پرچے تے خرچے

Hameed Ullah Bhatti

تحریر :حمیداللہ بھٹی

یہ جو لوک روز آ کے آکھدے نیں کہ ساڈی چوری ہو گئی اے پرچہ کرو، ڈکیتی ہو گئی اے ایس ایچ او نوں پرچہ دین دا حکم دیو، لڑائی وچ زخمی ہوئے نیں، ایہہ رزلٹ اے جیہڑا پلس کاروائی نہیں کر رہی پرچہ کرا دیو، زمیناں تے مکاناں دے وکھرے جھگڑے نیں جنہوں ویکھو پرچہ کران دی خاہش لے کے نسیا چلیا آندا اے، حالاں کے ایہناں نوں اینا پتہ ہونا چاہیدا اے جس ضلعے وچ زیادہ پرچے ہون اوتھے جرائم دی شرح چوکھی سمجھی جاندی اے ایسے لئی میں سب نوں ہدایت کر رکھی اے کہ پرچہ دین توں پہلاں میرے کولوں اجازت لیا کرو بغیر پچھے جیہڑا وی پرچہ دیوے گا مستوجب سزا ہوئے گا بطور ڈی پی او پہلی ای تعیناتی دے دوران جے میرے ضلع وچ پرچے زیادہ ہون گے تے کون مینوں کامیاب آفیسر سمجھے گا ایہہ جیہڑا کجھ قلمکار میرے توں کم لین لئی توصیف و تعریف کردے تے زیب داستان لئی مینوں کرائم فائٹر کہہ جاندے نیں سچ پچھو تے سن کے کناں نوں بوہت بھلا محسوس ہوندا اے ایس لئی کدی کدھار حاصل اختیارات توں زیادہ وی نواز دینا واں تے کدی گھریلو پریشانیاں عود کے آن تے ڈانٹ کے نسا دینا واں گھڑی تولہ گھڑی ماشہ وانگوں دھپ چھاں دا چنگا سفر جاری اے۔
پرچہ درج کرنا سہل کم نہیں کیوں جے اخراج تیکر دے مراحل بوہت پریشان کن ہوندے نیں عدالتاں وچ جانا ، مثل پیش کرنا تے کدی منصفاں دی تندو حُرش گلاں سنن نال تفتیشیاں نوں بچان لئی ای اندراج مقدمہ دا طریقہ کار تبدیل کیتا اے ایس ایچ او، ڈی ایس پی تے ایس پی توں اختیارات لے کے اپنی ذاتی ٹیم نوں دے رکھے نیں جیہڑے فریقین نوں سن کے مینوں مطلع کردے نیں تے فیر جے میرا موڈ خوشگوار ہوئے تے کسے دا بھلا ہو جاندا اے جے نہ ہوئے تے مدعی نوں قانونی کاروائی کران یا ملزم نوں انصاف ملن دی بجائے الٹا لینے دے دینے پئے سکدے نیں۔
مقابلے دا امتحان پاس کرن تے اے ایس پی تعینات ہون دے بعد ایس پی تیکر دے مراحل تیکر دے مراحل توں بوہت تکلیف ہوندے نیں، بیسیوں طرح دی ٹریننگ ہوندی اے ایدھے توں اُودھے جانا پیندا اے بلکے صوبے توں باہر وی تبادلہ ہوندا اے ۔ ٹریننگ دے دوران کء جہاندیدہ آفیسر قانونی موشگافیاں دسدے نیں مشکل حالات نوں ساز گار بنان تے اعصاب اُتے قابو رکھن دے گُر دسدے نیں ایس پی کوئی انج ای نہیں بن جاندا تے ایہہ جیہڑے خرچے دے بغیر ای پرچے کران دی ہوا چل پئی اے ایہہ ٹھیک نہیں سادہ لوح لوک درخواست بازی دے ذریعے اپنا تے ساڈا ویلا ضائع کردے نیں ایہناں نوں چاہیدا اے کہ صاحب اختیار دے پسندیدہ ایس ایچ او نال معاملات طے کر لیا کرن تے انصاف تے قانون دی رفتار تیز ہو جائے گی۔ کمائو پُتر کنہوں عزیز نہیں ہوندا؟ ایسے لئی معاملہ فہم تے حالات دے مطابق نچوڑن دے ہُنر وچ تاک ہر ایس ایچ او اپنے ایس پی نوں بوہت عزیز ہوندا اے پر اک چنگا ایس پی صرف آمدن اُتے ای توجہ نہیں دیندا بلکے فیصلے کردے ہوئے ہر قسم دے دبائو توں بالا تر ہو کے تبادلے کردا اے خیر ہن تے حالات بوہت احتیاط دے متقاضی نیں پر اللہ دا شکر اے اپنی فہم و فراست دے مطابق تبادلیاں دا اختیار اپنے کول رکھن وچ بڑی حد تیکر کامیاب ہون جس لئی انگریزاں دے، توڑو تے حکومت کرو، دا طریقہ کار اپنا رکھیا اے جے کوئی پی ٹی آئی دا رہنما کسے تبادلے دی سفارش کردا اے تے اینوں جواب وچ مسلم لیگ ق دی لیڈر شپ دا منظورِ نظر دس کے ٹال دینا واں تے جے مسلم لیگ ق دی طرفوں کسے تبادلے دا کہیا جائے تے پی ٹی آئی دے کسے اہم رہنما دی سفارش دا ذکر کر دینا واں تے ایہناں دناں اتحادیاں وچ اونج وی فاصلہ اے پر ایس فاصلے نوں ودھان دی میں وی پوری کوشش کیتی اے تے اللہ دا شکر اے کافی کامیاب واں پر جے دونواں جماعتاں دی طرفوں اک ای بندے دی سفارش آ جائے تے آئی جی یا آر پی او دا ناں لین وچ کوئی مضائقہ نہیں سمجھدا ایہہ جیہڑ ااپنے طارق عباس قریشی دا تبادلہ ہویا اے تہانوں سچ دساں ایس وچ میرا وی پورا پورا ہتھ اے، بدگمانیاں ودھان تے ہر کم دا ذمے دار ایہناں نوں ٹھہرا کے میں مقصد حاصل کیتے پر نویں آر پی او دے آن نال کجھ مضطرب واں خیر اللہ مالک اے کوئی نہ کوئی حل کڈ ای لواں گا۔
اک وار بڑی مشکل پیدا ہو گئی مینوں اک بندے نوں بدلن دی اک سیاسی گھرانے توں سفارش آئی ٹالن لئی میں ایسے گھرانے دے اک بندے دا ناں لے بیٹھا جس اُتے خفت چکنی پئی کیوں جے جلدی ای ایہناں دی کال آ گئی تے اوہناں نے میرے نال دریافت کیتا کہ میں نے تاں ایس ناں دے بندے دی کدی سفارش ای نہیں کیتی نہ ای ایس بندے نوں میں جان دا واں جس دے تبادلے دا تسیں مینوں سفارشی کہیا انج مینوں تبادلہ کرنا پیا حالاں کے اوہ کمائو پُتر کافی چنگے تھانے وچ سی ملازمت دے دوران اُنچ نیچ ہوندی رہندی اے میں وی کافی کائیاں واں کمائو پتر نوں جلدی ای نواں تھانہ دے کے راضی کر لیا اے ہن ایہہ ایس اُتے منحصر اے کہ مینوں کنا راضی کردا اے۔
ایتھے لوک بے تُکی گلاں بنان والے بوہت نیں جنہاں وچ کوئی سچائی نہیں ہوندی اک ماہ جبیں نال میرے مراسم سن تے اسکینڈل بنا لیا گیا حالاں کے زندگی دی رفیق سفر ملازمت دی بنا اُتے بیرون ملک ہوئے تے بندہ لڑکھڑا ای جاندا اے کوئی بندہ بشری خامیاں توں پاک تے نہیں ہو سکدا ہن وی کجھ لوک مخصوص قماش دیاں ماہ جبیناں دے گھر آن یا فطرت دے منافی چلن والے چہریاں توں قربت دے الزام لائے جاندے نیں حالاں کے جے ایہہ الزام سچے ہوندے تے جس طرح ایس توں پہلاں اک ماہ جبیں نال اسکینڈل ثابت ہویا سی ہن کیوں جے سب کجھ مخفی اے؟ نیز مینوں شکار دا کافی تجربہ ہو گیا اے ایس لئی بے فکر ہو جان کدی کوئی آئندہ وی کجھ ثابت نہیں کر سکے گا۔
لہور وچ گھر بنانا کنا مشکل اے کسے نوں ایس دی خبر اے؟ اٹاں، بجری، ریت، سریا لگدا اے مستری مزدوراں نوں ادائیگی کرنی پیندی اے تاں جا کے گھر بن دا اے تے لہور جہے شہر وچ تے ایہہ کم بوہت ای اوکھا اے اللہ دا شکر اے کہ گھر تکمیل دے آخری مراحل وچ اے چھت وغیرہ پائی جا چکی اے جس وچ کمائو پتراں نے بوہت ہتھ وٹایا اے اللہ ایہناں نوں اجر دیوے مزید ایہہ کہ میں محکمانہ پٹرول تے گڈیاں دی مرمت وغیرہ دا طریقہ کار اپنے ہتھ کر لیا اے جس نال گھر دی تعمیر وچ مزید سہولت ملی اے بے فکر رہن رائے اعجاز یا رائے ضمیر الحق دی طرح میرے اُتے کیس نہیں بن سکدا کیوں جے میں بوہت محتاط واں تھانہ انچارج پٹرول گھٹ ملن دا خرچہ مدعی تے ملزماں توں پورا کر لیندے نیں جیہڑی بوہت ای غلط حرکت اے ظاہر اے ایہہ گناہ ایہناں دے ذمے اے میرا کوئی لینا دینا نہیں کجھ ایس ایچ او دی پورے مہینے تے کجھ دی داہ پندرہ دیہاڑ دی تنخواہ کٹ کے اپنی دیانتداری قائم رکھن دی کوشش کرنا واں ایس توں علاوہ مزید کوئی سزا دینا میرے وس دی گل نہیں ہن اینی تے تھانہ اچارج نوں سوجھ بوجھ ہونی چاہیدی اے کہ گھر توں لڑ جھگڑ کے دفتر آواں تے میرے اگے پیش ہون توں گریز کرن پر میرے مزاج دا اندازہ کیتے بنا ای منہ اٹھا کے آ جاندے تے تنخواہ کٹوا کے فیر روندے نیں جیہڑا مینوںپسند نہ ہوئے تے جھوٹا کیس بنوا کے معطل کرنا تے ایس پی دے ذریعے سزا دلوان وچ مضائقہ نہیں سمجھدا۔
میں نے سی آئی اے اسٹاف نوں وی ختم کر دتا اے کیوں جے ایہہ میری ضروریات دا اندازہ کیتے بغیر ای گشت دے ناں اُتے کافی پٹرول اُڑا رہے سن دوجا ایہہ کہ ملزمان پھڑن دے گھنائونے کم وچ رلت سن حالاں کے ایہناں نوں ہر تھاں ٹنک اڑان دی لوڑ نہیں سی ایس لئی ایہناں نوں فارغ کر دتا اے کہنں تے پرچے گھٹ کرن لئی سی پی ایل سی دا فعال کر رکھیا اے جیہڑا اک کیس سنن وچ کئی مہینے لگا دیندے نیں تے جے مدعیہ یا ملزمہ خوش شکل خاتون ہوئے تے دل پشوری وچ لگے رہندے نیں ایس طرح مقدمے گھٹ درج کران وچ بوہت مدد مل رہی اے اونج وی نازو داد وکھان والی خوش شکل زنانیاں سب دی کمزوری ہوندیاں نیں ایس لئی سی پی ایل سی والیاں دی دل پشوری اچھنبے دی گل نہیں۔

اپنا تبصرہ گھلو