کہانی پراگا گڈی

Sarwat Sohail pic

سہیل ثروت

تے جدوں گڈی ہوا وچ سہواری ہو کے اڈن لگ پیندی سی تے اوہدے کولوں ڈور پھڑ لیندی سی تے جدوں اوہ اچی اڈدی سی تے اوہنوں ویکھدی رہندی سی۔ ہفتے والے دن پشلاپہر اوہناں لئی وڈا دن ہوندا سی، تے جدوں مسٹر سنبری تے ہربرٹ سویرے شہر والی گڈی تے بھن لئی گھروں نکلدے سن تے اوہ پہلا کم ایہ کردے سن کہ اسمان ول ویکھدے تے ایہ حساب لاندے سن کہ گڈیاں اڈان والی رت ہے کہ نہیں۔ سبھ توں ودھ اوہناں نوں جھکڑ والا دن تے کٹدی ودھدی ہوا چنگی لگدی سی، اس لئی کہ اوہناں نوں انج اپنی مہارت وکھان دا موقع لبھدا سی، سارا ہفتہ شام نوں ، اوہ ایہ ای گلاں کردے سن۔ اوہ اپنے ولوں نکیاں گڈیاں توں نفرت کردے تے وڈیاں توں سڑدے سن۔ اوہ بڑے جوش نال تے نفرت نال دوجیاں گڈی بازاں دے کم دی گل کردے سن، انج جیویں باکسر تے فٹ بال دے کھلاڑی اپنے مخالفاں دی گل کردے نیں۔ اوہناں نوں وڈی توں وڈی گڈی تے جہڑی اچی اڈے اوہ، گڈی لین دا شوق سی۔ اوہناں نے ہربرٹ نوں جہڑی ڈور اکیویں سالگرہ تے دتی سی اوہ پیانو دے ست فٹ اچے ،ڈرم تے ولھیٹی سی۔ پر ہربرٹ ایڈا راضی ناں ہویا ۔ کسے ناں کسے طرحاں اوہنوں اک ‘ڈبہ گڈی ‘ جہڑی کسے نے نویں بنائی سی، اوہدے بارے سنیا تے ایہ خیال اوہنوں ودھیا لگا۔ اوہنے سوچیا کہ اوہ آپ وی انج دی کوئی شے بنا سکدا اے، تے اوہنے جدوں دی ڈرینگ سکھی سی اوہ اودوں دا اس شے ڈیزاین سوچدا سی۔ اوہنے اک نکا جہیا ماڈل بنا لیا، تے اک دن اوہنوں اڈا کے ویکھیا، پر اوہ کامیاب ناں ہوئی۔ اوہ ضد دا بڑا پکا سی تے ہار منن والا نہیں سی۔ کوئی شے خراب سی تے اوہ اوہنوں ٹھیک کر کے چھڈے دا۔
فیر ایہ کم خراب ہویا ۔ ہربرٹ نے شام نوں کھان پین توں پچھوں باہر جان لگ پیا۔ مسز سنبری نوں ایہ گل کوئی ایڈی چنگی نہیں لگی، پر مسٹر سنبری نے اوہدے نال جرح کیتی۔ آخر اوہ بائیاں سالاں دا ہو گیا اے ، تے گھر بہہ کے اوہ اکا بدھو بن جائے دا۔ ۔ جے اوہ باہر پھرن جانا چاہندا اے یاں کوئی فلم ویکھنا چاہندا اے تے کوئی حرج والی گل نہیں۔ ہربرٹ نوں پیار ہو گیا اے۔ اک ہفتے دی شام نوں ، جدوں اوہناں اوتھے کھلے میدان وچ واہ واہ چر کھیڈ مل لیا ، گھر آ گئے تے شام دی روٹی دے ٹیم تے صاف اسمان ول ویکھ کے اوہنے اک دم آکھیا:
‘اماں ، میں اک کڑی نوں کل ، گھر چاہ تے بلایا اے۔ ایہ ٹھیک اے؟’
‘ کیہ کیتا اے توں ؟’ مسز سنبری نے پچھیا ، اک منٹ لئی اوہ اپنی گریمر وی بھل گئی۔ ‘ اماں ، تساں سنیا اے’۔
تے میں پچھ سکنی آں اوہ کون ایں تے تیری کتھوں واقف بنی؟’ ‘اوہدا ناں بیون اے، بیٹی بیون ، تے میں پہلی واری اوہنوں ہفتے شام نوں فلم ویکھن گیا تے اوتھے ملیا ، جس ویلے مینہ پیا پیندا سی۔ اوہ تے اک حادثہ ای سی۔ اوہ میرے نال بیٹھی سی تے اوہدا بیگ ڈگ پیا تے میں چکیا تے اوہنے مینوں شکریہ کہیا، تے انج ای اسیں گلاں کرن لگ پئے۔’
‘ تے توں ، تیرا مطلب اے ، توں مینوں دسنا چاہنا ایں ، توں تے پرانے جال وچ پھس گیا؟ اوہنے اپنا بیگ سٹیا!’
تسیں غلط سمجھے او ، اماں جی، اوہ اک چنگی کڑی اے۔ اوہ سچی مچی اک پڑھی لکھی وی اے۔
تے ایہ سبھ کجھ کدوں ہویا سی؟
کوئی ترے کو مہینے پہلاں۔
‘ اوہ ہو! توں اوہنوں تن مہینے پہلاں ملیا سیں تے چاہ تے کل بلایا اے؟’
ہاں جی، ہویا ایہ کہ میں اوہنوں اودوں ای ویکھیا سی۔ اوس پہلے دن ، شو توں پچھوں میں اوہنوں پچھیا سی کہ توں منگل نوں وی میرے نال فلم ویکھن آویں دی، تے اوہنے جواب دتا ، اوہنوں نہیں پتا۔ (جاری اے)

اپنا تبصرہ گھلو