اورنج لائن میٹرو ٹرین سروس دا آزمائشی بنیاداں تے آغاز

لہور: پاکستان دی پہلی الیکٹرک ٹرانسپورٹ اورنج لائن میٹرو ٹرین نے اپنے پورے روٹ تے آزمائشی سفر دا آغاز کر دتا اے۔

اورنج لائن میٹرو ٹرین ڈیرہ گجراں توں اپنے منزل علی ٹاؤن ول آزمائشی سفر تے روانہ ہوئی۔ اورنج لائن ٹرین وچ صوبائی وزیر ٹرانسپورٹ جہانزیب خان کھچی، پنجاب حکومت دے خصوصی مشیر ڈاکٹر سلمان شاہ سنے اہم شخصیات سوار سن۔

اورنج لائن میٹرو ٹرین روٹ دے 26سٹیشناں تے 2ہزار توں ودھ پلس افسران تے جوان ڈیوٹی تے تعینات کیتے گئے۔ اورنج ٹرین نوں 3مہینے تک آزمائشی طور تے چلا کے ایہدا مکینیکل ، الیکٹریکل تے بریک سسٹم چیک کیتا جاوے گا تے شہریاں نوں ٹرین تے سفر لئی اجے ہور 3مہینے دا انتظار کرنا پوے گا۔

صوبائی وزیر ٹرانسپورٹ جہانزیب خان کھچی دا ایس حوالے نال کہنا اے اورنج لائن میٹرو ٹرین توں ملتان روڈ تے ٹریفک دا دباء گھٹ ہووے گا، ماحولیاتی آلودگی وچ بتدریج نمایاں کمی آوے گی، اورنج لائن میٹرو ٹرین نوں پاکستان دی پہلی الیکٹرک ٹرانسپورٹ ہون دا اعزاز وی حاصل اے، میٹرو ٹرین پہلی واری پورے روٹ تے بجلی دے ذریعے چلائی جا رہی اے جد کہ اورنج لائن میٹرو ٹرین سی پیک دا مکمل ہون والا پہلا ٹرانسپورٹ منصوبہ اے۔

اپنا تبصرہ گھلو