پنجاب دااگلا وزیر اعلیٰ تے گنجے فرشتے ….. مدثر اقبال بٹ

نجاب دااگلا وزیر اعلیٰ تے گنجے فرشتے
چوناں نے ثابت کیتا اے کہ پاکستانی قوم اپنے مستقبل دا چنگا فیصلہ کرن دی صلاحیت رکھ دی اے۔ووٹ دی پرچی نے جتھے تبدیلی دی راہ سوّلی کیتی اے، اوتھے ای ایہہ وی دس دتا اے کہ اسیں کوئی غلام قوم نہیں،ساڈے فیصلے سوچ سمجھ تے شعور دا نتیجہ نیں۔۔۔کئی ورھے حکومتاں کرن والیاں نے جو ایس قوم نال کیتی،قوم نے اوہدا جواب پرچی اُتے مہر لا کے دے دتا۔ہُن دھاندلی دا رولا پاون والیاں نوں ایہہ دھاند لی بیلٹ باکس دی تھاں اپنے ماضی وچ لبھنی چاہیدی اے جیہدے وچ اوہناں عام آدمی دا جینا حرام کیتی رکھیا۔ہُن ایویں رولا پاکے،یا پُٹھے سدھے بیان دے کے اوس ووٹر نوں ورغلایانہیں جا سکدا جیہنے اپنا ووٹ تبدیلی دے ناں کرکے سڑے تے بُسے ہوئے ذہناں نوں رد کیتا۔ایہہ وی درست اے کہ حالے وی اسمبلی وچ آون والیاں دی اک وڈی گنتی اوہناںلوکاں دی ہی اے جیہڑے لمیچِر توں ایس قوم اُتے مسلط نیں،پر اطمینان دی گل ایہہ وے کہ ہُن قیادت تبدیل ہورہی اے۔ہن اوہ لوگ اگے آرہے نیں جیہناں دا دعویٰ اے کہ تبدیلی دا سفر ہمیشہ اُتوں شروع ہوندا اے۔جے اُتے بیٹھا بندہ ایمانداری نال کم کرے گا تے تھلے والیاں نوں کدے وی بے ایمانی دی جرات نہیں ہووے گی۔تے جے اُتے بیٹھے لوک پہلاں اپنا ڈِھڈ بھرن گے تے فیر تھلے والے تاں آپے چور دروازے لبھن گے نا۔پچھلی حکومت دا حال وی ایہو ای سی۔اوہناں جتھے میرٹ دیاں دھجیاں اُڈایاں اوتھے سسٹم دا وی بیڑا غرق کر کے رکھ دتا۔خاص طور تے پنجاب دی بیوروکریسی وچ جونئیر افسراں نو ں جیویں خلافِ ضابطہ ترقیاں دتیاں گئیاں اوہناں نال جیہڑا لائق تے سینئر افسراں دا مورال ڈاؤن ہویا،اوہنے قوم دا وڈا نقصان کیتا اے۔ایسے طرحاں بعض خوشامدیاں تے مراثیاں نوں کدی پی ٹی وی دے دتا،کدی لاہور آرٹس کونسل تے کدی پنجاب دے انفارمیشن ڈپارٹمنٹ نو ں ای اوہناں دے گنجے سر توں وار دین دی کوشش کیتی گئی۔اجیہے مراثیاں تے درباریاں نے میرا،تہاڈاتے ایس قوم دا سرمایہ جونکاں طرحاں چوسیا اے۔ایہنا ں گنجیاں فرشتیاں اک واری فیر کاٹھیاں کس لئیاں نے کہ آون والی حکومت اُتے سوار ہوکے اک واری فیر لٹ مار دا بازار گرم کراں گے۔میری ایہہ گل وی یاد رکھنا کہ ہُن ایہہ گنجے فرشتے آون والی حکومت لئی مشکلاں پیدا کرن دی کوشش تے ضرور کرن گے،پر جے حکومت دی بنیاد اصولاں اُتے ہوئی تے فیر ایہناں لعنتیاں دے متھے،بلکہ ٹنڈاں اُتے کالک ای کالک ہووے گی۔۔۔۔جتھوں تیکر میرے صوبے پنجاب دی سرداری دی گل اے تے یقینی طور اُتے عمران خان ٹھیک فیصلہ کرے گا۔تے جے فیصلہ عبدالعلیم خاں دے حق اندر ہویا تے فیر ایس فیصلے نوں آون والاویلادرست ثابت کرے گا۔میں علیم خان نوں ذاتی حوالے نال جان دا ہاں۔رب نے اوہنوں دوجیاں دا دُکھ درد ونڈن دا حوصلہ دتا اے۔پنجاب وچ اوہدی پچھان اک سوشل ورکر دی اے۔اوہنے ہمیشہ عام آدمی دی بانہہ پھڑی۔۔۔۔سیاسی حوالے نال ویکھیے تے ایہہ علیم خان ای اے جیہنے نواز لیگ دے مضبوط قلعے اُتے تحریک انصاف دا جھنڈا گڈیا اے۔اوہ محنتی سیاسی کارکن اے تے گلی محلے وچ نظر آوندا اے۔اوہ ڈرائینگ روم پالیٹکس دا قائل نہیں،اوہدی سٹرینتھ عام تے غریب آدمی نال مسلسل رابطہ اے۔ جے پنجاب دی گدی اوہنوں مل گئی تے فیر اوہ ایہدا مان ہر قیمت اُتے رکھے گا۔میں علیم خان توں ایہہ امید وی کرنا ہاں کہ اوہ ایہناں گنجیاں فرشتیاں تے مراثیاں توں لُٹ مار دا حساب لین دے نال نال ہر کم میرٹ اُتے کرن  دی روایت نوں مضبوط بنائے گا۔پنجاب دی پگ اَنکھ تے غیرت دی علامت اے،میرے ولوں اپنے پنجاب دے آون والے وزیر اعلیٰ نوں رَج مبارکاںتے دُعاواں۔