آکھن لوک سیانے

احسان باجوہ

پُن دی گھوڑی دے کدی کِسے دند نہیں گِنے
معنے: پُن دی گھوڑی: کِسے نُوں مُفت وِچ گئی گھوڑی ٭دند گِنن: عُمر ویکھن۔
ویروا: ایس اکھان وِچ مت دِتی گئی اے پئی جو شَے کِسے نُوں مُفت وِچ مِل جاوے۔ لَین والے نُوں اوس شَے دے نقص نہیں لبھنے چاہیدے۔سگوں اگلے دا سدا داس رہنا چاہیدا اے پئی اوس نے نیکی کیتی اے۔
پُن دی گئؤ دے دند کؤن ویکھدا اے
معنے: گئوُ: گاں۔
ویروا: ایس اکھان وِچ مت دِتی گئی اے پئی جو گاں وی کِسے نُوں دان وِچ مِل جاوے لَین والے نُوں اوسدے نُقص کڈھن دا کوئی حق نہیں ہوندا۔سگوں اوہنوں چاہیدا اے پئی اوہ دان کرن والے دا خیر خواہ بن کے رہوے اتے اوس دا کدی مندا نہ سوچے۔
پنج اُنگلاں پنج چراغ
معنے: چراغ: دیوے۔
ویروا: مت دِتی گئی اے پئی بندے دیاں پنج اُنگلاں اصل وِچ پنج چراغ نیں جو رب نے ہر کِسے نُوں مُحبت دی لو کرن لئی دان کِیتے ہوئے نیں۔ایس لئی ایہناں ہتھاں نال ہر کِسے لئی چنگے کم کرنے چاہیدے نیں تاں جو ایہ جگ جنت بن جاوے۔
پنجاں وِچ پرمیشور
معنے: پرمیشور: مالک’ پربھوُ۔
ویروا: ایس اکھان وِچ مت دِتی گئی اے پئی جدوں پنج بندے رل کے کوئی فَیصلہ کرن گے تاں اوس فَیصلے وِچ ربی منشا وی ضروُر شامل ہووے گی۔اُنج وی ساڈا پنجاں نال چوکھا سانگا اے’ پنج تن’ پنج پیر’پنج اُنگلاں اتے پنجاب دے پنج دریا۔
پنجے اُنگلاں اِکو جیہیِاں نہیں ہوندیاں
ویروا: مت دِتی گئی اے پئی جگ دے سارے لوک اِک جیہے عِلم فضل اتے گیان دے مالک نہیں ہوندے’ جِسراں ہتھ دیاں ساریاں اُنگلاں اِک دُوجے نال نہیں رلدِیاں۔اِنج ہر بندے دیاں عادتاں اتے سبھاء وکھرا وکھرا ہوندا اے۔وِچے ای چنگے ہوندے نیں اتے وِچے ای مندے ہوندے نیں۔٭٭