شوہر نے 4ورھے گھر وچ قید رکھیا: کومل رضوی

کراچی: معروف پاکستانی اداکارہ و گلوکارہ تے بزنس وومن کومل رضوی نے اپنی نکام شادی تے شوہر دے ظلم بارے دسدیاں آکھیا اے اوہ 4ورھے تک گھر وچ قید رہیاں سن۔ کومل رضوی تے شعیب ملک ندا یاسر دے شو ”شان سحور” وچ شریک ہوئے جتھے کومل رضوی نے پہلی وار اپنی نکام شادی بارے گل کیتی۔ کومل رضوی نے دسیا کہ اوہ شادی دے بعد اومان چلی گئیاں سن تے اوتھے اوہناں دا شوہر نہ صرف اوہناں تے ظلم کردا سی بلکہ مارکٹائی وی کردا سی۔کومل رضوی نے دسیا کہ اوہناں دا شوہر ذہنی طور تے بیمار سی تے اوہناں نوں پیسے وی نہیں دیندا سی جہدی وجہ توں اوہ کئی مہینے بھکھے پیٹ وی سو جاندیاں سن۔ کومل نے آکھیا میں شادی دے بعد اومان گئی میرے شوہر مینوں اوتھے ورکنگ ویزا نہیں دیندے سن۔ ڈرائیونگ لائسنس نہیں دیندے سن میں گھر وچ قید سی چار ورھے۔ گلوکارہ کومل رضوی نے ہور دسیا میں اپنا خرچ پورا کرن لئی ٹیوشنز پڑھاندی سی۔ کیوں جے مینوں ہور کوئی کم نہیں آندا سی تے فیر میں کھانا پکانا سکھیا تے سٹواں وچ جا کے فروخت کرنا شروع کر دتا۔ کومل نے آکھیا میرے شوہر نے میرے اُتے ہتھ وی چکیا ۔