اٹھارویں پارے دا خلاصہ

مولانا محمد الیاس گھمن

سورۃ المومنون
شرو ع وچ مومنین دی صفات نوں بیان کیتا گیا اے۔ پہلی 10 آیتاں وچ اہل ایمان دیاں ست صفتاں نوں بیان کیتا کہ جے کوئی ایہناں اوصاف نوں مکمل طور اُتے اپناندا اے تے اوہ صحیح معنیاں وچ مومن اے تے اللہ تعالیٰ نے فرمایا پکی گل ایہہ وے کہ اوہ کامیاب اے۔ اوصاف ایہہ نیں: پہلی صفت: نماز خشوع تے خضوع دے نال پڑھنا۔ خشوع دی اک تفسیر عبداللہ بن عباس رضی اللہ عنہما توں مروی اے کہ خشوع والے اوہ لوک نیں جیہڑے نماز وچ عاجزی تے انکساری کردے نیں، دائیں بائیں نہیں ویکھدے۔ مومنین دی بقیہ 6 صفات ایہہ نیں: فضول کماں تے فضول گلاں توں پرہیز کرنا۔ اپنے آپ نوں بُرے اعمال و اخلاق توں پاک کرنا جنہوں تزکیہ کہندے نیں۔ شرمگاہواں دی حفاظت کرنا، امانتاں دا خیال کرنا، وعدیاں نوں پورا کرنا نماز دی پابندی کرنا۔ فیر حضرت نوح علیہ السلام دا قصہ بیان کیتا جا رہیا اے۔ حضرت نوح علیہ السلام نے فرمایا اے میری قوم! اللہ دی عبادت کرو جس دے سوا تہاڈا کوئی معبود نہیں پر قوم نے بجائے منن دے انکار تے استہزاء کیتا۔ بحکم خداوندی حضرت نوح علیہ السلام نے کشتی بنائی، منن والیاں نوں اپنے نال سوار کر لیا باقی طوفان وچ غرق ہو گئے۔ ایس توں بعد اللہ تعالیٰ فرماندے نیں کہ اسیں حضرت عیسیٰ علیہ السلام تے اوہناں دی والدہ حضرت مریم علیہا السلام نوں اپنی قدرت دی نشانی بنایا یعنی حضرت عیسیٰ علیہ السلام بغیر والد دے پیدا ہوئے۔ اک بادشاہ سی جیہڑا ایہناں دا دشمن سی اوہ ایہناں نوں قتل کرنا چاہندا سی تے اللہ تعالیٰ نے ایہناں نوں اک انج دی بلند تھاں (ربوہ) اُتے پناہ دتی جیہڑی پر سکون، صاف ستھرے وگدے ہوئے پانی والی تے سرسبز و شاداب سی تے ایہہ تھاں بیت المقدس دے نیڑے واقع اے۔ ربوہ ٹیلے نوں کہندے نیں۔ ایس نال قادیانیاں والا خود ساختہ ’’ربوہ‘‘ جیہڑا پاکستان وچ اے مراد نہیں۔ ہن ساڈے اکابر خصوصاً مولانا منظور احمد چنیوٹی رحمہ اللہ دی 30 سالہ جدوجہد نال ربوہ دا ناں بدل کے’’ چناب نگر ‘‘ رکھ دتا گیا اے۔ فیر مشرکین دی محرومی دی وجہ بیان کیتی اے مشرکین دی عبادت ایہہ سی کہ اللہ تعالیٰ دے کلام نوں سن دے نہیں سن بلکہ نس جاندے سن، آیتاں دا انکار کردے سن تے ایہہ کم غرور تے تکبر دی وجہ نال کردے سن۔ ایہہ لوک رات نوں محفلاں سجا سجا کے قرآن کریم دے بارے وچ بے ہودہ گلاں کردے سن۔ ایہناں مشرکین دی ایہہ گندی عادت سی کہ رات نوں بہہ کے قصے کہانیاں سناندے، اللہ دی آیتاں تے نبی کریم ﷺ دیاں گلاں نال ایہناں نوں کوئی دلچسپی نہیں سی۔ ایہناں ای بے ہودہ حرکتاں دی وجہ نال ایمان جہی عظیم نعمت توں وی محروم رہے تے نبی پاک ﷺ نوں برحق جانن دے باوجود وی ایمان نہ لیائے۔ فیر انعامات خداوندی دا ذکر اے اللہ تعالیٰ مُنِعم نیں اپنے بندیاں نوں بے شمار نعمتاں عطا فرمائیاں نیں ایہناں وچوں تن (کن، اَکھاں تے دل) اہم نعمتاں نیں۔ ایہناں نعمتاں دا تقاضا ایہہ سی کہ جدوں اللہ نے بغیر منگے اَکھ دتی اے تے ایس نال اوہ کجھ ویکھدے جیہڑا اللہ چاہندے نیں، کن دتے نیں تے ایہناں توں اوہ سن دے جو اللہ چاہندے نیں اللہ نے دل دتا تے ایس نال اوہ سوچدے جو اللہ تعالیٰ چاہندے نیں۔ ایہہ انعامات تے اللہ تعالیٰ نے دتے نیں تے استعمال تسیں اپنی مرضی دے مطابق کردے او تے شکر وی گھٹ ادا کردے او، ایہہ گل مناسب نہیں۔ فیر کفار نوں عذاب دی وعید سنائی جا رہی اے نبی اکرم ﷺ نے جیہڑے دلائل توحید و رسالت بیان فرمائے نیں ایہناں دا تقاضا تے ایہہ سی کہ کفار و مشرکین حق نوں من دے تے قبول کردے۔ پر اوہناں اُتے دنیاوی عذاب ممکن اے کہ نبی اکرم ﷺ دی زندگی وچ آ جائے ایسے وجہ نال نبی اکرم ﷺ نوں تلقین کیتی جا رہی اے کہ تسیں دعا منگو کہ اے اللہ ! جے تسیں ایہناں لوکاں نوں میرے ساہمنے ای عذاب دینا اے تے مینوں ایس توں محفوظ رکھنا۔ نبی کریم ﷺ عذاب توں بالکل محفوظ نیں پر فیر وی آپ نوں ایہہ دعا سکھائی گئی تاں جے آپ ہر حال وچ اپنے رب نوں یاد رکھن تے امت نوں تلقین وی ہو جائے کہ اوہ ایہہ دعا منگیا کرن فیر کافر دی اک تمنا بیان کیتی، کافر نوں جدوں موت دے آثار تے آخرت دی منزلاں نظر آن لگن گیاں تے ایس ویلے کہے گا اے رب ! مینوں واپس لوٹا دیو، تاں جے میں ایمان لے آواں تے اوہ نیک اعمال کر سکاں جنہاں نوں میں دنیا وچ نہ کر سکیا! جواب ملے گا ہر گز نہیں۔ اللہ تعالیٰ فرماندے نیں ایہہ نِری ایس دی اک گل اے جس نوں اوہ اپنے منہ نال کہہ رہیا اے۔ ایہہ واپس جا کے وی چنگے کم نہیں کرے گا۔ تے ایہناں دے پچھے اک پردہ اے جیہڑا قیامت تیکر لئی اے۔ مرن توں بعد توں لے کے اُٹھن تیکر دے زمانے نوں برزخ یعنی پردہ کہندے نیں۔ جے اسیں میت دی قبر اُتے جائیے تے میت نوں ویکھ لئے تے ایہہ پردے دے خلاف اے تے جے میت سانوں ویکھ لوے تے ایہہ پردے دے خلاف نہیں۔ فیر اہل جہنم دی آہ و بقا دا ذکر اے قیامت دا دن ہوئے گا، کافرجہنم وچ ہون گے، ایہناں دے چہرے جھلس رہے ہون گے تے اوتھے اوہ اللہ تعالیٰ نوں پکار رہے ہون گے کہ اے اللہ ! سانوں ایتھوں کڈ دیو، اللہ تعالیٰ فرمان گے کہ تہاڈے اُتے ساڈی آیتاں پڑھیاں جاندیاں سن تے تہانوں ڈرایا جاندا سی پر تسیں ساڈی آیتاں نوں جھٹلاندے سی، اوہ کہن گے کہ یا اللہ ! ساڈی بدبختی ساڈے اُتے غالب آ گئی، اسیں گمراہ ہو گئے، اللہ ! سانوں ایتھوں کڈ دیو ہن اسیں نافرمانی نہیں کراں گے۔ اللہ تعالیٰ فرمان گے کہ ذلیل ہو کے ایتھے جہنم وچ پئے رہو ہن تسیں ساڈے نال گل نہیں کرنی۔ فیر ایہہ اہل جہنم کسے نال گل نہیں کر سکن گے۔ سورۃ دے آخر وچ اے کہ کیہ تہاڈا خیال ایہہ سی کہ اسیں تہانوں انج ای فضول پیدا کیتا اے تے ایہہ کہ تسیں ساڈے کول لوٹ کے نہیں آئو گے؟ اللہ رب العزب اُچی شان دا مالک اے، حقیقی بادشاہ اے، اللہ تعالیٰ دے علاوہ کوئی عبادت دے لائق نہیں، اللہ عزت والے عرش دے مالک نیں۔ جیہڑے اللہ تعالیٰ دے نال کسے نوں شریک ٹھہراندے نیں ایہناں دے کول کوئی دلیل نہیں، ایہناں دا حساب تے اللہ دے ذمے اے، قیامت نوں کافر کامیاب نہیں ہون گے۔ آخر وچ فرمایا کہ اے میرے پیغمبر ! تسیں ایہہ دعا منگیا کرو: اے میرے رب میری کوتاہیاں نوں معاف کر تے میرے حال اُتے رحم کر تے تو سب رحم کرن والیاں توں ودھ کے رحم کرن والا ایں۔
سورۃ النور
ایس سورۃ وچ مختلف دینی، اخلاقی تے معاشرتی احکامات بیان کیتے گئے نیں۔ معاشرے وچ بے حیائی، فحاشی تے برائی نوں روکنا تے عفت و عصمت نوں عام کرن دی ہدایت دتی گئی اے۔ فیرام المومنین حضرت عائشہ رضی اللہ عنہا دی برائت، گھراں وچ جان دے آداب تے پردہ دے متعلق احکامات نوں تفصیل نال بیان کیتا گیا اے سب توں پہلے حدِ زنا نوں بیان کیتا اے جے غیر شادی شدہ مرد تے غیر شادی شدہ عورت نے زنا کیتا ہوئے تے ایہناں نوں بطور حد سو سو کوڑے مارے جان گے جد کہ شادی شدہ مرد تے شادی شدہ عورت دی سزا حدیث پاک وچ سنگساری بیان کیتی گئی اے۔ فعلِ زنا ثابت ہون دے تن طریقے نیں:
1۔ چار مرد گواہ ہون۔
2 زانی یا زانیہ خود اعتراف کرے کہ ساڈے توں فعل زنا سرزد ہو گیا اے۔
3۔ کنواری عورت دا حمل ظاہر ہو جائے تے ایس توں دریافت کیتا جائے گا کہ ایہہ حمل کس دا اے؟اوہ جس دا ناں لوے تے ایس توں تحقیق کیتی جائے گی جے اوہ ایس فعل بد دا اقرار کر لوے تے مرد و عورت دونویں شرعی سزا دے مستحق ہون گے نہیں تے صرف عورت نوں سزا ملے گی۔ فیر حدِ قذف نوں بیان کیتا کہ کسے اُتے زنا دا الزام لان والے دے ذمے اے کہ اوہ چار گواہ پیش کرے۔ جے چار گواہ پیش نہیں کر سکدا تے ایس تہمت لان والے اُتے حدِ قذف (80 کوڑے) لائی جائے گی تے اوہ مرد و دالشہادۃ ہو جائے گا، آئندہ کسے کیس وچ ایس دی شہادت قبول نہیں ہوئے گی۔ جے توبہ کر لیندا اے تے ایس نوں آخرت وچ سزا نہیں ملے گی پر دنیا دی سزا باقی رہوے گی یعنی ایس نوں کوڑے وی لگن تے آئندہ گواہی وی قبول نہیں ہوئے گی۔
ایس توں بعد واقعہ افک دا ذکر اے۔ سن 6 ہجری وچ غزوہ بنی المصطق توں واپسی اُتے آپ ﷺ تے آپ دے اصحاب نے اک تھاں اُتے پڑائو پایا۔ ایس سفر وچ ام المومنین حضرت عائشہ صدیقہ رضی اللہ عنہا آپ ﷺ دے نال سن۔ جدوں قافلہ دی روانگی ہون لگی تے آپ رضی اللہ عنہا قضائے حاجت لئی گئیاں ہوئیاں سن۔ قافلہ روانہ ہو گیا، آپ اوتھے رہ گئیاں ۔ بعد وچ حضرت صفوان رضی اللہ عنہ دے اونٹ اُتے سوار ہو کے قافلہ دے نال مل گئیاں پر عبداللہ بن ابی، جیہڑا نبی کریم ﷺ دا ازلی دشمن سی، نے افتراء بنھیا، ام المومنین اُتے تہمت لائی۔ آخر کار اللہ تعالیٰ نے آپ اپنے نبی دی بیوی دی برائت دا اعلان فرما کے آپ دی عفت و پاکدامنی دی گواہی دتی تے ایہنوں بہتانِ عظیم کہیا۔ واقعہ افک وچ منافقین دے پروپیگنڈے وچ کجھ سادہ لوح مسلمان وی شریک ہو گئے۔ ایہناں وچ حضرت مسطح رضی اللہ عنہ وی سن، جنہاں نے بعد وچ سچی توبہ کر لئی سی۔ اوہ حضرت صدیق اکبر رضی اللہ عنہ دے رشتے دار سن تے حضرت صدیق اکبر رضی اللہ عنہ ایہناں دی مالی امداد فرمایا کردے سن۔ جدوں واقعہ افک پیش آیا تے آپ نے صدمے دی وجہ نال قسم کھادی کہ میں ایہناں دی مدد نہیں کراں گا۔ اللہ تعالیٰ نے ایس آیت وچ مدد جاری رکھن دا کہیا تے فرمایا کہ جیہڑے لوک اہل علم و فضل تے اہلِ خیر نیں اوہ انج دی قسم نہ کھان کہ اوہ رشتے داراں نوں کجھ نہیں دین گے۔ صدیق اکبر رضی اللہ عنہ نے قسم دا کفارہ ادا کر دتا تے سابقہ معمول دے مطابق ایہناں دی مدد جاری فرما دتی۔ فیر مکانات وچ داخلے دے آداب بیان کیتے چار قسم دے مکانات نیں:
نمبر 1 اوہ مکان جس وچ بندا آپ کلا رہندا اے۔ نمبر دو اوہ مکان جس وچ ہور لوک وی رہندے ہون، رشتے دار ہون یا اجنبی ہون۔ نمبر تن اوہ مکان جس وچ کسے دا رہائش پذیر ہونا پتہ نہ ہوئے کہ کوئی ایس وچ رہندا وی اے یا نہیں۔ نمبر چار اوہ مکان جیہڑے رہائش لئی نہیں جویں مسجد، خانقاہ تے مدرسہ وغیرہ۔ نمبر اک ایس وچ اجازت دی لوڑ نہیں۔ نمبر دو ایس وچ اجازت دے بغیر نہیں جا سکدے۔ نمبر تن ایس وچ وی اجازت دے بغیر نہیں جا سکدے۔نمبر چار وچ اجازت دی لوڑ نہیں۔ ایس توں بعد اکھاں نوں جھکان تے شرمگاہ دی حفاظت دا حکم دتا گیا اے۔ اک اے مرد دا نامحرم عورت نوں ویکھنا تے اک اے عورت دا نامحرم مرد نوں ویکھنا۔ جے عورت لئی نامحرم مرد نوں ویکھن دی اجازت ہوندی تے اللہ تعالیٰ عورت نوں اکھ تھلے رکھن دا کدی نہ فرماندے۔ پتہ چلیا کہ مرد دے ذمے اک کم اے عورت نوں نہ ویکھنا تے عورت دے ذمہ دو کم نیں: کم اک مرد نوں نہ ویکھنا نمبر دو اپنے چہرے نوں لُکانا ایسے وجہ نال مرد اُتے پردہ نہیں تے عورت اُتے پردہ لازم اے۔ فیر پردے دا حکم دتا خاتون دا پورا جسم پردہ اے۔ بوقت ضرورت شدید ہتھیلیاں تے چہرہ کھول سکدی اے۔ جے لوڑ نہ ہوئے تے نہ کھولے عورت دا چہرہ ای حسن دا اصل مرکز ہوندا اے تے عام حالات وچ ایس نوں لُکان دا حکم اے۔ فیر اللہ نے اپنے نور، نورِ ہدایت دی مثال دتی اے۔ جدوں اسیں کہنے آں: اللہ نور اے تے ایس توں مراد ہوندا اے روشن کرن والا۔ ’’نور‘‘ دا حقیقی معنی اے: خود ظاہر ہوئے تے دوجے نوں ظاہر کرے۔ نور دا ایہہ حقیقی معنی اللہ اُتے صادق نہیں آندا کیوں جے اللہ ظاہر نہیں تے ایتھے نور دا مجازی معنی اے ۔ نور توں مراد اے کہ اللہ رب العزت اسماناں زمین نوں روشن کردے نیں ایس وچ سارے مخلوقات آندیاں نیں۔ اللہ رب العزت کنج روشن کردے نیں؟ تے ایس دی مثال دتی اے کہ جویں اک طاقچہ ہوئے، ایس طاقچے وچ چراغ ہوئے تے چراغ اک قندیل وچ ہوئے تے چراغ نوں جس تیل نال ساڑیا جا رہیا ہوئے اوہ زیتون دا تیل ہوئے۔ زیتون وی انج دا کہ جس اُتے پورا دن سورج دی روشنی پیندی رہندی اے خواہ سورج مشرق وچ ہوئے یا مغرب وچ، ایسے وجہ نال ایس دا تیل نہایت صاف تے عمدہ ہوندا اے۔ مراد ایس توں مومن دا دل اے کہ مومن دے دل وچ طبعی طور اُتے ایمان دے قبول کرن دی صلاحیت موجود اے، فیر جدوں اُتوں وحی الٰہی آندی اے تے بوہت جلدی ایہنوں عمل دی توفیق مل جاندی اے۔ فیر ایہناں دے اعمال دی مثال دتی گئی اے جیہڑے آخرت اُتے یقین رکھدے نیں پر توحید و رسالت نوں نہیں من دے۔ ایہناں کفار دے اعمال دی مثال انج اے جویں بندا ریگستان وچ سفر کر رہیا ہوئے تے ایہنوں دور توں ریت دی چمک اِنج لگے جویں پانی پر حقیقت وچ اوہ پانی نہیں ہوندا تے ’’سراب‘‘ نال ایس نے دھوکہ کھادا۔ ایسے طرح کفار دے اوہ نیک اعمال جنہاں دے بارے وچ اوہ ایہہ سمجھدے سن کہ ایہناں نوں آخرت وچ فائدہ دین گے، ایمان نہ ہون دی وجہ نال اوہ نیک اعمال سراب وانگوں دھوکہ نیں۔
ایس توں بعد ایہناں کفار دی مثال اے جیہڑے آخرت اُتے وی ایمان نہیں رکھدے۔ ایہناں کفار دی مثال انج اے جویں بوہت گہرا سمندر ہوئے تے ایس وچ ہنیرے ہون، ایس دے اُتے فیر اک موج اے پانی دی، فیر ایس دے اُتے اک ہور موج اے، فیر ایس دے اُتے بدل نیں۔ ہن اینا ہنیرا ہوئے تے بندے نوں اپنا ہتھ وی نظر نہیں آندا۔ فیر کامیابی دی بنیاد چار گلاں نوں بیان کیتا جے کوئی بندا چار گلاں دا اہتمام کرے تے کامیاب ہو جائے گا تے اوہ چار گلاں ایہہ نیں: اللہ دی اطاعت کرے، ایس دا تعلق فرائض دے نال اے۔تے پیغمبر ﷺ دی اطاعت کرے۔ ماضی وچ اللہ تعالیٰ توں ڈردا رہیا ہوئے تے مستقبل وچ وی اللہ تعالیٰ توں ڈردا رہے۔ ایس توں بعد آیت ِ استخلاف نوں بیان کیتا ایس نوں آیت استخلاف، ایس لئی کہندے نیں کہ قرآن کریم وچ اللہ تعالیٰ نے جنہاں صحابہ کرام رضی اللہ عنہم دی خلافت دا وعدہ کیتا اے اوہ اہل اسلام دے ہاں حضرت ابوبکر، حضرت عمر ، حضرت عثمان، حضرت علی رضی اللہ تعالیٰ عنہم نیں۔ ایہناں ای دی خلافت نوں خلافت راشدہ حق چاریار وی کہندے نیںتے چار خلفائے راشدین وی کہندے نیں۔ پچھلی آیتاں وچ وڈیاں دے متعلق حکم سی کہ کسے دے گھر بغیر اجازت داخل نہ ہوئو۔ ہن ایس دے بعد غلام، لونڈی تے نکے بالاں دے متعلق حکم اے کہ تن اوقات وچ ایہناں نوں وی گھراں تے کمریاں وچ بغیر اجازت دے داخل نہیں ہونا چاہیدا۔کیوں جے ایہناں اوقات وچ انسان بے تکلفی وچ صرف ضروری کپڑیاں وچ ہوندا اے تے تنہائی چاہندا اے تے ایہناں دے داخل ہون نال بے پردگی وی ہوندی اے تے ناپسندیدگی وی۔ ایس لئی ایہناں نوں حکم دتا کہ تن اوقات نماز فجر توں پہلے، دوپہر دے ویلے تے نماز عشاء دے بعد بغیر اجازت گھراں یا کمریاں وچ داخل نہ ہون۔ معذورین دے بارے وچ آیت نازل ہوئی معذور یعنی نابینا، پیراں توں معذور وغیرہ تندرستاں دے نال بہہ کے کھانا کھان توں شرماندے سن کہ کدھرے سانوں کھانے دی تہذیب نہ ہوئے یا معذور سوچدا ہوئے کہ تھاں زیادہ نہ گھر لواں۔ ایسے طرح تندرست حضرات نوں وی الجھن ہوندی سی کہ کدھرے ایہہ معذوری دی وجہ نال مشترک کھانے وچ ساڈے توں گھٹ کھان تے اپنا پورا حصہ نہ لے سکن۔ اللہ تعالیٰ نے فرمایا کہ ایہناں نوں نال بٹھا کے کھلان وچ کوئی حرج نہیں۔ سورۃ دے آخر وچ مخلص مسلماناں دی مدح تے منافقین دی مذمت بیان فرمائی آیت غزوہ احزاب دے موقعے اُتے نازل ہوئی سی جس وچ مخلص مسلماناں دی مدح تے منافقین دی مذمت کیتی گئی اے۔ جدوں کفار دے سارے قبائل مدینہ منورہ اُتے حملہ کرن لئی متحد ہو کے آن لگے تے آپ ﷺ نے دفاعی پوزیشن اختیار کرن لئی خندق کھودن دا حکم دتا تے مخلص مسلمان سچے دل نال کم وچ لگے رہندے۔ جدوں جانا ہوندا تے اجازت لے کے جاندے جد کہ منافقین اول تے سستی کردے جدوں آ جاندے تے بہانے بنا کے یا مخفی طور اُتے نکل جاندے۔ عام مجالس وچ وی ایسے طرح ہوندا۔ اللہ تعالیٰ نے ایہناں دی مذمت بیان فرمائی تے ایہہ وی فرمایا کہ مخلصین مسلمان جدوں تہاڈے توں اجازت منگن تے ایہناں نوں دے دتا کرو تے ایہناں لئی دعائے مغفرت وی کیتا کرو۔ اج وی ایہو حکم اے کہ کسے اجتماعی مشورے لئی جدوں سب جمع ہون تے بلا اجازت چلے جانا درست نہیں۔ اجازت لے کے جانا چاہیدا اے۔
سورۃ الفرقان
”فرقان” دے معنی نیں حق و باطل دے وچکار فرق کرن والا۔ ایس سورۃ وچ قرآن کریم نوں فرقان فرمایاگیا اے ایسے وجہ نال ایس دا ناں وی فرقان رکھیا گیا اے۔ ایس وچ بنیادی عقائد دے علاوہ مشرکین دے اعتراضات دے جواب دتے گئے نیں، مومنین لئی انعامات دا ذکر اے تے سورۃ دے آخر وچ عباد الرحمن دے اوصاف نوں بیان کیتا گیا اے۔ شروع وچ مشرکین دے اعتراض نوں بیان کیتا اے۔ مشرکین کہندے سن کہ قرآن کریم نوں محمد ﷺ نے آپ گھڑیا اے۔ ایہناں دا نبی اکرم ﷺ دے متعلق نظریہ سی کہ دیگر کجھ لوک وی ایس دی مدد کردے نیں۔ یعنی یہودیاں توں کجھ گلاں سکھ لئیاں نیں اوہ ای سانوں دس دیندے نیں تے کہندے نیں کہ ایہہ وحی الٰہی یعنی قرآن کریم اے۔ اللہ تعالیٰ فرماندے نیں کہ ایہہ لوک ظلم تے کھلے جھوٹ اُتے اتر آئے نیں۔ اگلی آیت وچ جواب دیندے ہوئے فرمایا کہ اے میرے پیغمبر ! تسیں فرما دیو کہ قرآن میرے ولوں (افتراء) نہیں بلکہ ایہہ اللہ تعالیٰ ولوں اے۔ ایہناں دا اک اعتراض ایہہ سی کہ ایہہ کنج دا نبی اے جیہڑا کھاندا پیندا اے، بازاراں وچ چلدا پھردا اے ، فرشتہ وی نہیں تے ایس دے کول خزانہ وی نہیں ۔ جے نبی ہوندا تے ایس دے نال ملائکہ ہوندے ، پیغمبر ہوندا تے نہ کھاندا نہ پیندا۔ جواب دتا کہ مشرکین کنج دی نکمی مثالاں پیش کردے نیں کہ نبی ہوندا تے ایس دے نال فرشتہ ہوندا پر جے پیغمبر علیہ السلام دے نال فرشتہ ہوندا تے فیر ایہو لوک کہندے کہ ایس دے فرشتہ ہون اُتے کیہ دلیل اے؟ جے نبی ہوندا تے نہ کھاندا تے ایہہ کہندے کہ اسیں کھانے آں تے ساڈا نبی تے اوہ ہونا چاہیدا اے جیہڑا کھان والا ہوئے! پچھلی آیتاں وچ مشرکین دا اعتراض سی کہ ایہہ کنج دا نبی اے جیہڑا کھاندا وی اے ، پیندا وی اے، بازاراں وچ چلدا وی اے۔ ایہناں دا خیال سی کہ نبی انسان نہیں ہونا چاہیدا بلکہ فرشتے نوں نبی ہونا چاہیدا اے۔ایتھے پارے دے آخر وچ جواب دتا کہ جنہاں انبیاء علیہم السلام نوں تسیں وی نبی تے رسول من دے او اوہ وی تے انسان ای سن انساناں وانگوں کھاندے پیندے سن، بازاراں وچ چلدے سن، لہٰذا ایس توں تسیں سمجھ لیندے کہ کھانا پینا، بازار وچ پھرنا وغیرہ منصب نبوت و رسالت دے منافی نہیں۔

اپنا تبصرہ گھلو