پشاور: دلیپ کمار دا آبائی گھر خریدن لئی باقاعدہ اعلامیہ جاری

پشاور: خیبر پختونخوا سرکار نے بھارتی لیجنڈ دلیپ کمار دے پشاور وچ واقع آبائی گھر نوں خریدن لئی سیکشن فور نافذ کر دتا۔ ضلعی انتظامیہ نے پشاور دے علاقے محلہ خداداد وچ واقع دلیپ کمار دے آبائی گھر نوں خریدن لئی سیکشن فور نافذ کر دتا جہدا باقاعدہ اعلامیہ جاری کر دتا گیا اے، محکمہ آثار قدیمہ نے گھر خریدن لئی ضلعی انتظامیہ نوں خط لکھیا سی۔

صوبائی مشیر اطلاعات کامران بنگش دا کہنا اے سرکار دلیپ کمار دا چار مرلے دا گھر خریدن دا عزم رکھدی اے تے ایس مقصد لئی سیکشن فور نافذ کر دتا گیا اے جہدے تحت پہلے مرحلے وچ گھر نوں خریدیا جائے گا جہدے لئی سرکار فنڈ دے رہی اے۔ کامران بنگش دا کہنا سی دوجے مرحلے وچ گھر دی مرمت تے ایہدی اصلی حالت وچ بحالی دا کم ہووے گا تے بحالی پلان دے تحت گھر نوں میوزیم وچ تبدیل کر دتا جائے گا۔