نجی سکولاں دا 15اگست توں تعلیمی ادارے کھولن دا اعلان حکومتی رٹ نوں چیلنج کرنا اے: سعید غنی

کراچی: صوبائی وزیر تعلیم سعید غنی دا کہنا اے 15اگست توں تعلیمی ادارے کھولن دے نجی سکولاں دی ایسوسی ایشن دا اعلان حکومتی رٹ نوں چیلنج کرن دے مترادف اے۔ صوبائی وزیر سعید غنی نے نجی سکولاں دی ایسوسی ایشنز توں درخواست کیتی اے اوہ وفاقی تے سارے صوبیاں ولوں 15ستمبر نوں تعلیمی ادارے کھولن دے فیصلے تے عمل درآمد کرن، 15اگست توں سکولز کھولن دے نجی سکولز دی ایسوسی ایشن دے اعلان توں بالاں تے والدین وچ شدید بے چینی پائی جا رہی اے، اسیں نجی سکولاں دے مسئلیاں تے پہلاں وی اوہناں دی آواز وفاق تک اپڑا چکے آں تے آئندہ وی اسیں اوہناں دے نال آں۔ وزیر تعلیم سندھ سعید غنی آکھیا وفاق وزیر تعلیم تے سارے صوبیاں دے وزراء تعلیم نے نیشنل کوآرڈینیشن کمیٹی دی میٹنگ وچ سارے صوبیاں دی مشاورت تے ایس کمیٹی وچ شامل ایجوکیشنسٹ تے محکمہ صحت دے ڈاکٹراں تے دوجیاں دی مشاورت دے بعد دیس بھر وچ تعلیمی ادارے 15ستمبر 2020نوں کھولن دے حوالے نال فیصلہ کیتا اے تے ایس سلسلے وچ 7ستمبر نوں ایس کمیٹی دا اک ہور اجلاس وی بلایا گیا اے جہڑا ایس ویلے دی صورتحال دے پیش نظر فیصلہ کرے گی۔

اپنا تبصرہ گھلو