مینوں دھمکیاں مل رہیاں نیں کہ ‘زندگی تماشا’ ریلیز نہ کراں: سرمد کھوسٹ

لہور: ایکٹر، پروڈیوسر، ڈائریکٹر سرمد سلطان کھوست نے پچھلے دیہاڑ اک ٹویٹ وچ لکھیا اے اوہناں نوں فون تے درجناں دھمکیاں تے میسجز موصول ہو رہے نیں، ‘تے کیہ میں زندگی تماشا نوں ریلیز نہ کراں؟’ اوہناں نے مداحواں توں سوال کیتا۔

واضح رہوے سرمد کھوسٹ دی نویں فلم ‘زندگی تماشا’ دی وکھو وکھ عالمی میلیاں وچ خاصی پذیرائی مل چکی اے پر ایہنوں 24جنوری 2020دے دیہاڑ پاکستانی سینما گھراں وچ نمائش لئی پیش کیتا جاوے گا۔

پر بعض حلقیاں نوں اعتراض اے کہ ایس فلم وچ شعائر اسلام د امذاق اڈایا گیا اے تے مذہب اسلام نوں تضحیک دا نشانہ بنایا گیا اے۔ اپنی تازہ ٹویٹ دے نال ای سرمد کھوسٹ نے ‘میرے پیارے پاکستان تے پاکستانیاں دے ناں کھلا پیغام’ دے عنوان نال اک خط وی منسلک کیتا اے جہڑا انگریزی وچ اے تے چارورقیاں تے مشتمل اے۔

ایس خط وچ اوہناں نے وضاحت کیتی اے کہ ‘زندگی تماشا’ وچ اجیہا کجھ نہیں جہنوں مذہبی، سیاسی یاں کسے وی دوجے سماجی اعتبار نال قابل اعتراض قرار دتا جا سکے۔

‘جے داڑھی والے کسے بندے نوں عموماً مولوی آکھیا جاوے تے ایہ فلم اک ‘چنگے مولوی’ دے بارے وچ اے۔

‘ سرمد کھوسٹ نے اپنے خط وچ لکھیا اوہ ایس توں پہلاں وی پاکستانی صدر تے وزیراعظم توں اپیل کر چکے نیں کہ اوہناں نوں ملن والی دھمکیاں دا نوٹس لیا جاوے پر ایس بارے حکومت ولوں ہن تک کسے قسم دی کوئی کاروائی عمل وچ نہیں لیائی گئی اے۔