آکھن لوک سیانے

پاہے دا راج’ پُتر دی متھاج
معنے:پاہے: بیگانے٭ متھاج: مُحتاج’ ادھین۔
ویروا:مت دِتی گئی اے پئی جدوں گھر دا سارا کم کاج کرکے اتے کما کے تاں خاوند لیاؤندا ہووے تاں ماں نُوں اپنے پُتر دی مُحتاج بن کے رہن دی کیہ لوڑ ہوندی اے۔جدوں اوہدا خاوند اوہدے سِر تے ہے وے تاں ہور کِسے دا ادھین بنن دی کیہ لوڑ۔
پپاں کھُنباں ‘ ڈھائی دیہاڑے راج
معنے: پپاں کھُنباں: ساون مہینے مینہ نال اُگن والیاں بوٹیاں۔
ویروا:مت دِتی گئی اے پئی پپاں اتے کھُنباں جدوں ساون مہینے مینہ پین پاروں اُگ دِیاں نیں تاں جھبدے ای دیہاڑی دُونہ وِچ ای زمِین تے چھتری تان لَیندِیاں نیں پر اوہناں دی زِندگی بس دو چار دِن ای ہوندی اے۔اوس مگروں اوتھے ای سؤں جاندیاں نیں۔
پت پریت’ کھری نیت
معنے:پت پریت: عِزت اتے محبت٭ کھری: صاف۔
ویروا:مت دِتی گئی اے پئی بندے نُوں جے اپنی عِزت اتے مُحبت بچائی رکھن دا شؤق ہووے تاں اوس نُوں اپنی نِیت ہمیشہ صاف رکھنی چاہیدی اے۔ات ہر اِک نال سُدھ ویہار رکھنا چاہیدا اے تاں جو کوئی اوس ول اُنگل نہ کرے۔
پت جے چاہویں اپنی’ پانی منگ نہ پی
معنے: پت: عِزت’ آدر۔
ویروا:مت دِتی گئی اے پئی بندے نُوں اپنا ہر کم اپنے ہتھاں نال کرنا چاہیدا۔ اتے جے اوہ کِسے کولوں پانی وی منگ کے پی لوے گا تاں اوس دی اوہ عِزت نہیں رہوے گی۔اتے اگلا کدی کدایں اوس پانیدا وی اوس نُوں مہنا مار سکدا اے۔
پُتر بنا کے ہر کَیں کھویندے’پیو بنا کے کوئی نہیں کھویندا.
معنے: ہر کَیں: ہر کوئی’ سارے ای
ویروا:مت دِتی گئی اے پئی جگ دے لوک لوکاں نُوں پُتر تاں بنا لیندے نیں پئی کل کلوتر نُوں کمائی کر کے لیاؤن گے اتے بانہ بیلی بنن گے۔ پر کِسے وڈھیرے نُوں کوئی پیو بنا کے اوس دی خِدمت گھٹ ای کردا اے۔اوس کولوں کوئی لاہا تاں ہونا نہیں ہوندا۔اُنج وی کِسے نُوں اپنی ماں دا خسم کؤن بنائے۔٭