ناول

Ali anwar Ahamed

شفیا بھجُو سی پر فیر اوہنوں سیہان کے کھلو گیا۔ موجاں نسن بھجن دی حالت وچ اُکا نہیں سی۔
معراج دین کملا سی۔ سیانا ہوندا تاں حصے بخرے دی گل کردا تے اوہنوں وی شاید کِنو دی اِک ادھی پھاڑی مل جاندی۔ عورت نوں ورتن دی ساجھے داری اودوں وی ہوندی سی تے ہُن وی کئی لوک انج کردے نیں۔
آکھیا جاندا اے اودوں جہڑے بندے نے اپنے بیلی دی ”دعوت” کرنی ہوندی سی اوہ اوہنوں اوس کماد’ چری یاں جوار دی دس پا کے جاندا سی جتھے اوہنے اپنی سجن نوں ملنا ہوندا سی۔ بعد وچ مناسب کُو وقفے پچھوں بیلی ”آوا گھت” اوہناں دے اُتے جا وجدا سی تے راز نوں راز رکھن دی قیمت وصول کرلیندا سی۔
مرد ہمیشا اِنج ای عورتاں دا استحصال کردے آئے نیں۔
تِن چار جنیاں دا عورت دی رضامندی نال… یاں فیر بدوبدی گینگ ریپ والا سلسلا بہت بعد وچ شروع ہویا۔ مجھا چاہندا تاں گل اوتھے وی نپ سکدا سی۔
مرد سوئی جو ویکھ دم گھُٹ جائے تے
بھیت دسنا مرد دا کم ناہیں
ایہ بڑا اوکھا کم اے ۔ موجاں دے نال پھڑے گئے شفیع ماچھی نے مجھّے دی مِنت وی کیتی تے ترلا وی لیا پراوہنوں صرف اینا کُو فایدا ہویا کہ مجھّے نے اوس ویلے رولا نہیں پایا تے اوہنوں جاون دِتا۔
راز تے فیر ایہو جہیا راز لُکانا بہت اوکھا اے۔ ڈِھڈ وچ اُٹھدی سُول نوں اوس ویلے تیکر ارام ای نہیں آندا جد تیکر کسے نوں ایہو جہی گل دس نہ دِتی جاوے۔
مجھّے وی ایہ رازکُجھ دِن بعد دس دِتا۔
رب سببی ای اوہدے کولوں سیانف ہو گئی یاں کمّی ہون کرکے اوہنے اپنے آپ وچ اینی جرئت نہ ویکھی کہ سِدھا ساواں فرمایش علی نوں دَسدا۔ شاید اوہنوں ڈر سی کہ گل پُٹھی وی پے سکدی اے۔ ایہو جہے سچ پُٹھے پیندے ویکھے گئے نیں۔
مَجھّے نے فرمایش دے چاچے دے پُتر قایم دین اگے ساری گل کھول کے اپنے ذہن دا بھار لاہیا۔ ایہ حوصلا اوہنے ایس پاروں کیتا کہ قایمے نال اوہدا یارانا سی۔
قایمے کولوں اوہنے قسم لئی کہ اوہ اوہدا ناں نہیں دسے گا۔
پہلوں اوہناں دوواں ایہ پروگرام وی بنایا کہ کسے نوں دسے بغیر اوس کُتے ماچھی دی کھُنب ٹھپی جاوے۔ اوہنوں ایہو جہی گُجھی مار دتی جاوے کہ اوہ ایدھر نُوں مُونہ نہ کرے۔
”اوہدی جرئت کویں پئی ساڈے پِنڈ آ کے گند مارن دی۔”
”یار زیادا گُناہ موجاں دا اے۔”
”ایہ تاں توں ٹھیک آکھیا اے۔”
تے موجاں نوں اوہدا سائیں ای ڈک سکدا اے۔
”ایہ وی ٹھیک اے۔ کسے ہورنے کُجھ کیتا تاں گل گلاواں وی پے سکدا اے۔”
”کسے چج تے سوہنے ڈھنگ نال اوہدے کنیں گل پا۔”
کہندے نیں ایہو جہی گل دا عورت دے سائیں نوں سبھ توں آخر تے پتا لگدا اے۔
”ویکھ بھائو! گل وڈی تے مُونہ چھوٹا اے۔ گل بڑی بے عِجتی دی اے۔ میں آپ وی بنھ سُبھ کر سکدا ساں پر میں آکھیا اک واری تیرے کنوں کڈھ دیاں۔” قایمے گل چھوہی تے فیر مناسب لفظاں وچ لھویٹ کے ساری گل سُنائی۔
فرمایش علی نے بڑے تحمل نال اپنے چاچے دے پُتر دی گل سُنی۔ گل سُن کے اوہنے انج وکھالا کیتا جویں اندروں باہروں بل گیا ہووے۔
”قایمیا تو بڑی وڈی گل کیتی اے۔ ایہو جہیاں گلاں تے سر لتھ جاندے نیں۔ میرے ہتھوں کوئی بے دوسا قتل نہ کروا دیویں۔”
”کملا ہویا ایں بھائو۔ بھلا ایہو جہیا جھُوٹھ میں مار سکدا آں۔ ایڈا بے غیرت میں نہیں آں۔”
رات نوں جدوں جھان بھان مَٹھی ہو گئی تاں فرمایش نے موجاں نال گل کیتی۔ کُجھ وی ہووے قتل دے ملزم نوں وی صفائی دا موقعا دِتا جاندا اے۔ ایہو دستور اے۔
اودوں موجاں حالے اینی زیادا پکروٹ نہیں سی ہوئی۔ (جاری اے)

اپنا تبصرہ گھلو