہناں نوں جھکاون دی کوششاں ناکام ہو چکیاں ھن۔ نیب اپنی رہندی سہندی ساکھ بچاون لئ اونہاں نوں جھوٹے مقدمات وچ الجھا رہیا ہے او وقت دور نہیں جد مریم نواز شریف تے حمزہ شہباز شریف میدان عمل وچ ہون گے تے نیازی صاحب دی سرکار دا بستر بوریاں عوام دی مدد نال گول کرن گے بہت جلد علاج معالجہ ختم ہوندے ہی نوازشریف وی عوام وچ ھون گے ۔مسلم لیگ ن لاہور شعبہ خواتین دی سیکرٹری جنرل کنول لیاقت ایڈوکیٹ نے مسلم لیگ اپنے قائد نوازشریف دی قیادت وچ آئندہ الیکشن وچ تاریخی کامیابی حاصل کرکے ملک وچ عوامی خدمت دا نواںدور شروع کرے گی۔

اپنا تبصرہ گھلو