پاکستان دی شرح نمو 0.5فیصد توں وی گھٹ رہن دی توقع

عالمی بینک نے بیرونی قرضیاں دی ادائیگی دے حوالے نال پاکستان نوں خبردار کردیاں ہوئیاں آکھیا اے ایس مالی ورھے پاکستان دی ترقی دی شرح 0.5فیصد توں وی گھٹ رہن دی توقع اے۔ عالمی بینک ولوں ایشیائی ملکاں دی شرح نمو بارے رپورٹ جاری کیتی گئی اے جہدے وچ آکھیا گیا اے اگلے ورھے جنوبی ایشیا وچ ترقی دی شرح منفی 7.7فیصد توں بہتر ہو کے 4.5فیصد ہون دی توقع اے۔

جنوبی ایشیائی ملکاں لئی ورلڈ بینک دے چیف اکنامسٹ ہینس ٹمر نے اپنے بیان وچ آکھیا جنوبی ایشیائی ملکاں لئی چنگی خبر نہیں اے تے مستقبل دی صورتحال انتہائی خوفناک اے۔ عالمی بینک نے اپنی رپورٹ وچ پاکستان دے حوالے نال آکھیا اے پاکستان نوں بیرونی قرضیاں دی ادائیگیاں وچ مشکلات دا ساہمنا کرنا پے سکدا اے۔ رپورٹ دے مطابق مالی سال 2021وچ پاکستان دی ترقی دی شرح 0.5فیصد توں وی گھٹ رہن دی توقع اے جو کہ پچھلے تن ورھیاں وچ 4فیصد سی۔

رپورٹ وچ آکھیا گیا اے کورونا وائرس دوبارہ ابھرن نال ترقی دی شرح نوں ہور خطرات ہو سکدے نیں جد کہ ٹڈی دل تے بارشاں نال غذائی قلت وی جنم لے سکدی اے، لائے گئے اندازیاں دے مطابق غربت وچ بدترین وادھے دا وی امکان اے۔

اپنا تبصرہ گھلو