کورونا پاروں پی آئی اے نے جہاز اندر کھانا دینا بند کر دتا

کراچی( پنجابی میڈیاگروپ) کورونا وائرس دی دُجی لہر نال نمٹن لئی پی آئی اے نے جہاز اندر روٹی دینی بند کر دتی ۔ترجمان پی آئی اے دے مطابق مسافراں نوں دتے جان والے کھانے دے مینیووچ وی تبدیلی کر دتی گئی اے۔ ساریاں پروازاں دے دوران گرم شیواں دین اُتے پابندی ہو گی۔ ترجمان دا کہنا اے کہ مسافراں نوں جہاز اندر ٹھنڈیاں شیواں دتیاں جان گیاں۔ سی ای او پی آئی اے ارشد ملک نے فوری تبدیلی دی منظوری دے دتی۔ترجمان دا کہنا اے کہ قومی ایئرلائن نے سعودی عرب سیکٹر لئی اسنیکس، کلب سینڈوچز، چکن پیٹیز، اک کیلا تے مفن دین جدکہ کافی یا چائے نہ دین دا فیصلہ کیتا اے۔ سعودی سیکٹر توں واپسی دی پرواز اُتے کلب سینڈوچز، چکن پیٹیز، اک کیلا تے بسکٹ پیش کیتے جان گے۔ کابل تے خلیجی ملکاں دیاں پروازاں وچ صرف ہلکیاں پھلکیاں شیواں یعنی اسنیکس دتیاں جان گیاں۔ کھان دی سروس وچ تبدیلی حفاظتی اقدامات دے تحت مسافراں تے عملے دے ارکان دے درمیان رابطے نوں گھٹ کرن لئی کیتی گئی اے۔