ناول شکارن

Ali anwar Ahamed

علی انور احمد

کہیا جاندا اے جہناں مرداں دِیاں بیویاں بے وفا ہو جاندیاں سن تے اوہناں دی دغابازی جگ تے دُھم جاندی سی تاں اوہناں دے خاوند اپنا نک بچاون لئی اوہناں دی گُت تے نک وڈھ دیندے سن۔ انج اوہ عورتاں داگی ہو جاندیاں سن۔ بعد وچ نک بھاویں جُڑ جاندا سی پر اک نشان ایہو جہیا رہ جاندا سی جہڑا ویکھن والیاں نوں چِیک چِیک کے دسدا سی کہ ایہ اِک بے وفا عورت اے تے ایہنے اپنے خاوند نال دغا بازی کر کے کوئی بھیڑ کمایا اے جہدی پاروں ایہدا نک وڈھیا گیااے۔ ایہو جہی عورت نوں نک وڈھی کہیا جاندا سی۔ نک وڈھی بڑا وڈا مہنا سی۔ نک وڈھی نال کوئی وی ویاہ کروانا پسند نہیں کردا سی۔ اصلوں اُڑے تھُڑے دی گل نہیں ہوندی پئی۔ جہنوں کوئی نہ جھلے اوہ تاں فیر سر تُن ای دیندا اے۔ جہنوں صرف بُڑھی دے پھڑ کے دی لوڑ ہووے اوہ نک وڈی وی گھر پا لیندا اے۔
ایہ سزاواں صرف عورت دا مقدر سن تے اج وی اوہدا ای مقدر نیں۔ مرد اودوں وی نہاتا گھوڑا ہوندا سی تے اج وی نہاتا گھوڑا اے۔ منّھے ٹوبے نے حملا تاں پورے بھار نال کیتا سی پر اگوں وی موجاں سی۔ اوہ چنگی بھلی تگڑ ی سی تے کُجھ کُجھ ٹوبے ولوں خبردار وی سی۔ ٹوبا اُسترے نال نک اُتے جھرِیٹ ای مار سکیا۔ موجاں رتو رت ہو گئی۔
منّھے کم پایا تے سایکل اُتے لت دے کے تِتّر ہو گیا۔
موجاں نوں پٹی لوان لئی دُبارا شہر جانا پیا۔ منّھا اپنے پِنڈوں فرار ہوگیا۔ موجاں تھانے نہیں گئی۔ تھانے جاون دے فایدے گھٹ تے نقصان زیاداسن۔ اوہنے منھّے بارے بڑا وڈا کم سوچیا۔ پر اوس توں بعد منّھا’ موجاں دے اڑیکے نہ چڑھیا۔ جے اوہ موجاں تے وِس پیندا تاں موجاں نے اوہدیاںساریاں موجاں مُکا دینیاںسن۔
منھّا ٹوبا بھاویںبہتا سیانا نہیں سی پراینا کُو سیاناضرور سی کہ اوہ جاندا سی جہڑی ناگن نوں اپنے ہتھیں زخمی کیتا ہووے فیر اوہدے تے وساہ کھاناسبھ توں وڈی بے وقوفی اے۔
ٹوبے نے بڑے کیس ویکھے سن’ جہناںوچ قاتل’ مقتولاں دے وارثاں نال صلح کرلیندے سن تے بعد وچ مارے جاندے سن۔
اوہنوں اوہ بہتا سیانا یاں شاید بہت زیادا بے وقوف چیتے آیا۔ جہڑا حج کرن جان لگا تاں اپنے دِل وچوں کُفر کڈھ کے دشمناں نال صلح کرن تے معافی منگن ہتھڑ مُتھڑ چلا گیا سی۔ اوہدا خیال سی دُشمن فراخ دِلی دا مظاہرا کرن گے پرجہناں دے پُتر بھرا مارے ہوون’ اوہناں کولوں کِنّی کُو فراخ دلی ہو سکدی اے؟
اوس بیلی دی فیر لاش ای واپس آئی سی۔
منّھے نوں سارا چانن سی۔ اوہنے موجاں دی سٹ نہ کھادی۔
نک تے ادھی گلھ اُتے لگا زخم بھر گیا پر نشان چھڈ گیا۔ ایہ نشان نظر آندا سی۔ ایس نشان توں وڈا نشان موجاں دے دِل تے ذہن اُتے لگا جہڑا نظر نہیں آندا۔ اوہدا زوال شروع ہوگیا۔
عُمر چورتے چنگی کاٹھی ہوون پاروں’ نالے لیپا پوتی کرکے تے خُد نوں سنبھال کے رکھن پاروں اوہ اپنیاں ہانناں نالوں دس سال نِکی نظر آندی سی۔ نک وڈھے جاون توں بعد اوہ بُجھ جہی گئی تے اِکو دم چھال مار کے اپنی اصل عمرجِڈی دِسن لگ پئی۔
آکھیا جاندا اے بڈھیپے دا تعلق ورھیاں نال نہیں سگوں صحت تے مزاج نال اے۔ کُجھ لوک پیدایشی بُڈھے ہوندے نیں تے کُجھ بُڈھے ہو کے وی جوان ہوندے نیں۔
صحت تے مزاج نوں ویکھیا جاوے تاں موجاں خُد نوں بُڈھا نہیں سمجھدی سی۔ پر ہن لوگ اوہدی سوچ نہیں اوہنوں ویکھدے سن تے اوہناں نوں ہُن اوہ بُڈھی ای نظر آندی سی۔ موجاں اپنیاں سرگرمیاں مُکا دِتیاں تے اِک واری فیر نیک پاک بن گئی۔ سائیں دے اگے پچھے پھرن لگ پئی تے اوہدے پیر دھو دھو کے پیون لگ پئی۔ فیر اک دِن پِنڈ وچ ایہ خبر ہُل گئی کہ موجاں تے اوہدا سائیں حج کرن لئی پیسے جوڑدے پئے نیں تے اوہ اوّل تاں ایس ورھے نہیںتاں اگلے ورھے حج تے ضرور چلے جاون گے۔ (جاری اے)

اپنا تبصرہ گھلو