سائبان ویلفئیر سوسائٹی دے پربندھ ہیٹھ گوجرانوالہ وچ مشاعرہ

رپورٹ : علی قیصر شاہ

سابق صدر گوجرانوالہ چیمبر تے سکالر جناب سعید احمد تاج دی رہائش گاہ اُتے سائبان ویلفیئر سوسائٹی رجسٹرڈ دے زیر اہتمام ملک دے نامور اینکر، شاعر، جناب سیف اللہ بھٹی د ی صدارت وچ اک محفل مشاعرہ دا انعقاد کیتا گیا ۔ مشاعرے وچ شریک لوکاں دا کہنا سی کہ لاک ڈائون ختم ہوندے ای سائبان ٹیم نے مشاعرے دا اہتمام کر کے نہ شاعراں بلکے شہریاں نوں اک خوشگوار احساس نال مہکا دتا اے۔ سعید احمد تاج نے اپنے ذوق دے مطابق مشاعرے دا انتظام اپنے خوبصورت لان وچ کیتا سی۔

اک پاسے خوبصورت احساسات لئے شعرا کرام تشریف فرما سن تے ایہناں دے سجے کھبے اگے پچھے خوبصورت پھُل، پودے، اپنی خوشبو نال حاضرین محفل دے ساہ مہکا رہے سن ۔ مطلوب حسین مطلوب نے تلاوت قرآن پاک دے بعد مولانا جامی دی نعت کجھ ایس انداز وچ پڑھی کہ سنن والے وجدا جہی کیفیت وچ آ گئے بلکے صدر محفل محفل سیف اللہ بھٹی نے مشاعرہ دے آخر وچ مطلوب حسین مطلوب نال اوہ ای نعت دوبارہ سنن دی فرمائش کر دتی۔عتیق انور راجہ نے اپنے مخصوص انداز وچ نظامت کیتی تے ساہمنے بیٹھے لوکاں نوں اشاعرہ گفتار توں مسلسل محفوظ کردے رہے۔ عتیق انور راجہ نے کہیا کہ ایہناں نوں پہلے دن توں کوشش رہی اے کہ محبتاں ونڈی اے ، ہر تقریب وچ نویں خیالات تے نویں لوکاں نوں شرکت دا موقع دینا اے، تے اسیں جے اک وطن دوست معاشرہ بنانا اے تے سانوں فنون لطیفہ نوں عام کرنا ہوئے گا۔ سائبان دے مشاعریاں وچ وڈی تعداد وچ پنجابی شاعری دا پڑھیا جانا، ایہہ ثابت کردا اے کہ لوک اپنی زبان نال بوہت زیادہ محبت کردے نیں۔ اسیں ایہہ عہد کیتا ہویا اے کہ اپنی دھرتی نال محبت دا حق اپنے قول و فعل نال ادا کردے رہن گے۔ پنجابی زبان ایس مٹی دی زبان اے ایتھے دے لوکاں دی زبان اے صوفیا دی زبان اے یعنی اللہ والیاں دی زبان اے ایس لئی لوکاں دے دلاں نوں فوری متاثر کردی اے۔ اسیں اپنی زبان اپنی ثقافت تے اپنی روایات نوں فخر توں اپنانا اے تے اپنی اگلی نسلاں تیکر ایہہ ورثہ منتقل وی کرنا اے۔
پنجاب و چ پیدا ہوکے پنجاب وچ جوان ہوکے جے اساں نوں تسی پنجابی نہیں بولن دیو گے تے اے تہاڈی بھل اے۔جِناں تسی ایس زبان نال دھرو کرو گے ۔جِناں پنجابی بولی نوں ماڑا بولو گے ۔پنجاب واسی پنجابی بولی نال اوہنی چوکھی محبت کرن لگن گے۔پنجابی ،بابا فرید،سلطان باہھو،بھلے شاہ،میاں محمد بخش تے

وارث شاہ جہے صوفیا ںدی بولی اے۔
صدر مشاعرہ سیف اللہ بھٹی نے کہیا کہ اج اک عرصے توں بعد اوہناں نے سائبان دے مشاعرے وچ شرکت کیتی اے تے ایہناں نوں ایہہ بخوبی احساس ہو رہیا اے کہ ایہہ لوک واقعی محبتاں ونڈن والے لوک نیں۔ مختصر ویلے وچ شہر بھر توں شاعر شرکت ، بہترین انتظامات دا سہرہ سائبان تے جناب سعید احمد تاج دے سر اے۔ سیف اللہ بھٹی پنجابی زبان و ادب دے حوالے نال اک وڈا ناں نیں اوہناں نے خوبصورت کلام سنایا تے خود داد سمیٹی، سعید احمد تاج دے پتر ولید دے ولیمے دے حوالے نال لکھی اک نظم سنائی جس نال سارے چہرے کھل پئے۔ سعید احمد تاج نے فرمایا کہ ٹیم سائبان نال ایہناں دی انج دی دلی وابستگی ہو چکی اے کہ جدوں وی ایہہ لوک مینوں کسے تقریب وچ شرکت دی دعوت دیندے نیں میں اپنی مصروفیات وچوں ویلا کڈ کے ایہناں دیاں محفلاں وچ اپڑ جانا واں کیوں جے ادب والی ایہناں محفلاں وچ شرکت نال مہینیاں دی تھکن لمحیاں وچ لہہ جاندی اے۔مشاعرے وچ شریک شعراء وچ عرفانہ امر،شوکت ڈار،فرحانہ عنبر،سیف اللہ ساجد،رمضان تائب،طارق فیاضی،لیاقت قندیل،امین جان،سعد احمد سعد،وحید احمد انصاری،مطلوب حسین،ارشد راہی تے ڈپٹی غلام عباس شامل سن جد کہ ٹیم سائبان دے چیف آرگنائزرخرم شہزاد بھٹہ، چیئر مین اشرف منہاس سینئر نائب صدر یعقوب انجم، ماہر تعلیم سردار سجاد وڑائچ ، میوٹیویشنل سپیکر سہیل بشیر، پروفیسر ہارون، پروفیسر ڈاکٹر محمد اکرم ورک شامل سن۔