ناول کنڈیالے ساک

jaswandar Ratian

جسوندررتیاں

”کنڈیالے ساک” دی کہانی ساڈے ہر گھر دی کہانی اے، رشتیاں دی اوٹ وِچ پلن والے زہریلے رویے ای ایس دا مُکھ مدعا اے۔ رشتے کیویں ساڈے نیڑے تیڑے وسدیاں ہویاں ہر پل سانوں اندر ڈنگ مارن نوں پِھردے نیں، کیوں رشتیاں دی اوٹ وِچ لوکی اپنے اپنے مفاد دی خاطر سکے رشتیاں دے جانی دشمن ہو نِبڑدے نیں۔ ناول اینے سوہنے ڈھنگ نال بیانیا گیا اے کہ تہانوں پڑھدیاں احساس ای نہیں رہندا کہ تسیں کِنا پڑھ چکے او تے کِنا رہندا اے۔ساڈے بدیس وسن والے وِیر جسوندر رتیاں جی نے بڑے سوہنے ڈھنگ نال ایس دی کہانی بُنی اے۔ اسیں امید کردے ہاں کہ روزوار ”بھلیکھا”دے پڑھنہاراں نوں ہمیش وانگ ایہہ لکھت پسند آوے گی۔ (التھاکار: محمد آصف رضا)

کچھ نھی نکلیا…. کچھ نہیں ہویا… نالے اگانھ نوں پھیر رکھ لینگے…۔” میلو دیاں گلاں سیتے نوں ہلون رہیاں سن۔
“چل چھڈ وے، روٹی پکائیے..۔” دودھ چنگھدے منڈے دے مونہوں دودھ چھڈاوندی، منڈے نوں چک کے کھڑی ہو گئی۔ سبھات توں باہر جا کے منڈے نوں کھیڈ لا، روٹی پکاون لگی۔
سیتا اندر پیا رہا تے سوچاں دے ڈونگھے وہنیں رڑھدا گیا۔پالے نے اک مربع زمین چوں اٹھ تاں پہلاں ای بی کر دتے سن۔ مربی بندی موقعے رہندے ستارھاں کلے وٹے کٹ کٹا کے میرے والی بھاری زمین چ باراں لے لئے۔ لوک کہندے سی ایہہ سجن دی سیاست سی۔ ہن سیتے کول نوں قلعے میرے دی کالی بھوئیں سی، میلو ٹھیک ای کہندی اے… وٹائی والے ککھ پلے کہڑا پاوندے آ ! میہں دے سر ورگی زمین اے… اڑے تھڑے ذیلداراں دے کھوہ دا پانی لگدی، نالے نہر دا۔ بندہ وڈھ کے بیجئے۔ آتھن نوں ہرا ہوجے۔ اوہنے من ہی من کھیتی کرن دا فیصلہ کیتا۔
ارجن بنتو نوں کڈھ کے لے گیا۔ بنسو مر گئی قصہ ختم پر ہن کھیتی کرے تاں کرے کاہدے آسرے ؟ میلو پرانت وچ چھابے سنے، سارا نک سک جیہا رکھ کے اندر آئی۔ سیتا جویں سوچاں دی اڈان اڈدا دھرتی تے ڈگیا تاں ایویں ہی پچھ بیٹھا، “بھلاں… گھرے کنے کو پیس ے ہون گے ؟”
“گھرے ! میری روکڑ بھنائی اے !!” میلو سیتے دے عجیب جہے سوال تے حیران سی۔ اوہنے کدے اوہنوں، پیسے نہیں سن لیا کے پھڑائے۔ اوہ سوچدا سی، تیویں نوں پیسہ نہیں پھڑاونا چاہیدا… جتھے تیویں دی مختیاری ہووے، اوہ گھر نہیں چلدے۔
“کیہ کرنے سی پیسے ؟ ” میلو توں سیتے دا ہراسیا جیہا مونہہ جھلیا نہ گیا۔
“ایویں ای سوچدا سی… مکھاں جے واہی کریئے تاں بلد تے سند ولیویں آسطے پیسہ تاں چاہیدے ہتھ پلے تاں کچھ نہیں…!! ” اوہ پھیر چپ جیہی وٹ گیا۔
میلو اکھاں پاڑ پاڑ اوہدے ول تک رہی سی، جویں اوہنوں اوہدی کہی گل تے یقین نہ آیا ہووے، جویں سیتے نے الوکار گل آکھ دتی ہووے…! سی وی سچ، سدا دارو دیاں گلاں تے ویلیاں دیاں ڈھانیاں دیاں صفتاں کرن والا… ایہو کہن والا کھادا پیتا رہِ جانا، دنیا توں کیہ لے جانا۔ اوہ واہی دیاں گلاں کردا سی۔
“توں واہیں کرن آلا بن… پیسے آپے آ جان گے…۔ ” میلو کوئی راج رکھ گئی جس نوں سیتا نہ سمجھ سکیا۔ اس نے سوچیا کہ میلو کہے گی میریاں ٹوماں ویچ دیہہ… میلو میں تیریا ٹوماں نہیں ویچنیاں… واہی سال ٹھہر کے کرلاں گے۔ ہن ارجن بائی وی چلا گیا، کوئی وادھو خرچ نہیں کریا کرنا اگلے سال تھوڑے بہتہے کتوں پھڑ دڑ کے وچ وٹائی آلے رلا کے ماڑے موٹے بلدخریدلاںگے۔
“لے آپا گن کے دیکھدے آں…۔” میلو کاہل نال اٹھی، صندوق دا زندہ کھولیا تے رجائیاں گدیلیں کڈھ کڈھ باہر سٹن لگی۔
سیتا ہس رہیا سی، “کنی کو گوجھ رکھی بیٹھی ایں سہرے دیئے، پنجاہ نہیں سو ہوو…! ہور کتے ہزاراں ہون گے…؟ اینیاں نہ کیہ بندے اج کل…!” سیتا اٹھ بیٹھا سی۔
میلو نے ہیٹھوں اک نواں سرھانا کڈھ کے، منجے تے اوہدے کول آ بیٹھی۔میلو نے سرھانے دا غلاف اتاریا۔ پھیر سرھانے دی سیون ادھیڑن لگی۔میلو نے سرھانے وچ ہتھ پا، اک کپڑے دی گتھلی جیہی کڈھی تے منجے تے ڈھیری کر دتی۔ نوٹاں دی ڈھیری لگ گئی۔ دساں دے، ویہاں دے، وچ پنجاہاں دے۔
ہیں !!” سیتے دے ہوش اڈ گئے، “ایہہ کتھوں چوری کیتے آ ؟” اوہنوں شک پئی۔
“چوری نہیں… باپو دے آ،” میلو گمبھیر سی، “باپو جدوں زمین ویچدا تے پیسے لے کے گھر آوندا، ادوں اوہ ہمیشہ شرابی ای ہندا سی، میں تھوڑے بہتے کڈھ کے لکو لیندی۔ مینوں کدوں آس سی ویاہی جاوں سوچدی ساں باپو نوں کچھ ہو گیا تاں آپے کدھرے ترجوں گی، جویں بے بے گھر دا گہنہ گٹا لے کے ترگی سی میلو دیاں اکھ چوں ہنجو کر گئے۔
“سچیں بندہ کیہ سوچدا، کیہ بن جادیں !! میرے بھا دی تاں ارجن بائی جی رب آ۔ جدوں میرے ساک دی گل ہوئی تاں میں سوچیا کوئی باپو نے رہا کھوہیا اپنے ورگا عملی بھنگی لبھ لیا ہونے…! مینوں تاں اکا ای خوشی نہ چڑھی ویاہ دی… پر ایتھے آ کے، تینوں دیکھ کے سچیں مینوں یقین نہ آوے… میں تاں رب دا شکر کردی آں۔ مینوں کالی کلوٹی نوں چند ورگا بندہ تھیا گیا۔ تانہی تینوں کدے نی ٹوکیا سوچدی ساں مناں آہ آس نہیں سی… چل جہڑے چار دن سوکھ دے نکلدے آ، کڈھ… جدوں کوئی وکھت پو دیکھی جاو۔ کئی وار من وی کردا بئی کہاں توں دس کیہ لینے، جو ہو گیا بھل جاہ…. ایہہ تاں راجیاں رانیاں نہ ہوندیاں آئیاں۔ سچی مینوں تاں سونہہ گورو دی، ہن جانی یقین جیہا نہیں آوندا بئی آپاں واہی کراںگے۔ نکی جیہی ہندی سی جدوں باپو نال گڈے تے کھیت جاندی ہوندی سی۔ ہن تاں اوہ سپنا جیہا ہو گیا..!” میلوں ریڈیو وانگ بولی جاندی سی۔ اوہدے من دیاں گلاں زور ضربی زبان تے آوندیاں تے سیتے دے دل اندر اتردیاں جاندیاں۔
“مینوں کہڑے ڈولے دھرے پئے سی…!! آہ ارجن پچھے تاہیں مردا سی۔ رب اوہدا بھلا کرے جہنے اپنے میل ملاتے، مینوں ایڈی صبر سنتوکھ آلی تیویں ملاتی۔ تیویناں تاں سوئی نال گھر پٹ دندیا تے پھوئی پھوئی نہ محل بن جاندے..! میں تاں ہن اوں بندہ ماردوں خوشی چ ای…!!” (جاری اے)

اپنا تبصرہ گھلو