آکھن لوک سیانے

Ahsan Bajwa

پُتّر کپُتّر تاں دھن نہ دھار’پُتّر سپُتّر تاں دھن دھار
معنے: کپُتّر: بھَیڑا پُتر٭ دھن دھار:دؤلت اکٹھی کر ٭سپُتّر: چنگا پُتر۔
ویروا: مت دِتی گئی اے پئی جے کر پُتر بھَیڑا ہووے تاں بندے نُوں اوس لئی گھر وِچ دؤلت نہیں جوڑنی چاہیدی’ کول کُجھ نہ ہووے تاں اپنی مجبوُری نُوں محنت کرے گا۔ پر جے پُتر چنگا ہووے تاں اوس لئی دؤلت جوڑن وِچ کوئی حرج نہیں ہوندا۔
پِچھے دی پُچھ تھی وَیندی اے
معنے: پِچھے: مگر٭ پُچھ: پرتِیت۔
ویروا: ایس اکھان وِچ مت دِتی گئی اے پئی بندہ لکھ اپنے حسب نسب نُوں لوکاں توں لُکا کے رکھے پر اوڑک اوس دے پِچھے بارے کدی نہ کدی پتہ لگ ای جاندا اے۔اتے لوک اوڑک اوس دے حسب نسب توں جانو ہو ای جاندے نیں۔
پِچھلے موئے’ پِچھے دبّے گئے
معنے: موئے: مر گئے ہوے٭ دبّے گئے: دفن ہو گئے۔
ویروا: مت دِتی گئی اے پئی بندے نُوں کوئی گل مکان لگیاں دفن ہوئے مُردے نہیں پُٹنے چاہیدے۔ سگوں پِچھلی گل تے مِٹی پا کے ای گل مُک سکدی اے۔اتے پِچھلیاں رڑکاں نُوں چیتے رکھیاں صُلع نہیں ہو سکدی۔
پد کے ہسّے’ لڑکے رووے’ اوس توں نفع کدے نہ ہووے
معنے: پدکے: ہوا سرکے۔
ویروا: مت دِتی گئی اے پئی جو بندہ ہوا سرکے شرمِندہ ہون دی تھاں ہسن لگ پوے اتے لڑن لگیاں دو دھرؤلاں کھاندیاں سار ای سِر تے بانہ دھر کے رو پوے تاں اوہ بندہ شندہ کوئی نہیں ہوندا۔ اوس کولوں کدی فائدہ نہیں ہو سکدا۔
پرچھاویں نال تے ٹُردے نیں پر ہتھ نہیں آوندے
معنے:پرچھانویں:سائے٭ٹُردے: چلدے
ویروا: ایس اکھان وِچ مت دِتی گئی اے پئی پرچھانویں بھانویں بندے دے نال نال ٹُردے نظر آؤندے نیں پر ہتھ نہیں آ سکدے۔غیر لوکاں نُوں لکھ اپنا سمجھ لیا جاوے پر فیر وی اوہناں تے کدی پورا وساہ نہیں کیتا جا سکدا۔٭٭

اپنا تبصرہ گھلو