آکھن لو ل سیانے

Ahsan Bajwa

احسان باجوہ

بھُلھا اوہ نہ جانیے’ جو مُڑ گھر آئے
ویروا: دسیا گیا اے پئی گھروں چراکے چِر دا گیا بندہ جے دیر مگروں وی پرت کے گھر آ جاوے اوس نُوں کدی وی بھُلھیا ہویا نہیں سمجھنا چاہیدا۔بندہ جے غلطیاں کرن مگروں وی توبہ کر لوے مُڑ وی اوس نُوں بُرا نہیں سمجھنا چاہیدا۔
بَھلے بھا ‘ نہ پچھو تا
معنے:بَھلے بھا:چنگے طرِیقے۔
ویروا: دسیا گیا اے پئی بندہ جے ہر اِک نال اپنا روّیہ چنگا رکھے تاں رب وی اوسدی مدد کردا اے۔ اتے اوس نُوں کدی وی پچھتانا نہیں پَیندا سگوں اوسدی کامیابی دی کوئی نہ کوئی راہ لبھ ای جاندی اے ۔
بھلے دا کوئی ویلا نہیں
معنے: بھلے: نیکی ٭ویلا: وقت۔
ویروا: دسیا گیا اے پئی کِسے تے نیکی کرنی ہووے سہی اوہ کِسے ویلے وی ہو سکدی اے اوس نال نیکی کرن دا کوئی مِتھیا ہویا ویلا نہیں ہوندا پئی مگروں کُجھ نہیں ہو سکدا۔نیکی تاں ہر ویلے ای کِیتی جا سکدی اے۔
بھلے کم دا کِیہ پُچھن
ویروا: دسیا گیا اے پئی جدوں کِسے سِر نیکی ای کرنی ہووے تاں اوس بارے پُچھن دی کِیہ لوڑ ہوندی اے۔اوہ جدوں وی ویلا مِلے کر دینی چاہیدی اے’اوس وِچ ڈِلھ مٹھ نہیں کرنی چاہیدی۔
بھُورے ہتھ نہ پائیے’ دوشالہ نہ لُہائیے
معنے:بھُورے: بھُورا’ موٹا کپڑا٭ لُہائیے: اُتروائیے۔
ویروا:مت دِتی گئی اے پئی بندے نُوں چاہیدا اے پئی کِسے دے ماڑے کپڑے نُوں وی ہتھ نہ پاوے ایس لئی پئی کوئی اوس دے چنگے کپڑے نُوں ہتھ نہ پاوے۔چھیڑ خانی کدی اپنا چوکھا نقصان وی کرا سکدی اے اتے بندہ پچھتان جوگا رہ جاندا اے۔
بھولے بھاء ‘ مِلے رگھو رائیا
معنے: بھولے بھائ: بھولے پَن وِچ۔
ویروا:مت دِتی گئی اے پئی بندے دی نِیت ٹھِیک ہووے تاں رب اوس تے رحمت کردا اے تاں رب اوسنوں بھاگ لا ای دیندا اے اتے اوڑک اوس نُوں سبھ کُجھ مِل جاندا اے۔٭٭

اپنا تبصرہ گھلو