کہانی پراگا بےبے

S Saqi

پتہ نہیں مینوں ایہہ سبھ ہونا کیوں چنگا نہ لگا۔ میرا من کر رہا سی کہ پریتم چاچے نوں کہاں کہ اوہ اک رات وچ ہی میرا کوٹ سیوں دیوے۔ اس ویلے ست دن مینوں ست ورھیاں جڈے لگے، پر بے بے دے ہندیاں میں چاچے نوں کجھ نہ کہہ سکیا۔ میں بے بے نال گھر مڑ آیا۔ ہن مینوں اک نواں ہی کم لبھ گیا سی۔ میں سکولوں گھر آ کے رات گیاں تیک گلی دے شروع چ پیندے پریتم چاچے دے گھر موہرے نوں دس چکر ماردا۔ میں روز کوئی نہ کوئی بہانہ بنا کے اوہناں دے گھر پہنچ جاندا، پر ہر واری مینوں پریتم چاچا رانیاں دے کپڑے سیوندا ہویا ہی دکھائی دندا۔
ایہہ میرا کوٹ کیوں نہیں سیوندا؟ پر ایہہ سوال پریتم چاچے کولوں نہ پچھ سکاں۔ ایہہ سوچ کہ متے اوہ میرے نال غصے ہو کے میرا کوٹ سیون لئی ہور ودھ دن لا دیوے جاں جان کے اس نوں خراب ہی نہ کر دیوے۔
چاچا جی، تسیں میرا کوٹ؟ جدوں اک دن میرے کولوں نہ رہا گیا تاں میں ایہہ سوال پریتم چاچے نوں پا ہی دتا۔
بس پت، کل اوہدا ہی نمبر لگے گا۔ کل سویرے شروع کراںگے اس نوں! پھر کی، میں کوٹ دے چا چ رات مساں ہی کٹی تے اگلا دن چڑھن دا انتظار کرن لگا۔ سویرے تیار ہو کے میں سکول چلا گیا۔ چاچے پریتم دے گھر اگیوں لنگھدیاں میں ادھر سرسری جہی نظر ماری، پر اوہناں دی بیٹھک باہرلی باری اتے بوہا بند سن۔ میں کجھ چر لئی چپ چاپ کھڑھا اوہناں ول ویکھدا رہا۔ سوچیا کہ اک وار بند بوہا کھڑکا کے پچھاں کہ اس نے کوٹ سیوننا شروع کر دتا جاں نہیں، پر پتہ نہیں کی سوچ کے میں بند بوہے نوں چھڈ کے سکول چلا گیا۔ سکولے پڑھائی چ میرا اکا ہی من نہ لگا۔
دوپہر ویلے ساری چھٹی بعد میں گھر ول پرت پیا۔ جدوں میں پریتم چاچے دے گھر نیڑے پہنچیا تاں اس دی بیٹھک دا باہرلا بوہا کھلا سی۔ میرے پیر کجھ پلاں لئی رک گئے۔ جدوں میں کھلے بوہے راہیں اندر جھاتی ماری تاں پریتم چاچا پھٹے تے کپڑا رکھی میرے کوٹ دی کٹائی کر رہا سی۔ میرا من کیتا کہ میں پریتم چاچے نوں کوٹ بارے کئی سوال کراں، پر اجیہا نہ کر سکیا۔ ایہو سوچ متے قینچی چلاندیاں چاچے کولوں کوئی بھل نہ ہو جاوے۔ اس دن میں چج نال روٹی وی نہ کھادی۔ ہنیرے ہوئے تیک جاں تاں میں اس گلی وچ چکر ماردا رہا جاں تن چار واری کوئی نہ کوئی بہانہ بنا کے پریتم چاچے دی بیٹھک وچ جا وڑیا۔
اگلا دن اتوار دا سی۔ چھٹی ہون کرکے اس دن میں اکا ہی ویہلا سی۔ اس دن میں پریتم چاچے دے ہتھاں چ کوٹ نوں جوان ہندے ویکھیا۔ اس شام میری خوشی دی کوئی حد ہی نہیں سی، جدوں بے بے پریتم چاچے کولوں کوٹ لے کے آئی۔ اگلے دن سویر سار سارے گھر وچ سبھ توں پہلاں جاگن والا میں ہی سی۔ جاگن سار پہلاں میں کوٹھڑی وچ گیا جتھے رات ویلے بے بے نے میرے ساہمنے کوٹ پیٹی تے دھریا سی۔ کوٹ اجے وی اتھے ہی پیا سی۔ پہلاں میں کوٹ نوں چھوہ کے ویکھیا۔ پھر ایوں پولا پولا ہتھ پھیرن لگا جویں میرے ساہمنے کوٹ نہ ہو کے چڑی دا بوٹ پیا سی۔ پھر میں دن چڑھن دا انتظار کرن لگا۔
میں سبھ توں پہلاں نلکے تے نہا کے سکول جان لئی تیار ہو گیا۔
وے چھوٹے، توں اج انی سدیہاں کیوں نہا لیا؟ ویہڑے وچ جھاڑو ماردی بے بے نے کیہا۔
بے بے، اج سکول وی تاں جانا ہے۔
وے چندریا، سکول تاں کتے دن چڑھے جا کے لگدا، پر توں آہ سویرے ہی۔
ماں دے اجیہے سوالاں توں بچن لئی میں کوٹھڑی ول نوں جان لگا تاں پچھوں بے بے دی آواز سنائی دتی۔
وے اج کوٹ پہن کے نہ جائیں۔ اجے انا سیت نہیں پین لگا۔ (جاری اے)

اپنا تبصرہ گھلو