بے نامی اکاؤنٹ تے خان صاحب قوم نوں کیہ جواب دین گے؟ احسن اقبال

اسلام آباد: لیگی رہنما احسن اقبال آکھیا اے ارباں دی خورد برد ناقابل معافی جرم، حکومت سوچی سمجھی سازش دے ذریعے الیکشن کمیشن نوں کم توں روکدی رہی، جے سب ٹھیک اے تے فیر رازداری کہڑی گل دی اے؟ مسلم لیگ (ن) دے رہنما احسن اقبال نے پریس کانفرنس کردیاں الزام لاگو کیتا تحریک انصاف نے الیکشن کمیشن دے ساہمنے اپنے 23اکاؤنٹ ڈکلیئر نہیں کیتے۔

قوم عمران خان توں ایہناں دا حساب منگ رہی اے۔ بے نامی اکاؤنٹ تے خان صاحب قوم نوں کیہ جواب دین گے؟ قوم نوں دسیا جاوے بھارت، امریکا تے مشرق وسطیٰ وچ کس کس نے فنڈنگ کیتی؟ قوم جاننا چاہندی اے 23اکاؤنٹ کیوں لُکائے گئے؟ نویں پاکستان دے ناں تے اوورسیز پاکستانیاں توں ڈونیشن لئی گئی، ایہناں نوں کیویں استعمال کیتا گیا؟ احسن اقبال آکھیا ارباں روپے دی خورد برد ناقابل معافی جرم اے۔

عمران خان نوں ایہدا حساب دینا پوے گا۔ تحریک انصاف دے پرائیویٹ اکاؤنٹ وچ ملین ڈالر دی ترسیلات ہوئیاں نیں پر عدالت وچ جا کے کہندے نیں ایہناں اکاؤنٹ دی کسے قسم دی میدیا کوریج نہیں ہونی چاہیدی۔ سارے اکاؤنٹ ٹھیک نیں تے سماعت نوں خفیہ رکھن لئی درخواست کیوں دیندے نیں؟

اپنا تبصرہ گھلو