نال سی میرے اوہدی کنی سوہنی چال سی دل دا میں دساں کیہ ہویا براحال سی

شاعری : نائلہ ریاض بٹ

نال سی میرے اوہدی کنی سوہنی چال سی

دل دا میں دساں کیہ ہویا براحال سی

نال لے کے میں اوہنوں گھر فیر آگیا
بوہے تے کھلو گئی جھاکا جیا آگیا

شگناں دے نال اونھوں دہلیز اتے چاڑھیا
نال لا کے پیار نال اندر میں واڑھیا

ماں ہتھوں تھوڑا جیا پانی اوس پیتا سی
واج کوئی کڈھی نہیں منہ جیویں سیتا سی

بھابھی نوں وی ویکھ کہ چاہ بڑا چڑھیا
لاڈ نال آکے اونھاں کن اودھا پھڑیا

اینے نال یار ویکھو ہمت اودھی ودھ گئ
چھن چھن کر دی او بھابھی پچھے چڑھ گئ

بھابھی دیاں چیکاں نے ویہڑہ سر چکیا
پہنچیا میں نس کے تے رولا فیر مکیا

مار کے تے ڈوھڈ اونہےگٹ میرا پنھیا۔۔
گائیں نوں لیا کے میں باہر آ بنھیا

بزار جا کے فیر میں سنگل لیایا سی
گلی وچ بنھ کے تے رولا ای مکایا سی

آوندے جاندے لوکی ایویں ہوندے پئےتنگ جی
اسی کی کیتا بھلا کاہدی اے جنگ جی

محلے داراں ویکھو پایا وکھرا فتور اے
مار دی اے ڈوھڈ دسو ساڈا کی قصور اے

کرنی اے عید لوکو عین عبادت اے
لوکاں دی کی سنئیے لوکاں نوں تے عادت اے

2 تبصرے “نال سی میرے اوہدی کنی سوہنی چال سی دل دا میں دساں کیہ ہویا براحال سی

  1. کیہڑے ٹاپک تے تبصرہ؟ ساڈے مللک چہ تے ماشا اللہ ہر کم تے ای تبصرہ لکھو تے گھٹ اے ، بجلی ، گیس، نوکری ، مہنگائی، بچیاں تے ظلم و ذیادتی، مزدور دی غربت ، تعلیم دے ناں تے لٹ مار دا بازار، سفید پوشی دے بھرم رکھدے ہوے فنکار، عزت تے توقیر نوں ترسدے ہوے ٹیچرز،۔ کناں کو لکھاں ،،۔ پر کیہڑے ٹاپک تے؟🙁

  2. بہت ودھیا نظم نائیلہ ہوراں لکھی اے، شروع چہ تے پڑھن والا ووہٹی دے تصور چہ چلا جاندا اے، پر فیر جدوں پردہ ہٹایا نائلہ ہوراں 🙂 تے نما جیا ہاسہ ضرور آیا ۔۔ جیوندے وسدے روہ نائلہ صاحبہ 🌹

Leave a Reply to شازیہ Cancel reply