بھارت 500رافیل طیارے وی خرید لوے پاک فوج تیار اے: ڈی جی آئی ایس پی آر

راولپنڈی( بھلیکھا ٹی وی ) ڈی جی آئی ایس پی آر میجر جنرل بابر افتخار آکھیا اے حالیہ عالمی رپورٹ وچ وی بھارت وچ دہشت گرد گروپاں دی نشاندہی کیتی گئی، بھارت نے اندرونی نکامیاں نوں لُکان لئی خطے دا امن داء تے لا دتا۔ راولپنڈی وچ پریس کانفرنس کردیاں ترجمان پاک فوج میجر جنرل بابر افتخار دا کہنا سی آزادی اک بہت وڈی نعمت اے جہدی قدر مقبوضہ کشمیر دی ماواں توں پچھو جہڑیاں پتراں نوں پاکستانی جھنڈے وچ دفن کردیاں نیں، بھارت اک سوچی سمجھی سازش دے تحت کشمیریاں تے ظلم کر رہیا اے۔ عورتاں تے بالاں دی حرمت نوں پامال کیتا جا رہیا اے، مقبوضہ کشمیر وچ انسانی حقوق دی سنگین خلاف ورزیاں ہو رہیاں نیں۔اقوام متحدہ دے مبصر گروپ تے انٹرنیشنل میڈیا نوں مقبوضہ کشمیر وچ جان دی اجازت نہیں۔ ڈی جی آئی ایس پی آر دا کہنا سی کشمیریاں دے خلاف مظالم تے اُٹھن والی آوازاں دنیا بھر وچ گونج رہیاں نیں، انسانی حقوق دی تنظیماں تے انٹرنیشنل میڈیا نے وی بھارتی ظلم و جبر نوں بے نقاب کیتا، بھارت نے لائن آف کنٹرول تے وی معصوم شہریاں نوں نشانہ بنایا، 22جولائی نوں عالمی میڈیا نے آزاد کشمیر دا دورہ کیتا، بھارت ولوں مقبوضہ کشمیر وچ لائن آف کنٹرول تے جان دی اجازت نہیں، لائن آف کنٹرول دے قریب رہائشیاں دے گھراں وچ شلٹرز بنائے جا رہے نیں، آزاد کشمیر دے عوام دا تحفظ ہر طور ممکن بنایا جائے گا۔ترجمان پاک فوج آکھیا حالیہ عالمی رپورٹ وچ وی بھارت وچ دہشت گرد گروپاں دی نشاندہی کیتی گئی، بھارت پاکستان وچ ہون والی دہشت گردی وچ ملوث اے، کراچی سٹاک ایکسچینج حملہ ہووے یا چینی قونصل خانے تے حملہ، سب دے تانے بانے بھارت توں ای ملدے نیں، بھارت اسلحہ خریدن والے ملکاں وچ سرفہرست اے پر جنگاں اسلحے دے زور تے نہیں جتی جاندیاں، بھارت 5دے بجائے 500رافیل طیارے وی خرید لوے افواج پاکستان دشمن نوں ویلے سر جواب دین لئی ہر ویلے چوکس تے تیار نیں۔

اپنا تبصرہ گھلو