سوشل میڈیا تے پھیلن والی خبراں رد، میری صحت بہتر اے: اداکارہ ندا یاسر

لہور: اداکارہ ندا یاسر نے سوشل میڈیا تے پھیلن والی خبراں نوں رد کردیاں آکھیا اے میری صحت بہتر اے تے اہل خانہ سنے گھر تے آں۔

تفصیلات دے مطابق اداکارہ ندا یاسر، اوہناں دے شوہر سنے تے اوہناں دی دھی وچ 25مئی نوں کورونا دی تشخیص ہوئی سی جد کہ اوہناں دے مارننگ شو وچ رلت کرن والے اداکار نوید رضا وچ وی وباءدی تصدیق ہوئی سی۔

اجیہا خیال کیتا جا رہیا سی کہ ندا یاسر دے مارننگ شوز وچ رلت کرن والی کجھ شخصیات تے اوہناں دے عملے دے کجھ ارکان وی کورونا دا شکار ہو سکدے نیں۔

اداکارہ نے تصدیق کیتی سی کہ اوہناں دی دھی تے اوہناں دے شوہر اداکار یاسر نواز تے اوہناں وچ کورونا دی تشخیص ہوئی ۔

شو وچ اداکار نوید رضا دے نال رلت کرن والی اداکارہ علیزے شاہ نے وی کورونا دا ٹیسٹ کروایا سی پر اوہناں دا ٹیسٹ وی منفی آیا سی۔ندا یاسر نے انسٹا گرام تے اپنی تصویر شیئر کردیاں واضح کیتا کہ اوہناں دی صحت بہتر اے تے اوہ اہل خانہ سنے گھر تے نیں۔

اداکارہ دی صحت دے حوالے نال سوشل میڈیا تے یوٹیوب تے وائرل ہون والی ویڈیوز وچ غلط دعوے کیتے جا رہے سن تے دسیا جا رہیا سی کہ اداکارہ تے اوہناں دے شوہر وچ کورونا دی علامات شدید ہون تے اوہناں دی صحت خراب ہو گئی۔

اپنا تبصرہ گھلو