مدثر اقبال بٹ دیاں پنجابی زبان لئی خدمتاں سلاہن جوگ نیں،دھرم سنگھ گورائیہ

(رپورٹ:اعظم توقیر) پنجاب چڑھدا ہووے یا لہنداپنجابی اک دُوجے نال بھراواں والا پیار ای کردے نیں ۔پاکستانوں کوئی جتھا بھارتی پنجاب جاوے تے ساڈے سِکھ بھرا اَگے ودھ کے جی آیاں نوں آکھدے نیں ،اوتھے جا کے انج ای لگدا اے جویں اسیں اپنی ای مٹی تے ٹردے پھرنے آں ۔چڑھدے پنجاب وچ وی جا کے سانوں کوئی شئے اوبھڑ نہیں لگدی۔ انج ای جدوں چڑھدے پنجاب وچوں پروہنے ساڈے کول آئوندے نیں سانوں وی چا چڑھ جاندا اے ۔جتھے تیکر ہو سکے اسیں وی اپنے وِچھڑے ہوئے پنجاب توں آ ئون والے پروہنیاں دی رج کے آئو بھگت تے سیوا کردے آں۔مشہور لکھاری دھرم سنگھ گورایہ پشلے کئی ورھیاں توں پاکستان آرہے نیں ۔پنڈی بھٹیاں نال جڑت اوہناں نوں ہمیشہ ایتھے آن لئی کھچدی اے ایہ ای وجہ اے جے اوہناں پنڈی بھٹیاں دے سپوت دُلا بھٹی تے کتاب لکھی۔اوہناں دیاں
دوجیاں چھپیاں کتاباں وچ جگا سورما،پنجاب توں پنجاب تک،چی گوریرا تے تیجا سنگھ ستنتر شامل نیں ۔جد کہ اج کل اوہ پنجاب دے ہیرو رائے احمد خاں کھرل دی حیاتی ا تے کم کررہے نیں ۔ایسے پاروں اوہ اج کل پاکستان وچ نیں ۔بڑے نگھے تے پیارے جی دھرم سنگھ گورایہ نوں منے پرمنے لکھاری پروفیسر اسد سلیم شیخ تے پروفیسر اصغر علی چشتی ہوریں واہگے توں لے کے مشہور شاعر بابے نجمی دی ہسپتال وچ عیادت توں بعد روزانہ بھلیکھا دے دفتر (پنجاب ہائوس )لے کے اپڑے۔جتھے چیئرمین پنجابی یونین تے پنجاب ہائوس مدثر اقبال بٹ،بلال مدثر بٹ،ندیم رضا،قاضی طارق عزیز،اعظم توقیر ،رضوا ن بٹ تے آصف رضا اوہناں نوں اُڈیک رہے سن۔بھلیکا دفتر آن اتے بھلیکھا دی ساری ٹیم نے رل کے اوہناں نوں جی آیاں نوں آکھیا۔چاہ پانی مگروں دھرم سنگھ نال چڑھدے تے لہندے پنجاب دی ثقافت تے ادب بارے ڈھیر گل بات ہوئی فیر چیئرمین پنجابی یونین مدثر اقبال بٹ ہوراں دھرم سنگھ نوں پنجابی یونین تے بھلیکھا دے وکھو وَکھ شعبیاں وچ کم کار بارے دسیا تے دفتر دا وزٹ کرایانالے بابا فرید بک فائونڈیشن ولوں چھپیاں کتاباں وی پیش کیتیاں۔ایس موقعے تے دھرم سنگھ گورایہ نے مدثر اقبال بٹ تے بھلیکھا دی ساری ٹیم دا شکریہ ادا کیتا تے آکھیا بھلیکھا تے پنجابی یونین پنجابی زبان لئی جنا کم کررہے نیں ایہ کسے دوجے دے وس دا روگ نہیں۔ مدثر اقبال بٹ دیاں پنجابی زبان لئی خدمتاں سلاہن جوگ نیں ۔ایس لئی میں مدثر اقبال بٹ ہوراں نوں ودھائی پیش کرنا واں ۔دھرم سنگھ گورایہ ہوراں دوجی واری بھلیکھا آن دا وعدہ کرکے جان دی اجازت منگی تے بھلیکھا دی ساری ٹیم نے اوہناں نوں ودعیا کیتا۔