شکارن ناول

Ali anwar Ahamed

علی انور احمد

لڑائی جھگڑے تے پیار محبت دیاں بڑیاں کھیڈاں ہوئیاں ہوندیاں نیں۔ نانکے پِنڈ چالھی ورھے گزار کے وی اسیں اوبھڑ ای رہے ساں۔ سانوں ہمیشا اپنے پِچھلے پِنڈ دے حوالے نال یاد کیتا جاندا سی۔ واپس پرتے تاں پُلاں ہیٹھوں بہت سارا پانی لنگھ گیا ہویا سی۔ بہت سارے نویں لوک۔ اودوںدے بچے ہُن بُڈھے ہو گئے سن تے جوان ہور زیادا بُڈھے ہو گئے سن۔ کئی ابے دے ہانی قبریں جا سُتے سن۔ ہر پاسے نویں چہرے’ اوپرے تے انجانو مُکھڑے تے اوبھڑ رویے نظر آندے۔ جِتھے کئی پرانیاں سانوں جی آیاں نوں آکھیا’ اوتھے کئیاں جِتھوں دی کھوتی اوتھے آن کھلوتی ورگے دبے دبے مہنے وی مارے۔
لوک ترقی کر گئے سن۔ اوہ بدل گئے ہوئے سن۔
تے اوتھے موجاں وی سی۔ چنگی بھلی۔ نوبرنو’ پِنڈ وچ اِک دن نظر آندی۔ ہفتا ہفتا نظر ای نہ آندی۔ پتا لگا سائیں مرے نوں بڑا چِر ہو گیا اے۔ ہُن اوہ ازاد اے۔ کدے کسے رشتا دار کول تے کدے کسے رشتے دار کول چلی جاندی اے تے چار دن گزار آندی اے۔ ساڈی کوئی اُچیچی ملاقات یاں بہنی نہ ہوئی۔ نہ اوہ پرانی موجاں سی نہ پرانے دن سن تے نہ میں چوتھی جماعت وچ پڑھدا بال ساں۔
موجاں نوںویکھیا تاں حیران رہ گیا۔ میرے خیال وچ اوہ اسّی سال توں لنگھ چُکی سی پر اوہ کسے پاسیوں وی اسّی سال دی لگدی نہیں سی۔ نہ اوہدے دند ڈِگے سن نہ اوہنوں جھُرڑیاں پئیاں سن’ ماس ضرور ڈھلکیا سی۔ وال وی چِٹے ہو گئے سن جہڑے اوہنے لال مہندی لا کے رتے کیتے ہوئے سن تے اوہنوں پھبدے سن۔ ہاں اکھّاں وی کمزور ہو گئیاں سن تے اوہنے نظر دی عینک لائی ہوئی سی۔ اکھّاں تے والاں توں علاوا ودھیری عُمر دااثر کدھرے نظر نہیں سی آندا۔ نہ تے اوہدا لک کمان وانگوں جھُکیا سی نہ اوہ عام عورتاں وانگوں وڈے ڈِھڈ والی موٹی ددّر مائی بنی سی تے نہ ای نِری ہڈیاں دی مُٹھ بُڈھی ٹھیری۔ اوہدے کن وی صحیح سلامت سن تے اوہدے ہتھاں نوں وی کانبا کوئی نہیں چھِڑیا سی۔ فیر مینوں ہندستان دے کسے گروہ بارے پڑھی اک گل چیتے آئی۔ اوہ گروہ نِکی عمردیاں کُڑیاں نوں ٹیکا لا کے جوان کردا سی تے اوہناں کولوں ”پیشا’ کرواندا سی۔ مینوں اِک کھُسرا چیتے آیا اوس نِکی عمر دے کھُسرے نے ٹیکے لوا لوا کے سینا وڈا کر لیا سی۔ شاید موجاں وی کوئی ایہو جہی دوا ورتی سی۔ اوہ ودھ توں ودھ میری ہانن نظرآندی سی۔
ایہ کیہ راز سی؟
سچی گل تاں ایہ اے کہ میں اوہدے نالوں زیادا بُڈھا نظر آ ندا ساں۔ ایہدی وجھا میرے جُسے نوں لگے روگ وی ہو سکدے سن۔ پر موجاں دی عمر تاں لگدا سی اِک جگھا آ کے کھلو گئی اے۔ مینوں اوہدے نال حسد محسوس ہویا۔ ساڑے دی سٹ بڑی ڈونگھی سی۔ ویلے اوہدے تے اثر کیوں نہیں کیتا؟ ایہ کیہ ان وِدھ موتی کھاندی اے؟
جد کدے میں اوہنوں ویکھناں میرے ذہن وچ ایہو جہے سوالاں یلغار کردینی۔ ساڈا کدھرے اکلیاں بیٹھن دا ڈھوء نہ لگا تے مینوں میرے سوالاں دے جواب نہ لبھے۔
اج اوہ خُد ای سویرے سویرے ساڈے گھر آ وڑی’ صرف گھر ای نہیں سگوں میرے بسترے وچ وی وڑ گئی سی۔میں سرہاندی ول ہو گیا ساں تے اوہدے لئی جگھا بنا دِتی۔ اوہ پرانے انداز نال بے تکلف ہو کے پواندی والے پاسے سرہانے دی ڈھوء لائی بیٹھی سی۔
”ہاں جی کیہ حال اے؟” میںپُچھیا۔
”تُہاڈے ساہمنے ای اے۔ شکر اے اوہدا جہڑا دم لنگھ جائے۔” اوہدی اواز کھنکدی پئی سی۔
”کویں اج سویرے سویرے؟ خیر تے ہے؟”
”بس میں آکھیا’ مل آواں۔ جدوں دا تُوں آیا ایں ملیا ای نہیں۔”
”جی بسم اللہ۔ مہربانی تُہاڈی۔”
”تُسیں سارے’ میرے مطلب اے تیرا بال بچا سبھ ٹھیک نیں؟”
”کرم اے اوہدی ذات دا سوہنا ویلا لنگھدا پیا اے۔” (جاری اے)

اپنا تبصرہ گھلو