کہانی پراگا گدی

Sarwat Sohail pic

ثروت سہیل

اوتھے کھلے مدان وچ اک جوان منڈا اے ، جہڑا اس کم دا شدائی اے، اوہنے آکھیا سی جے کوئی ناں ہویا تے اوہ گڈی اڈا لئے دا۔
ہربرٹ دے اندر تے ساڑھے دی اگ بل پئی۔کسے بغانے نوں اپنی گڈی نوں ہتھ وی ناں لان دیا جے۔ میں بس اوتھے آ جاں دا۔ چنگا ، توں فیر سوچ لے، ہربرٹ ، تے جے توں ناں اپڑیا تے اسیں سمجھ جانواں دے۔
میں ضرور آواں دا۔’ ہربرٹ بولیا۔
بس فیر اگلے دن جدوں اوہ شہروں مڑ کے آیا تے اوہنے اپنے دفتر والے کپڑے بدلے تے ڈھلے ڈھالے کپڑے تے پرانا کوٹ پا لیا ۔ بییٹی اندر آئی ، ‘کیہ پیا کرنا ایں؟’
کپڑے پیا بدلنا۔’ اوہنے خوش ہو کے جواب دتا۔ اوہ ایڈا خوش سی کہ اپنا راز ناں رکھ سکیا۔ ‘ نویں گڈی آئی اے ، تے میں اوہ اڈان چلا واں۔’ ‘ اوہ ہو ،نہیں ، توں نہیں جانا،’ اوہنے آکھیا ، ‘ میں ایہ نہیں ہون دینا۔’
کملی ناں بن بییٹی۔ میں چلا واں ، میں تینوں دسیا اے، تے جے تینوں ایہ نہیں پسند تے توں کجھ ہور کم کر لے۔
میں تینوں نہیں جان دینا، بس ایہ ای گل اے۔
اوہنے بوہا ماریا تے آپ اوہدے اگے کھلو گئی۔ اوہدی اکھاں وچوں جیویں اگ پئی نکلدی سی ، تے اپنا من گھٹیا سی۔ اوہ تے نکی جہی سی تے اوہ لماں تگڑا بندا سی۔ اوہنے اوہنوں دواں بانہواں توں پھڑیا تے راہ توں ہٹا لیا ، پر اوہنے اوہنوں اودی لت تے بڑا ڈاڈھا ٹھڈا ماریا۔
توں چاہنی ایں میں تینوں منہ تے مکا ماراں؟’
جے توں گیا تے فیر مڑ کے ناں آویں ،’ اوہ چیک کے اچی بولی۔
اوہنے اوہنوں چکیا ، تے بسترے تے جا سٹیا ، تے باہر نکل گیا۔ انج اوہ چھڈاندی رہی تے ٹھڈے وی ماردی رہی۔
جے ڈبہ گڈی نے اوس مدان وچ بڑی ڈھم مچائی سی تے اس نویں نے اوہدوں کئی حصے ودھ کم کیتا۔ پر اوہ سانبھنی اوکھی سی، اوہ انج بڑا پجھے، ساہ وچ چڑھ گیا تے دوجے لوک وی جوش نال ہتھ پواندے رہے، ہربرٹ اوہنوں چاڑھ ناں سکیا۔
کوئی گل نہیں ،’ اوہنے آکھیا، اسیں ہن ای ایدھا ول سکھ لاں دے ۔ گل بس اینی اے کہ اج ہوا ٹھیک نہیں ۔’
اوہ اپنے ماں تے پئیو نال مڑ کے چاہ پین ٹر گیا تے اوہ گلاں کردے رہے جیویں اوہ اگے کردے ہوندے سن۔ اوہنے جان وچ آپی چر لایا کہ بییٹی نے جو کرنا سی اوہ اوہنوں ویکھنا نہیں سی چاہندا، پر جدوں مسز سنبری شام دی ہانڈی روٹی لئی باورچی خانے وچ گئی اوہنوں گھر جانا پیا۔ بییٹی اخبار پئی پڑھدی سی۔ اوہنے اتانہہ ویکھیا۔
تیرا بیگ بندھ دتا اے،’ اوہ بولی۔
کیہ ، میرا ؟ ‘
‘ جو میں آکھیا سی توں سنیا سی، میں آکھیا سی جے توں گیا تے تینوں مڑ کے ان دی لوڑ نہیں۔ مینوں تیریاں گلاں بھل گیاں سن۔ ہر شے بندھ دتی اے، اوہ س ن والے کمرے وچ اے۔
اوہنے کجھ چر اوہدے منہ ول حرانی نال ویکھیا۔ اوہنے مکر کیتا کہ اوہ فیر پڑھن لگ پئی سی۔ ہربرٹ اوہنوں چنگی طرحاں ودھیا کرنا سی۔
چل ٹھیک اے، توں اپنی مرضی کر،’ اوہنے آکھیا
اوہ کمرے وچ گیا ، اوہدے کپڑے اک سوٹ کیس وچ رکھے گئے سن ، تے اک بھورے رنگ دے لفافے وچ اوہنے باقی چیزاں رکھیاں سن۔ اوہنے اک ہتھ وچ بیگ پھڑیا تے لفافہ دوجے ہتھ وچ پھڑیا، تے اک وی لفظ بولن تون بغیر وچلے کمرے وچوں لنگھیا، تے گھروں باہر نکل گیا۔ اوہ ماں دے گھر گیا تے گھنٹی وجائی ۔ ماں نے بوہا کھولیا۔
(جاری اے)

اپنا تبصرہ گھلو