لہور پریس کلب 7 نومبر دی پنجابی ریلی دے حوالے نال شاعری

شاعر : آصفؔ عارف چشتی ایم ۔اے پنجابی. پی یو

پچھنے آں اسیں ایہہ حکومتاں نوں خیر اے؟

مادری زبان نال ای کیوں ایڈا ویر اے۔

تسیں وی پنجابی او پنجابی نال پیار کرو,

پرائمری توں بی۔اے تیک لازمی قرار کرو۔

ساڈی جے نہیں اپنی ای گل پلے بھن لو,

ساڈی جے نہیں مننی عدالت دی من لو۔

ماں بولی نال دسو ایڈا کیہڑا وٹ اے,

دسے کوئی پنجابی بولی کہیڑے پکھوں گھٹ اے ۔

پنجابی وچ ای بابا فریدالدینؒ ایں,

شرع تے جئیں چلن دی کیتی تلقین ایں۔

پنجابی وچ ای حضرت لعل حسینؒ ایں,

ہاشم شاہ پنجابیاں دی اکھیاں دا چین ایں ۔

حکومتاں نوں اج کیوں پنجابی نہ قبول اے,

پنجابی وچ ای مولوی غلام رسولؒ اے ۔

کسے ہور بولی وچ بلھے شاہ وکھا دیو,

نالے کِتوں وارث شاہؒ وی لبھ کے لیا دیو ۔

پنجابی بولی ساڈی شان, مان تے تران ایں,

پنجابی وچ ای حضرت باھو سلطانؒ ایں ۔

پنجابی وچ کوٹ مٹھن والی سرکار اے,

میاں محمد بخشؒ کھڑی دا تاجدار اے۔

گن گن دساں ایتھے کیہڑے کیہڑے ہیرے میں,

اینی گل کرناں واں آصفؔ اخیرے میں ۔

ہر ہر بولی سکھو سکھنی وی چاہیدی ,

پر کدی کسے نال ماں نہیں وٹائی دی ۔