آکھن لو ک سیانے

بھاؤندے دا ہر کم بھاوے’ نہ بھاؤندے دا کُجھ نہ بھاوے
معنے: بھاؤندے :چنگا لگن والے۔
ویروا: ایس اکھان وِچ مت دِتی گئی اے پئی جو بندہ اگلے نُوں چنگا لگدا ہووے اوسدی ہر کؤڑی کسَیلی گل وی جر لئی دی اے اتے اوسدی بھیڑی گل تے وی گِلہ نہیں آؤندا پر جو دِلوں چنگا نہ لگدا ہووے اوس دی ماڑی گل موٹی گل وی چوکھی چُبھدی اے ۔
بھاہ تے پانی دے ہتھ پَیر نہیں ہوندے
معنے: بھاہ: اگ۔
ویروا:مت دِتی گئی اے پئی اگ اتے پانی توں بندے نُوں آپوں ہِمت کرکے بچنا چاہیدا اے ایس لئی پئی اوہناندے ہتھ پَیر کوئی نہیں ہوندے جِتھوں اوہناں نُوں قابوُ کیتا جا سکے۔اوہ تاں جدوں مچھرے ہون کِسے دا لحاظ نہیں کردے۔
بھاہ تے کپاہ دا وَیر اے.
معنے: وَیر: دُشمنی۔
ویروا:مت دِتی گئی اے پئی ہوندے چارے کپاہ نُوں اگ توں دوُر رکھنا چاہیدا اے۔ پر جے کِتے کپاہ نُوں کِتے رب نہ کرے اگ لگ جاوے تاں اوہ ہائیں مائیں بُجھن ول نہیں آؤندی۔ایس لئی کپاہ توں سدا اگ دور ای رکھنی چاہیدی اے۔
بھاہ تے کپاہ ہون اکٹھے ‘ بلن کیکن نہ
معنے: بھاہ: اگ٭بلن:جلن’ اگ لگے۔
ویروا: ایس اکھان وِچ مت دِتی گئی اے پئی کپاہ اتے اگ نُوں ہوندے چارے سدا ای اِک دُوجے توں دور رکھنا چاہیدا اے اتے جے کپاہ نُوں اگ لگ جاوے تاں اوس دا بُجھاون چوکھا ای اؤکھا کم ہوندا اے۔
بھاہ کُوں بھاہ مریندی اے
معنے:کُوں: نُوں٭ مریندی: ماردی اے۔
ویروا:مت دِتی گئی اے پئی گرم شَے دے اثر نُوں مکان لئی وی کوئی گرم شَے ای کھانی پَیندی اے۔اِنج گرم شے دے بُرے اثر نُوں وی گرم شے ای مُکاندی اے۔٭٭