افغانستان وچ تشدد دے خاتمے لئی ہر ممکن تعاون کراں گے: وزیراعظم

کابل( پنجابی میڈیا گروپ) وزیراعظم آکھیا اے افغانستان وچ امن خطے وچ امن دی ضمانت اے، مفاہمتی عمل وچ پاکستان نے مثبت کردار ادا کیتا، افغانستان وچ تشدد دے خاتمے لئی ہر ممکن تعاون کراں گے۔ وزیراعظم عمران خان نے افغان صدر اشرف غنی دے نال مشترکہ پریس کانفرنس کردیاں آکھیا دورہ کابل تے بہت خوشی اے، دورہ کابل دی دعوت تے شکریہ ادا کرنے آں۔ دوواں ملکاں دے تعلقات دا تریخی پس منظر اے، 60دی دہائی وچ کابل سیاحت لئی بہترین منیا جاندا سی، پاکستان دی حکومت تے عوام افغانستان وچ امن چاہندے نیں۔ افغانستان وچ امن لئی ہر ممکن تعاون دی یقین دہانی کرانے آں۔ عمران خان آکھیا پاکستان افغانستان دے نال تعلقات دی ہور بہتری دا خواہاں اے، افغانستان دی توقعات توں ودھ کے مدد کراں گے، ہمیشہ توں ایہو موقف رہیا طاقت نال کوئی وی مسئلہ حل نہیں ہوندا، بدقسمتی نال افغانستان وچ تشدد دے واقعات وچ وادھا ہویا اے۔ صدر اشرف غنی دا کہنا سی وزیراعظم پاکستان دا دورہ تریخی اے، دوواں ملکاں دے مفادات سانجھے نیں، دوواں ملکاں دی ثقافت باہمی احترام تے مبنی اے، پاکستان تے افغانستان وچ تعاون علاقائی ترقی لئی ضروری اے، بہتر مستقبل لئی دوطرفہ تعاون تے امن ضروری اے، علاقائی روابط دا فروغ تے معاشی سرگرمیاں ساڈے مفاد وچ نیں۔ افغان صدر اشرف غنی آکھیا افغانستان وچ تشدد دے خاتمے لئی جنگ بندی چاہنے آں، افغانستان وچ امن لئی مثبت سیاسی عمل دے خواہاں آں، پاکستان دا جلد دورہ کراں گا۔ اوہناں دا کہنا سی آزادی اظہار رائے دے ھوالے نال منفی تے مثبت رویاں وچ تفریق ضروری اے، رسول پاکؐ دی حرمت ہر مسلمان دے ایمان دا حصہ اے۔ رسول پاکؐ دی ناموس سارے مسلماناں دی عزت نال جڑی اے۔