بھارتی فلماں دی اک واری فیر نمائش

پاکستان تے بھارت وچ کجھ تلخیاں ودھیاں تے بھارتی حکومت نے پاکستانی فنکاراں اتے پابندی لا دتی سی جہدے تے پاکستان نے ردعمل دیندے ہوئے اوہناں دی پاکستان وچ مسلسل ریلیز ہون والی فلماں نوں روک دتا سی جہدا دونواں ملکاں نوں ای نقصان ہویا۔ فیر کورونا وبا نے سر چک لیا تے لاک ڈائون پاروں نہ صرف عام لوکی اپنے گھراں تک محدود ہو گئے بلکہ کورونا وائرس دے پھیلائو توں پیدا ہون والی صورتحال مگروں فلمی ستارے’ گلوکار تے شوبز دی دوجی شخصیات وی سماجی فاصلہ رکھن تے مجبور ہو گئیاں سن۔ فیر لائیو ویڈیو چیٹ نے سرحداں دا فاصلہ مٹایا تے سوشل میڈیا صارفین دونواں ملکاں دے فنکاراں دی آپس دی گل بات ویکھن تے سنن لگے۔ ہن کشیدگی دی فضا جیویں گھٹ ہو رہی ہووے’ آئے دن پاکستان تے انڈیا دے فنکار عام شہریاں وانگوں باہمی دلچسپی دے امور اتے تبادلہ خیال کر کے اپنے اوہناں مداحواں دا دل بہلاندے نیں جہڑے سوشل میڈیا تے ہون لیکن انڈیا وچ فلمی صنعت دی اک تنظیم ایس گل توں خوش نہیں کہ انڈیا وچ شوبز دی شخصیات پاکستانیاں دے نال خوش گپیاں وچ مصروف ہون تے اوہناں نے ایہدے خلاف انڈین فنکاراں نوں متنبہ وی کیتا سی۔ انڈیا وچ فلم انڈسٹری دی صنعت نال جڑے بندیاں دی نمائندہ تنظیم ”فیڈریشن آف ویسٹرن انڈیا ایمپلائز” ولوں ملک دے سارے موسیقاراں’ گلوکاراں’ فنکاراں تے تکنیکی شعبے نال جڑے بندیاں لئی ”تنبیہہ” جاری کیتی سی جہدی وجہ نال بہت سارے فنکار وی سہم گئے سن۔ اوہدے وچ آکھیا گیا سی کہ ”تنظیم دی پاکستان وچ شوبز نال جڑے بندیاں دے نال کسے وی طور کم نہ کرن دی ہدایات دا علم ہون دے باوجود کجھ ارکان پاکستان دے گلوکاراں تے فنکاراں دے نال کم جاری رکھے ہوئے نیں۔ اوہناں نوں پاکستان دے گلوکار راحت فتح علی خان دے نال انڈیا دی انٹرٹینمنٹ انڈسٹری دے بندیاں دے نال رل کے آن لائن کنسرٹ کرن دا علم ہویا تے ایہہ وی پتہ چلیا کہ مستقبل وچ اوس کم نوں ودھان دی منصوبہ بندی وی کیتی گئی اے جو کہ تنظیم دی ہدایات دے خلاف نیں۔ انڈین میڈیا دے مطابق تنظیم ولوں ایہہ تنبیہ انڈین فیشن ڈیزائنر وجے اروڑہ تے انڈیا دی صوفی گلوکارہ ہرش دیپ کور دے پاکستانی گلوکار راحت فتح علی خان دے مشترکہ آن لائن کنسرٹ مگروں سامنے آئی۔ تاہم ایس تنبیہ دے اثرات اوہناں سرگرمیاں اتے وی پئے جہڑے پاکستان تے انڈیا دے عوام نوں سماجی رابطیاں دے ذریعے وبا دے ماحول وچ انسانی ہمدردی دی بنیاد تے جاری سن۔ پاکستان وچ سماجی تے انسانی حقوق لئی کام کرن والی اک غیر سرکاری تنظیم ولوں لیٹس ٹاک دا اک سلسلہ شروع کیتا گیا جہدے وچ آن لائن براہ راست گل بات دے سیشنز ترتیب دتے گئے سن۔
کدی کوئی پاکستانی فنکارہ بھارتی فنکار دی تعریف کر رہی ہوندی اے تے کدی بھارتی فنکارہ نوں پاکستانیاں دی محبت کھائے جا رہی ہوندی اے تے سوشل میڈیا تے ایہہ سلسلہ روزانہ چلدا اے بلکہ ہن تے اک ہور پیشرفت ہوئی اے کہ پاکستانی فنکاراں دے نال انڈین پنجابی کامیڈی فلماں پاکستان وچ ریلیز ہونا شروع ہوئیاں تے چھا گئیاں۔ ہن ایس توں اک قدم ہور اگے ودھیا تے بھارتی پنجابی فلم ”قسمت ٹو” وی ریلیز کردتی گئی جہڑی شاندار بزنس کر رہی اے۔ بھارتی پنجاب تے پاکستانی فنکاراں دی مشترکہ فلماں نے پاکستانی سینما گھراں وچ دھاک بٹھا رکھی اے۔ فلمی شائقین دی وڈی تعداد ایس مشترکہ کاوش نوں ویکھن لئی سینما دا رخ کر رہی اے۔ مزاح نال اصلاحی پیغاماںنال سجی ایہہ فلماں شائقین دے دلاں وچ گھر کر رہیاں نیں۔ کجھ دناں پہلے اداکار افتخار ٹھاکر’ ارمیندر گل دی فلم ”چل میرا پت ٹو” سینما گھراں دی زینت بنی جہنے اک مہینے وچ پنج کروڑ توں ودھ دا بزنس کیتا سی تے ہن تک زیر نمائش اے۔ ایس دے علاوہ فلم ”حوصلہ رکھ’ پانی وچ مدھانی” جئی فلماں نوں وی سینما گھراں وچ نمائش لئی پیش کیتا گیا سی تے آن والے مہینے ”چل میرا پت تھری” نوں وی ملک بھر دے سینما گھراں وچ نمائش لئی پیش کردتا جاوے گا۔
اک ہور پاکستانی تے بھارتی پنجاب دے فنکاراں اتے مشتمل فلم ”آجا میکسیکو چلئے” نوں سینما گھراں وچ ریلیز کیتا جا چکیا اے۔ ایس حوالے نال لہور وچ بھارتی پنجابی فلم دے رنگا رنگ پریمیئر دا انعقاد وی ہویا۔ غیر قنونی طریقے نال بیرون ملک جان دے خواہشمند بندیاں اتے بنن والی ایس بھارتی پنجای فلم وچ پاکستانی اداکار ناصر چنیوٹی تے ظفری خان شامل نیں۔ ناصر چنیوٹی نے میڈیا نوں دسیا کہ فلم بنا کے دونویں پنجاب دے فنکاراں نے محبت دا پیغام دتا اے۔
ایس طرح دی بہترین پروڈکشن وچ تیار ہون والی فلماں وچ مزاح دے نال اصلاحی پیغام وی شامل نیں جیویں کہ ایس فلم وچ غیر قنونی طور تے امریکہ میکسیکو وچ داخلے نوں وکھایا گیا اے۔ ایس دے علاوہ ہن خالصتاً بھارتی پنجابی فلم ”قسمت2” وچ سارے فنکار بھارتی نیں۔ پچھلے دناں پاکستانی سینمیاں دی زینت بنی اے جہدے توں پاکستانی سینمیاں دی رونقاں واقعی بحال ہوندی وکھائی دے رہیاں نیں۔ ایہہ فلم لہور دے سینما وچ پریمیئر شو مگروں عام فلمی شائقین لئی سینماواں وچ ریلیز کیتی گئی اے جہدا سینمیاں اتے رش لگیا ہویا اے تے اوہدی کمائی دا گراف باقی فلماں توں کافی اتے جا رہیا اے یاں اوہدے بزنس دا اندازہ تے ویک اینڈ تے ای پتہ ہووے گا تاہم ایس فلم نوں کامیڈی تے رومانس دے نال جذبیاں دا مکسچر قرار دتا جا رہیا اے۔ ایس فلم نوں ڈسٹری بیوشن کلب نے ریلیز کیتا اے۔ ایہدے توں ایس گل نوں وی تقویت ملدی اے کہ پاکستانی حکومت نے بھارتی فلماں اتے پالیسی نرم کردتی اے تے ایسے وجہ نال ایہہ فلم ریلیز ہو سکی جہڑا کہ پاکستانی سینما تے پاکستانی فلم انڈسٹری وچ ہلچل مچان لئی چنگا شگون خیال کیتا جا رہیا اے۔ پورے پاکستان وچ ریلیز ہون والی ایس فلم دی سٹار کاسٹ وچ ایمی ورک تے سرگن مہتا نے مرکزی کردار نبھایا اے جہڑا ایس توں پہلے شہرہ آفاق’ پنجابی فلم ”انگریج” سنے دوجی فلماں وچ وی اکٹھے جلوہ گر ہو چکے نیں۔ فلم دی کہانی طنزو مزاح تے رومانس نال بھرویں اے تے ایہدی عکس بندی پنجاب دے نال یورپ دی خوب صورت لوکیشناں اتے کیتی گئی اے۔ ڈسٹری بیوشن کلب دے ایگزیکٹو ڈائریکٹر عابد رشید شیخ نے دسیا کہ اوہ فلم شائقین نوں معیاری تفریح فراہم کرن لئی ہمیشہ مصروف عمل رہندے نیں تے ”قسمت2” ایس سلسلے دی کڑی اے۔ اوہناں نے دسیا کہ ”قسمت2” دا بزنس ہن تک دی ریلیز ہون والی پنجابی فلماں وچ سب توں ودھ جا رہیا اے۔