کشمیر اجہی صورتحال توں لنگھ رہیا اے جہدا اختتام آزادی اے: وزیراعظم

مظفر آباد( بھلیکھا ٹی وی )وزیراعظم عمران خان آکھیا اے کشمیر اجہی صورتحال توں لنگھ رہیا اے جہدا اختتام آزادی اے، مودی نوں ہندوتوا دی بنیاد تے پذیرائی ملی، کشمیر دے معاملے تے دنیا دے ٹاپ لیڈرز نال گل کیتی، ڈونلڈ ٹرمپ نوں دسیا کشمیر فلیش پوائنٹ اے۔ آزاد جموں و کشمیر قنون ساز اسمبلی نال وزیراعظم نے خطاب کردیاں آکھیا پاکستان نوں تیزی نال ترقی کردیاں ویکھیا تے تنزلی وی ویکھی، 60دی دہائی وچ دنیا پاکستان دی مثال دیندی سی، اصولاں تے چلن والی قوم ترقی کردی اے، قوم جدوں اصولاں توں ہٹ جاندی اے تے تھلے آ جاندی اے جہڑی صلاحیتاں پاکستانی قوم وچ نیں اوہ کسے ہور وچ نہیں، پاکستان وچ ترقی یافتہ ملک بنن دی بھرپور صلاحیت اے۔ وزیراعظم دا کہنا سی مایوس کدی نہیں ہونا چاہیدا، مودی پچھلے ورھے 5اگست نوں بہت وڈی غلطی کر بیٹھا اے، مودی نے پاکستان دے خلاف نفرت دی بنیاد تے الیکشن جتیا، مودی نے ہندو ازم دی بنیاد تے انتخاب جتیا، بھارت نوں بار بار آکھیا تسیں اک قدم چکو اسیں 2قدم ودھاواں گے، بی جے پی سرکار آن تے مودی دا کشمیریاں تے ظلم ودھ گیا، بھارت دے سارے اقدامات دے پچھے تکبر اے۔ عمران خان آکھیا بھارت غلط فہمی وچ سی 8لکھ فوج گھل کے کشمیریاں نوں دبا لوے گا، مودی سمجھدا سی بھارت وڈی معیشت ہون پاروں دنیا چپ رہوے گی، بھاری اکثریت نال الیکشن جتن تے مودی نے کشمیر دی حیثیت تبدیل کیتی، مودی سمجھدا سی ایس اقدام نال پاکستان چپ رہوے گا، بھارت آر ایس ایس غنڈیاں دے راہیں دہشت پھیلانا چاہندا سی، لیڈر کدی نفرتاں پھیلا کے ووٹ حاصل نہیں کردا۔ وزیراعظم نے 14اگست نوں سید علی گیلانی نوں نشانہ پاکستان دین دا اعلان کردیاں آکھیا 14اگست نوں سید علی گیلانی نوں نشانہ پاکستان دیواں گے۔

اپنا تبصرہ گھلو