مسکرائی جا رہیا اے

Amarjeet Singh

کون ہے جو غم چ ڈُبیا مسکرائی جا رہیا اے
زخم دل دے ہاسیاں ہیٹھاں لُکائی جا رہیا اے
دل کوئی چھوٹا نہیں ہوندا، کہ ویکھو دل میرے وچ
لکھ برہمنڈاں دا مالک وی سمائی جا رہیا اے
اک بھنبیری وی چلائے بن جے چل سکدی نہیں تاں
کون ہے جو دُنیا دا چکا چلائی جا رہیا اے
موت دا ٹھیڈا جدوں وجا تاں مونہہ پرنے گرے گا
ترشنی گھوڑی نوں جو سرپٹ دڑائی جا رہیا اے
اج تک جے ہر نعمت دتی ہے تینوں خدا نے
کل دا کیوں فکر فِر تینوں ستائی جا رہیا اے
لکش ہینی زندگی انسان جیندا ہے، جویں اوہ
لاش اپنی اپنے موڈھے تے اُٹھائی جا رہیا اے
اج کل روٹی کماؤنی اس قدر ہوئی ہے اوکھی
زندگی بھر دی آدمی روٹی کمائی جا رہیا اے
ناری جیوں جیوں باہاں وچ ونگاں چڑھائی جا رہی ہے
مرد تیوں تیوں ہور وی باہاں چڑھائی جا رہیا اے
کس قدر ہے قدر ہوندی کوتا دی، سبھ جان دے پر
فرض ہے، شاعر جو ہر حیلے نبھائی جا رہیا اے
اوہ تاں کہندے نیں پنجابی وچ غزل جم ای نہیں سکدی
سندھو ایپر ہتھ تے سرسوں جمائی جا رہیا اے

اپنا تبصرہ گھلو