چور تے ڈاکوواں نوں مسیحا دے روپ وچ پیش نہ کیتا جاوے: فردوس عاشق

اسلام آباد: معاون خصوصی برائے اطلاعات فردوس عاشق اعوان آکھیا اے مفرور قنون نوں مطلوب نیں جہڑے بیرون ملک پاکستان دے قوانین دا مذاق اُڈا رہے نیں، ایہناں چور تے ڈاکوواں نوں مسیحا دے روپ وچ پیش نہ کیتا جاوے۔

سزا یافتہ مجرماں بارے قنون سازی تے غور کر رہے آں۔ وزیر قنون نوں ایس حوالے نال ٹاسک دتا گیا اے۔ وفاقی کابینہ دے اجلاس دے بعد میڈیا نوں بریفنگ وچ فردوس عاشق اعوان دا کہنا سی ایہدے وچ 15مہینے دی حکومتی کارکردگی دا جائزہ لیا گیا۔

کابینہ اجلاس وچ 12نکات پیش کیتے گئے جہناں وچوں 6منظور ہوئے، اک ایجنڈا رد جد کہ دوجیاں تے تفصیلی گل بات ہوئی۔

اوہناں نے دسیا کہ وزیراعظم عمران خان نے ریلیف دین لئی وزارت پانی و بجلی توں بریفنگ لئی۔ وزارت پانی و بجلی نے گردشی قرضیاں بارے آگاہ کیتا۔ لائن لاسز گھٹ کرن تے وزیراعظم نے وزیر توانائی دیاں کوششاں نوں سراہیا۔ ایس موقع تے کابینہ نوں بجلی ٹیرف تے ابہام بارے آگاہ کیتا گیا۔

فردوس عاشق دا کہنا سی وزیراعظم نوں دسیا گیا صنعتاں تے کساناں نوں بجلی دی مد وچ سبسڈی دتی گئی۔ زرعی شعبے نوں 100ارب روپے دی سبسڈی دتی جا رہی اے۔ ایہدے علاوہ بجلی دے 300یونٹ تک دے صارفین نوں 242ارب دی سبسڈی دتی۔

اپنا تبصرہ گھلو